កូនប្រុសពៅលោកនាយករដ្ឋមន្ដ្រី ហ៊ុន សែន គឺលោក ហ៊ុន ម៉ានី ដែលជាតំណាងរាស្ត្រមណ្ឌលខេត្តកំពង់ស្ពឺ ត្រូវបានជ្រើសតាំងជាប្រធានគណៈកម្មការទី៧ នៃរដ្ឋសភានៅអាណត្តិថ្មី ដែលត្រូវទទួលបន្ទុកការងារអប់រំ យុវជន និងកីឡា ទេសចរណ៍ ធម្មការ សាសនា និងវប្បធម៌។
លោក ហ៊ុន ម៉ានី អាយុ ៣៦ឆ្នាំ ត្រូវបានជ្រើសតាំងជាប្រធានគណៈកម្មការទី៧ នៃរដ្ឋសភានេះ នៅក្នុងរដ្ឋសភា នាព្រឹកថ្ងៃនេះ ខណៈដែលតួនាទីប្រធានគណៈកម្មការ ៩ ផ្សេងទៀត ក៏ត្រូវបានធ្វើឡើងផងដែរ ដោយលោក ប៉ា សុជាតិវង្ស គឺជាប្រធានគណៈកម្មការទី១ នៃរដ្ឋសភា លោក ជាម យៀប ជាប្រធានគណៈកម្មការទី២ លោក ជា វណ្ណដេត ជាប្រធានគណៈកម្មការទី៣ លោក ហ៊ុន ណេង ជាប្រធានគណៈកម្មការទី៤ លោក ឈាង វុន ជាប្រធានគណៈកម្មការទី៥ លោក ប៉ែន បញ្ញា ជាប្រធានគណៈកម្មការទី៦ លោកស្រី ឡោក ខេង ជាប្រធានគណៈកម្មការទី៨ លោកស្រី ងិន សុផុន ជាប្រធានគណៈកម្មការទី៩ និងលោក ប៉ែន ស៊ីម៉ន ជាប្រធានគណៈកម្មការទី១០។
ចំណែក សមាសភាពថ្នាក់ដឹកនាំកំពូលនៃរដ្ឋសភា គឺលោក ហេង សំរិន នៅជាប្រធានរដ្ឋសភាដដែល លោក ងួន ញ៉ិល ជាអនុប្រធានទី១ រដ្ឋសភា និងលោកស្រី ឃួន សុដារី ជាអនុប្រធានទី២៕
