អគ្គស្នងការនគរបាលជាតិ បានសម្រេចចាត់តាំងមន្ត្រីនគរបាលជាន់ខ្ពស់ជាង ១០រូបបន្ថែមទៀត ឲ្យទៅជួយពង្រឹងសន្តិសុខ និងសណ្តាប់ធ្លាប់នៅខេត្តព្រះសីហនុ ខណៈដែលខេត្តនេះប្រឈមមុខនឹងកំណើនឧក្រិដ្ឋកម្មបង្កឡើងដោយជនជាតិចិននៅក្នុងឆ្នាំនេះ។
ក្នុងលិខិតបង្គាប់ការចុះថ្ងៃទី៣១ ខែសីហា ដែលវីអូឌីទើបទទួលបានថ្ងៃនេះ អគ្គស្នងការនគរបាលជាតិ លោក នេត សាវឿន បានចាត់តាំងក្រុមការងារមន្រ្តីនគរបាលជាតិចំនួន ១១នាក់ ដឹកនាំដោយអគ្គស្នងការរងនគរបាលជាតិ លោក ថោង លឹម ដើម្បីចុះពង្រឹងការងារសន្តិសុខសណ្តាប់ធ្នាប់ និងរៀបចំសង្គម ក្នុងខេត្តព្រះសីហនុ។
វីអូឌីបានស្វែងរកការបកស្រាយបន្ថែមពីលោក ថោង លឹម នៅថ្ងៃនេះ ប៉ុន្តែ លោកពុំបានទទួលទូរស័ព្ទនោះឡើយ។
កន្លងមកមានសារព័ត៌មាន និងបណ្តាញសង្គម បានចុះផ្សាយជាបន្តបន្ទាប់អំពីបញ្ហាជនជាតិចិនរស់នៅក្នុងខេត្តព្រះសីហនុ ដោយថា ជនជាតិចិនទាំងនោះបានបង្កបញ្ហាជាច្រើនដូចជា ជួញដូរ និងចាក់ចាយគ្រឿងញៀន ការបង្កអំពើហិង្សា បង្កគ្រោះថ្នាក់ចរាចរណ៍ ការជួញដូរផ្លូវភេទ និងបង្កការរំខានផ្សេងៗទៀតដោយមិនគោរពច្បាប់កម្ពុជានោះទេ។
ស្នងការនគរបាលខេត្តព្រះសីហនុ លោក ជួន ណារិន បានប្រាប់វីអូឌីតាមទូរស័ព្ទថា ករណីអគ្គស្នងការនគរបាលជាតិបញ្ជូនក្រុមការងារទៅជួយពង្រឹងសន្តិសុខសណ្តាប់ធ្លាប់នៅខេត្តព្រះសីហនុនេះ មិនមែនដោយសារខេត្តនោះមានឧក្រិដ្ឋកម្មបង្កឡើងដោយជនជាតិចិនច្រើននោះទេ។
លោកបន្តថា រយៈពេល ៨ខែឆ្នាំ២០១៨នេះ មានបទល្មើសដែលបង្កឡើងដោយជនបរទេស និងខ្មែរប្រហែលជិត ១០០ករណីប៉ុណ្ណោះ ហើយលោករំពឹងថា ក្រុមការងារដែលអគ្គស្នងការនគរបាលជាតិបញ្ជូនមកនេះ នឹងជួយទប់ស្កាត់បទល្មើសទាំង នោះបានកើនតែប្រសើរថែមទៀត។
ស្នងការនគរបាលខេត្តព្រះសីហនុ លោក ជួន ណារិន
មន្ដ្រីសម្របសម្រួលសមាគមការពារសិទ្ធិមនុស្សអាដហុកប្រចាំខេត្តព្រះសីហនុ អ្នកស្រី ជាប សុធារី មានប្រសាសន៍ថា កន្លងមក ជនជាតិចិនពិតជាបានបង្កបញ្ហាទាំងនោះមែន រួមទាំងដណ្តើមមុខរបរ និងបង្កការរំខានដល់ពលរដ្ឋខ្មែរដែលរស់នៅក្នុងខេត្តជាប់សមុទ្រមួយនេះផងដែរ។
អ្នកស្រីសំណូមពរទៅអាជ្ញាធរ ឲ្យពង្រឹងសន្តិសុខសណ្តាប់ធ្នាប់បន្ថែមទៀត ដោយចាត់វិធានការតឹងរឹង ទាន់ពេលវេលា និងកុំឲ្យមានអំពើពុករលួយ ទៅលើជនជាតិចិន ដែលបង្កបទល្មើសព្រហ្មទណ្ឌ។
មន្ដ្រីសម្របសម្រួលសមាគមការពារសិទ្ធិមនុស្សអាដហុកប្រចាំខេត្តព្រះសីហនុ អ្នកស្រី ជាប សុធារី
ស្នងការនគរបាលខេត្តព្រះសីហនុ លោក ជួន ណារិន ប្រាប់សារព័ត៌មានកាលពីខែកក្តដាថា បច្ចុប្បន្នជនជាតិចិនដែលមករស់នៅខេត្តព្រះសីហនុរយៈពេលវែង និងខ្លីមានប្រហែល ៤ម៉ឺននាក់ ក្នុងនោះមានអ្នកវិនិយោគប្រមាណ ២ម៉ឺននាក់៕