អង្គការមួយធ្វើការផ្នែកសិទ្ធិមនុស្ស និងសិទ្ធិលំនៅឋាន បានជំរុញទៅរដ្ឋាភិបាលឲ្យពន្លឿនផ្តល់ប័ណ្ណកម្មសិទ្ធិដីធ្លីដល់សហគមន៍ ក្រីក្រក្នុងរាជធានីភ្នំពេញ ខណៈខ្លួនរកឃើញថា សហគមន៍ក្រីក្រជិត ៣០០កន្លែង កំពុងប្រឈមនឹងការបណ្តេញចេញដោយសារការតាំងលំឋានរបស់សហគមន៍ទាំងនោះពុំទាន់មានប័ណ្ណកម្មសិទ្ធិត្រឹមត្រូវ។
សមាគមធាងត្នោត បានធ្វើការស្ទង់មតិមួយកាលឆ្នាំ២០១៧ ដែលចេញផ្សាយនៅថ្ងៃនេះ បានរកឃើញថា សហគមន៍ក្រីក្រ២៧៧កន្លែង បានកំពុងប្រឈមនឹងបញ្ហាជាច្រើន។
របាយការណ៍នោះបញ្ជាក់ថា ៨៣ភាគរយនៃការតាំងលំនៅឋានរបស់សហគមន៍ទាំងនោះ គឺពុំមានប័ណ្ណកម្មកសិទ្ធិដីធ្លីទេ និង៧៥ភាគរយនៃសហគមន៍នោះ ក៏មិនត្រូវបានចុះបញ្ជីដីធ្លីជាប្រព័ន្ធដែរ ហើយ ៧៩ភាគរយនៃការតាំងលំនៅឋានរបស់សហគមន៍ក្រីក្រទាំងនោះ ពុំមានឯកសារលាយលក្ខណ៍ជាអក្សរដើម្បីកំណត់ស្ថានភាពដី និងសិទ្ធិកាន់កាប់ដីនោះដែរ ដែលធ្វើឲ្យពួកគេងាយរងគ្រោះ និងប្រឈមការបណ្តេញចេញ ឬ ផ្លាស់ប្តូរលំនៅឋាន។
របាយការណ៍នេះ ឲ្យដឹងទៀតថា ស្ទើតែពាក់កណ្តាលនៃការតាំងទីលំនៅរបស់សហគមន៍ក្រីក្រទាំងនោះ គឺពុំមានហេដ្ឋានរចនាសម័ន្ធគ្រប់គ្រាន់ ដោយខ្វះសេវាកម្មមូលដ្ឋានដូចជាប្រព័ន្ធទឹកស្អាត ប្រព័ន្ធបង្ហូរទឹកស្អុយ ការប្រមូលសំរាម និងអគ្គីសនីជាដើម។
សមាគមដែលធ្វើការជំរុញការគោរពសិទ្ធិ និងសិទ្ធិលំនៅឋានមួយនេះ លើកឡើងថា ដើម្បីអភិវឌ្ឍន៍ទីក្រុងប្រកបដោយការទទួលខុសត្រូវ រដ្ឋាភិបាលត្រូវតែកែលម្អបញ្ហាឡើងវិញ ដោយស្នើទៅសាលារាជធានីភ្នំពេញត្រូវកសាងហេដ្ឋារចនាសម័្ពន្ធ និងត្រូវផ្តល់សេវាកម្មឲ្យកាន់តែប្រើសើរ ដូចជាកសាងប្រព័ន្ធលូបង្ហូរទឹក ការប្រមូលសំរាម រួមទាំងភ្ជាប់បណ្តាញប្រព័ន្ធទឹកស្អាត់ជូនពលរដ្ឋសហគមន៍ក្រីក្រទាំងនោះផងដែរ។
សមាគមធាងត្នោតក៏ស្នើរទៅក្រសួងរៀបចំដែនដី នគររូបនីយកម្ម និងសំណង់ត្រូវធ្វើការងារដោយតម្លាភាព និងត្រូវចុះបញ្ជីដីធ្លីមានលក្ខណៈជាប្រព័ន្ធ និងចេញប័ណ្ណកម្មសិទ្ធិជូនពលរដ្ឋសហគមន៍ក្រីក្រទាំងនោះ៕