ក្បាលម៉ាស៊ីនដឹកនាំថ្មីបែបឯកបក្សរបស់គណបក្សប្រជាជនកម្ពុជា បានប្តេជ្ញាថា នឹងបន្តពង្រឹងយន្តការប្រជាធិបតេយ្យ ធ្វើកំណែទម្រង់រដ្ឋបាលសាធារណៈ ខណៈអតីតបក្សប្រឆាំងព្រមានពីហានិភ័យនៃរបបដឹកនាំមួយនេះ តាមរយៈសម្ពាធពីអន្តរជាតិ។
នៅថ្ងៃទី៦ ខែកញ្ញានេះ សមាជិករដ្ឋសភារបស់គណបក្សប្រជាជនកម្ពុជា បានបោះឆ្នោតកញ្ចប់ បង្កើតក្បាលម៉ាស៊ីនដឹកនាំរដ្ឋសភា និងរដ្ឋាភិបាលថ្មី សម្រាប់នីតិកាលទី៦នេះ។
លោក ហេង សំរិន ត្រូវបានជ្រើសតាំងជាប្រធានរដ្ឋសភាដដែល និងអមដោយលោក ងួន ញិល ជាអនុប្រធានទី១ និងអនុប្រធានថ្មីម្នាក់ គឺលោកស្រី ឃួន សុដារី ខណៈដែលលោក ហ៊ុន សែន ត្រូវបានជ្រើសតាំងជានាយករដ្ឋមន្ត្រីដដែល។
នៅចំពោះមុខសមាជិកសភាដទៃទៀត លោក ហេង សំរិន បានប្តេជ្ញាថា ស្ថាប័នច្បាប់មួយនេះ នឹងបន្តលើកកម្ពស់លទ្ធិប្រជាធិបតេយ្យ ធានាដល់ការពង្រឹងនីតិរដ្ឋ តបតាមស្មារតីរដ្ឋធម្មនុញ្ញ។
ប្រធានរដ្ឋសភា លោក ហេង សំរិន
លោក ហ៊ុន សែន បានថ្លែងនៅក្នុងរដ្ឋសភាថា នឹងធ្វើកំណែទម្រង់រដ្ឋបាលសាធារណៈ អភិបាលកិច្ច លើកកម្ពស់ជីវភាពពលរដ្ឋ ពង្រឹងសេវាគាំពារសង្គម ពង្រីកហេដ្ឋារចនាសម្ព័ន្ធ ដំឡើងប្រាក់ឈ្នួលកម្មករ មន្ត្រីរាជការ ពង្រីកវិស័យវិនិយោគ ពង្រឹងសណ្តាប់ធ្លាប់សង្គម ការពារសន្តិភាព និងបូរណភាពទឹកដី ជាដើម។
លោកនាយករដ្ឋមន្ត្រី ហ៊ុន សែន
ព្រះមហាក្សត្រសម្ដេចព្រះ នរោត្តម សីហមុនី ក្នុងពិធីបើកសម័យប្រជុំដំបូងនៃរដ្ឋសភាកាលពីថ្ងៃពុធម្សិលមិញ បានក្រើនរំឭកពីសារៈសំខាន់នៃការបង្រួមជាតិ និងការពង្រឹងនីតិរដ្ឋនេះដែរ។
ព្រះមហាក្សត្រ នរោត្ដម សីហមុនី
អ្នកនាំពាក្យសមាគមអាដហុកការពារសិទ្ធិមនុស្ស លោក ស៊ឹង សែនករុណា បង្ហាញនូវការយល់ឃើញរបស់លោកថា លោកហាក់គ្មានជំនឿថា ក្បាលម៉ាស៊ីនដឹកនាំថ្មីនេះ អាចពង្រឹងនីតិរដ្ឋបានទេ ដោយថា ប្រព័ន្ធដឹកនាំបែបនេះ គ្មានតុល្យភាពអំណាច និងគ្មានការប្រកួតប្រជែង។
អ្នកនាំពាក្យសមាគមអាដហុកការពារសិទ្ធិមនុស្ស លោក ស៊ឹង សែនករុណា
យ៉ាងនេះក្តី អតីតបក្សប្រឆាំង ចាត់ទុកក្បាលម៉ាស៊ីនដឹកនាំថ្មីនេះថា មិនឆ្លុះបញ្ចាំងពីឆន្ទៈប្រជាពលរដ្ឋពិតប្រាកដនោះទេ និងបានព្រមានថា សភាឯកបក្សនេះនឹងទទួលរងទណ្ឌកម្មពីសហគមន៍អន្តរជាតិ។
ក្រោយការបោះឆ្នោត សហរដ្ឋអាមេរិក និងសហភាពអឺរ៉ុប បាននាំមុខគេប្រកាសមិនទទួលស្គាល់លទ្ធផលបោះឆ្នោត ដែលគ្មានបក្សប្រឆាំងចូលរួមប្រកួតនេះទេ ថែមទាំងជំរុញឲ្យបក្សកាន់អំណាចស្វែងរកដំស្រាយនយោបាយ ជាមួយអតីតបក្សប្រឆាំងឡើងវិញ ដើម្បីធានាដល់ដំណើរការប្រជាធិបតេយ្យនៅកម្ពុជា។
នៅថ្ងៃចន្ទម្សិលមិញនេះដែរ ប្រទេសលោកសេរីធំៗចំនួន៩ មិនបានបញ្ជូនមន្ត្រីការទូតរបស់ខ្លួន ឲ្យទៅចូលសង្កេតការណ៍នៃកិច្ចប្រជុំសភាដំបូងរបស់កម្ពុនៅអាណត្តិថ្មីនេះឡើយ ទោះបីរដ្ឋសភាកម្ពុជាបានចេញលិខិតអញ្ចើញជាផ្លូវការក៏ដោយ៕
