នាយករដ្ឋមន្រ្តីវៀតណាម បានណែនាំឲ្យមន្ត្រីក្រោមឱវាទនិងភាគីពាក់ព័ន្ធនានាធ្វើកំណែទម្រង់និងកាត់បន្ថយរនាំងនានាដើម្បីឲ្យការនាំចេញផលិតផលរបស់់ខ្លួនទៅកាន់ទៅផ្សារអន្តរជាតិមានការកើនឡើងថែមទៀត។
ការណែនាំនេះជាផ្នែកមួយនៃសេចក្តីចង្អុលបង្ហាញជាផ្លូវការរបស់ លោក ង្វៀន សួនហ្វុក (Nguyen Xuan Phuc) នាយករដ្ឋមន្រ្តីវៀតណាម ដែលនិយាយពីកិច្ចការនិងដំណោះស្រាយដើម្បីអភិវឌ្ឍន៍និងលើកកម្ពស់ការនាំចេញផលិតផល។ នេះបើតាមការចុះផ្សាយរបស់សារព័ត៌មានវៀតណាមញូវ។
នាយករដ្ឋមន្រ្តីវៀតណាមរូបនេះ ក៏បានស្នើឲ្យរដ្ឋមន្រ្តីនិងស្ថាប័ននានាដែលធ្វើការពាក់ព័ន្ធនឹងការផលិតនិងការនាំចេញធ្វើការសិក្សាឡើងវិញពីបទបញ្ញត្តិផ្សេងៗទាក់ទងនឹងផលិតកម្ម និងការនាំចូលវត្ថុធាតុដើម ដើម្បីបង្កើនភាពងាយស្រួលដល់សហគ្រាសក្នុងការផលិត។ បន្ថែមលើនេះលោក ង្វៀន សួនហ្វុក ក៏ប្រាប់ដល់មន្រ្តីរបស់ខ្លួនផ្សព្វផ្សាយឲ្យបានទូលំទូលាយពីព័ត៌មានទាក់ទងនឹងការនាំចេញផងដែរ។
បញ្ហាមួយចំនួនដែលធ្វើឲ្យការនាំចេញរបស់វៀតណាមប្រឈមនៅពេលនេះមានដូចជាការផ្លាស់ប្តូរគោលនយោបាយនាំចូលរបស់ប្រទេសនានាដែលវៀតណាមត្រូវនាំទំនិញខ្លួនទៅលក់ រនាំងបច្ចេកទេស ហានិភ័យក្នុងការទូទាត់ប្រាក់ និងការឃោសនាអវិជ្ជមានទាក់ទងនឹងការនាំចេញផលិតផលវៀតណាម។ តាមវៀតណាមញូវ ក្រសួងឧស្សាហកម្មនិងពាណិជ្ជកម្ម នឹងធ្វើការសិក្សានិងដោះស្រាយបញ្ហាទាំងនេះ។
លោក ង្វៀន សួនហ្វុក ក៏បានសង្កត់ធ្ងន់ពីការធ្វើកំណែទម្រង់ក្នុងវិស័យកសិកម្មផងដែរដើម្បីឲ្យការនាំចេញផលិតផលនេះមានការកើនឡើងជាងមុន។ លោកបានលើកឡើងថាក្រសួងនិងស្ថាប័ននីមួយៗត្រូវធ្វើឲ្យមានភាពប្រសើរឡើងនូវគុណភាពផលិតផលកសិកម្មដែលបំពេញតាមលក្ខណ្ឌសុវត្ថិភាពម្ហូបអាហារ។ លោកបន្ថែមថាក្រសួងនិងស្ថាប័នក៏ត្រូវតែយកចិត្តទុកដាក់ក្នុងការស្វែងរកដំណោះស្រាយនិងកាត់បន្ថយឧបសគ្គនានា ដើម្បីបង្កើនការនាំចេញ ផលិតផលកសិកម្មនិងម្ហូបអាហាររបស់វៀតណាមមានដូចជាគ្រឿងសមុទ្រ បន្លែ កាហ្វេ ស្វាយចន្ទី ម្រេច អង្ករ និងដំឡូងមីជាដើម។
តាម លោក ង្វៀន សួនហ្វុក ផលិតសំខាន់ៗដែលវៀតណាមនាំចេញភាគច្រើនជាផលិតវាយនភណ្ឌ ម្ហូបអាហារ និងផ្លែឈើ។
កាលពីឆ្នាំ២០១៧កន្លងទៅការនាំចេញរបស់វៀតណាមមានទំហំជាទឹកប្រាក់ជាង២០០ពាន់លានដុល្លាដែលកើនឡើងជាង២១ភាគរយបើប្រៀបធៀបទៅនឹងការនាំចេញក្នុងឆ្នាំ២០១៦៕
