ឥណ្ឌា បានលុបចោលទាំងស្រុងនូវច្បាប់ដែលដាក់ទោសទណ្ឌលើអ្នកស្រលាញ់ភេទដូចគ្នាទាំងឡាយណាដែលរួមភេទដោយមិនមានការបង្ខិតបង្ខំ។
អគ្គលេខាធិការគណៈកម្មការអ្នកច្បាប់អន្តរជាតិ លោក Sam Zarifi បានសរសេរនៅលើបណ្ដាញ Twitter របស់លោក ថាតុលាការកំពូលឥណ្ឌានៅថ្ងៃនេះ បានចេញសម្រេចថាកថាខណ្ឌ «៣៧៧ ដែលដាក់ទោសអ្នកស្រលាញ់ភេទដូចគ្នាដែលរួមភេទជាមួយគ្នាតាមការព្រមព្រៀង»លែងមានទៀតហើយ។
តាមប្រភពដដែល តុលាការកំពូលឥណ្ឌាចេញសេចក្តីសម្រេចបែបនេះ ដោយសារតែហេតុផលថាកថាខណ្ឌ៣៧៧ នេះរំលោភរដ្ឋធម្មនុញ្ញឥណ្ឌា ក៏ដូចជាច្បាប់អន្តរជាតិផងដែរ។
នេះជាជោគជ័យមួយដ៏ធំសម្រាប់ក្រុមអ្នកស្រលាញ់ភេទដូចគ្នានៅឥណ្ឌាដែលបានតស៊ូមតិអស់រយៈពេលជាច្រើនឆ្នាំមកហើយដើម្បីឲ្យតុលាការប្រទេសនេះលុបចោលខណ្ឌ «៣៧៧» នេះ ។
កាលពីឆ្នាំ២០០៩កន្លងទៅ តុលាការថ្នាក់ក្រោមឥណ្ឌាធ្លាប់បាន លុបចោលច្បាប់នេះម្ដងរួចមកហើយ។ ប៉ុន្តែភ្លាមៗបន្ទាប់ពីមានការសម្រេចនេះ ក្រុមមេដឹកនាំសាសនាឥស្លាម ហិណ្ឌូ និង គ្រឹស្តសាសនា បានប្ដឹងជំទាស់។ រហូតដល់ឆ្នាំ២០១៣ តុលាការឥណ្ឌាបានសម្រេចឲ្យប្រើប្រាស់ច្បាប់នេះឡើងវិញ។
កថាខណ្ឌ «៣៧៧» នេះ ត្រូវបានចក្រភពអង់គ្លេសអនុម័តនៅឆ្នាំ១៨៦០ ហើយអង់គ្លេសក៏បាននាំយកច្បាប់នេះទៅប្រើក្នុងដែនដីអាណានិយមរបស់ខ្លួនចំនួន៤១ ដែលពេលនោះក៏មានឥណ្ឌាផងដែរ។ ចក្រភពអង់គ្លេស បានលុបចោលច្បាប់នេះនៅឆ្នាំ១៩៦៧ ប៉ុន្តែប្រទេសដែលធ្លាប់ស្ថិតក្រោមអាណានិគមរបស់ខ្លួនមួយចំនួននៅតែរក្សាច្បាប់នេះដដែល៕
