អ្នកវិភាគនិងអ្នកឃ្លាំមើលបញ្ហាសង្គមលើកឡើងថា រដ្ឋាភិបាលបង្កើត«ឧត្តមក្រុមប្រឹក្សាពិគ្រោះ និងផ្តល់យោបល់» ធ្វើឲ្យការចាយវាយថវិកាជាតិមិនមានប្រសិទ្ធិភាព។
អ្នកស្រាវជ្រាវពីការអភិវឌ្ឍន៍សង្គម លោក មាស នី មានប្រសាសន៍ថា រដ្ឋាភិបាលបង្កើត«ឧត្តមក្រុមប្រឹក្សាពិគ្រោះ និងផ្តល់យោបល់» នេះ គ្រាន់តែធ្វើដើម្បីលំអប្រជាធិបតេយ្យតែប៉ុណ្ណោះ ពោលរដ្ឋាភិបាលទំនងជាមិនទទួលយកអនុសាសន៍ឬមតិយោបល់ពីគណបក្សដែលមិនឈ្នះឆ្នោតនោះទេ។ ករណីនេះលោកថា នឹងធ្វើឲ្យការចាយវាយថវិកាជាតិមិនមានប្រសិទ្ធិភាពទៅវិញ។
អ្នកស្រាវជ្រាវពីការអភិវឌ្ឍន៍សង្គម លោក មាស នី
អ្នកវិភាគនយោបាយ លោក ឯម សុវណ្ណារ៉ា លើកឡើងថា ការបង្កើត «ឧត្តមក្រុមប្រឹក្សាពិគ្រោះ និងផ្តល់យោបល់» ហើយរដ្ឋាភិបាលមិនទទួលយកមតិរិះគន់ចំណុចខ្វះខាតរបស់ខ្លួន និងមន្ត្រីក្រោមឱវាទទេ នឹងធ្វើឲ្យប៉ះពាល់ដល់មុខមាត់រដ្ឋាភិបាល។
អ្នកវិភាគនយោបាយ លោក ឯម សុវណ្ណារ៉ា
អ្វីដែលគួឲ្យកត់សំគាល់អ្នកវិភាគរូបនោះ ផ្តល់ជាអនុសាសន៍ថា ដំណាក់កាលនេះ រដ្ឋាភិបាលគួរតែ ងាកទៅប្រើប្រាស់ធនធានដែលមានស្រាប់ក្នុងស្ថាប័នរដ្ឋ និងស្ថាប័នរាជ្យបណ្ឌិតសភា ប្រសើរជាងបង្កើត «ឧត្តមក្រុមប្រឹក្សាពិគ្រោះ និងផ្តល់យោបល់» ដោយថា អ្នកនយោបាយចាញ់ឆ្នោតទាំងនោះ សមត្ថភាពនៅមានកម្រិតនៅឡើយ។
ប្រធានគណបក្សយុវជនកម្ពុជា លោក ពេជ្យ ស្រស់ បានចាត់ទុកការវិភាគនោះថា ធ្វើឡើងដោយមិនមានហេតុផលគ្រប់ជ្រុងជ្រោយ ខណៈគណបក្សក្រៅរដ្ឋាភិបាលមិនទាន់អនុវត្តការងាររបស់ខ្លួននៅឡើយ។
ប្រធានគណបក្សយុវជនកម្ពុជា លោក ពេជ្យ ស្រស់
ប្រធានគណបក្សឆន្ទៈខ្មែរលោក គង់ ម៉ូនីកា បង្ហាញជំនឿថា រដ្ឋាភិបាលនិងទទួលយកមតិយោបល់ពី បណ្តុំគណបក្សទាំង១៦ នោះ ដោយថាដើម្បីធ្វើឲ្យកម្ពុជានឹងកាន់តែរីកចំរើនទៅមុខ។
ប្រធានគណបក្សឆន្ទៈខ្មែរលោក គង់ ម៉ូនីកា
អ្នកនាំពាក្យគណបក្សប្រជាជនកម្ពុជា លោក សុខ ឥសាន មិនចាប់អារម្មណ៍នឹងការលើកឡើងរបស់អ្នកវិភាគនោះទេ ដោយថាជាសិទ្ធិសេរីភាពបញ្ចេញមតិរបស់បុគ្គល។ ប៉ុន្តែលោកថា ការបង្កើត«ឧត្តមក្រុមប្រឹក្សាពិគ្រោះ និងផ្តល់យោបល់» នេះនឹងជួយរួមចំណែកដោះស្រាយបញ្ហាភាពអសកម្មរបស់មន្ត្រីរដ្ឋាភិបាលមួយចំនួន។
អ្នកនាំពាក្យគណបក្សប្រជាជនកម្ពុជា លោក សុខ ឥសាន
អ្នកនាំពាក្យបក្សកាន់អំណាចរូបនោះ អះអាងថា ទេសរដ្ឋមន្ត្រី និងរដ្ឋមន្ត្រីកន្លងមកទទួលបានប្រាក់ខែចន្លោះពីជាង១លានរៀល និងជាង២លានរៀលក្នុងមួយខែ។
លោកនាយករដ្ឋមន្ត្រីហ៊ុន សែន បានបើកកិច្ចប្រជុំមួយនៅវិមានសន្តិភាពកាលពីថ្ងៃទី២១ ខែសីហា ជា មួយមេដឹកនាំគណបក្សចំនួន១៦ ដើម្បីពិភាក្សាបង្កើត «ឧត្តមក្រុមប្រឹក្សាពិគ្រោះ និងផ្តល់យោបល់» ជួយរិះគន់ចំណុចខ្វះខាតរបស់រដ្ឋាភិបាល ដើម្បីធ្វើឲ្យប្រទេសជាតិរីកចំរើន។
កាលពីម្សិលមិញព្រះមហាក្សត្រកម្ពុជា សម្ដេចព្រះ នរោត្ដម សីហមុនី បានចេញព្រះរាជក្រឹត្យតែងតាំងមេដឹកនាំគណបក្សនយោបាយចំនួន១៥ដែលមិនទទួលបានអាសនៈក្នុងការបោះឆ្នោតកាលពីខែកក្កដាទៅក្នុងសមាសភាពឧត្ដមក្រុមប្រឹក្សាពិគ្រោះ និងផ្ដល់យោបល់ដែលមានឋានៈស្មើនឹងរដ្ឋមន្រ្តីរហូតដល់ទេសរដ្ឋមន្ត្រី៕
