លោកនាយករដ្ឋមន្ត្រី ហ៊ុន សែន ថ្លែងថា ទេសរដ្ឋមន្ត្រី និងរដ្ឋមន្ត្រី ដែលជាសមាជិករដ្ឋាភិបាល ត្រូវលាលែងពីសមាជិករដ្ឋសភានៅក្នុងអាណត្តិទី៦នេះ ដោយថា បើចង់ធ្វើការងារក្នុងជួរដ្ឋាភិបាលឲ្យស្របតាមច្បាប់រដ្ឋធម្មនុញ្ញ។
ក្នុងកិច្ចប្រជុំដើម្បីរៀបចំក្បាលម៉ាស៊ីនដឹកនាំរដ្ឋសភា និងរាជរដ្ឋាភិបាល លោកនាយករដ្ឋមន្ត្រី ហ៊ុន សែន បានថ្លែងនាព្រឹកនេះថា ព្រះរាជក្រឹត្យព្រះមហាក្សត្រល្ងាចនេះ នឹងប្រកាសតែងតាំរដ្ឋមន្ត្រីប្រតិភូអមនាយករដ្ឋមន្ត្រី រដ្ឋលេខាធិការ និងអនុរដ្ឋលេខាធិការនៅតាមស្ថាប័ន ប៉ុន្តែ លោកថា ក្នុងករណីឃើញមានឈ្មោះក្នុងបញ្ជី មន្ត្រីទាំងនោះត្រូវដាក់ពាក្យលាសុំឈប់ពីតួនាទីសមាជិករដ្ឋសភា ដើម្បីឲ្យក្មេងៗជំនាន់ក្រោយជំនួសការងារនេះ ដោយថា មនុស្សម្នាក់មិនអាចកាន់តួនាទីជាសមាជិករដ្ឋសភា និងមន្ត្រីក្នុងជួររដ្ឋាភិបាលបានទេ។
លោកនាយករដ្ឋមន្ត្រី ហ៊ុន សែន
នៅព្រឹកថ្ងៃទី៦កញ្ញានេះ រដ្ឋសភាថ្មីបានបោះឆ្នោតផ្ដល់សេចក្ដីទុកចិត្តលើសមាសភាពរដ្ឋាភិបាលថ្មីសម្រាប់អាណត្តិទី៦ឆ្នាំ២០១៨ ក្នុងនោះ លោក ហ៊ុន សែន ត្រូវបានបោះឆ្នោតធ្វើជានាយករដ្ឋមន្ដ្រីបន្ដទៀត។
រីឯតំណែងជាឧបនាយករដ្ឋមន្ត្រី ត្រូវបានបង្កើនចំនួនដល់ ១០រូប ដោយបន្ថែមរដ្ឋមន្ត្រីការបរទេស លោក ប្រាក់ សុខុន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន និងរដ្ឋមន្ត្រីក្រសួងរៀបចំដែន លោក ជា សុផារ៉ា ផងដែរ ខណៈដែលសមាសភាពរដ្ឋមន្ដ្រីក៏នៅរក្សាដដែល គឺមានរដ្ឋមន្ដ្រីចំនួន ២៩រូប។
ដោយឡែក បុគ្គលមួយចំនួនត្រូវបានដំឡើងតំណែងជាទេសរដ្ឋមន្ដ្រី គឺមានលោក ប៉ុល សារឿន លោក គន់ គីម លោក មាស សុភា លោក យឹម ណុលឡា លោក ជិន ប៊ុនស៊ាន លោក ហូ សិទ្ធី លោក ឃុន ហាំង និងលោក អូស្មាន ហាស្សាន់ ជាដើម៕
