គណៈរដ្ឋមន្ដ្រីថ្មីនៅអាណត្តិទី៦នេះ ត្រូវបានរក្សាទុកនូវសមាសភាពក្បាលម៉ាស៊ីនដឹកនាំដដែល ប៉ុន្ដែ សមាសភាពមួយចំនួន ត្រូវបានដំឡើងតួនាទីខ្ពស់ជាងមុន។
នៅព្រឹកថ្ងៃទី៦កញ្ញានេះ រដ្ឋសភាថ្មីបានបោះឆ្នោតផ្ដល់សេចក្ដីទុកចិត្តលើសមាសភាពរដ្ឋាភិបាលថ្មីសម្រាប់អាណត្តិទី៦ឆ្នាំ២០១៨ ក្នុងនោះ លោក ហ៊ុន សែន ត្រូវបានបោះឆ្នោតធ្វើជានាយករដ្ឋមន្ដ្រីបន្ដទៀត។
រីឯតំណែងជាឧបនាយករដ្ឋមន្ត្រី ត្រូវបានបង្កើនចំនួនដល់ ១០រូប ដោយមានរដ្ឋមន្ត្រីការបរទេស លោក ប្រាក់ សុខុន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន និងរដ្ឋមន្ត្រីក្រសួងរៀបចំដែន លោក ជា សុផារ៉ា ផងដែរ ខណៈដែលសមាសភាពរដ្ឋមន្ដ្រីក៏នៅរក្សាដដែល គឺមានរដ្ឋមន្ដ្រីចំនួន ២៩រូប។
ដោយឡែក បុគ្គលមួយចំនួនត្រូវបានដំឡើងតំណែងជាទេសរដ្ឋមន្ដ្រី គឺមានលោក ប៉ុល សារឿន លោក គន់ គីម លោក មាស សុភា លោក យឹម ណុលឡា លោក ជិន ប៊ុនស៊ាន លោក ហូ សិទ្ធី លោក ឃុន ហាំង និងលោក អូស្មាន ហាស្សាន់។
ការបោះឆ្នោតផ្ដល់សេចក្ដីទុកចិត្តលើសមាសភាពគណៈរដ្ឋមន្ដ្រីថ្មីនេះ គឺបន្ទាប់ពីរដ្ឋសភាថ្មី ដែលសុទ្ធសឹងជាតំណាងរាស្ដ្រមកពីគណបក្សប្រជាជនកម្ពុជាបានបើកសម័យប្រជុំដំបូងរបស់ខ្លួនកាលពីម្សិលមិញ៕
