លោកនាយករដ្ឋមន្ត្រី ហ៊ុន សែន ទម្លាយថាការរក្សាទុកតំណែងរដ្ឋមន្ត្រីឲ្យនៅកាន់ក្រសួងដដែលសម្រាប់អាណត្តិថ្មីនេះថា ជាយុទ្ធសាស្ត្រឈ្នះៗក្នុងទិសដៅធ្វើកំណែទម្រង់។
តាមបញ្ជីរាយនាមនិងតួនាទីមន្ត្រីរដ្ឋាភិបាល សម្រាប់អាណត្តិថ្មី ត្រវបានផ្សព្វផ្សាយជាសាធារណៈកាលពីថ្ងៃព្រហស្បតិ៍ម្សិលមិញ ក្រោយពីរដ្ឋាភិបាលនីតិកាលទី៦នេះ ត្រូវបានបង្កើតឡើង រដ្ឋមន្ត្រីទាំង២៨ក្រសួងមិនត្រូវបានផ្លាស់ប្តូរទេ។ ករណីនេះជំរុញឲ្យអ្នកតាមដានខ្លះធ្វើការវិភាគថា ការប្តេជ្ញាចិត្តធ្វើកំណែទម្រង់របស់រដ្ឋាភិបាលនៅអាណត្តិថ្មីនេះ អាចនឹងមិនទទួលបានជោគជ័យ ដោយថាព្រោះប្រព័ន្ធដឹកនាំជាមនុស្សដដែលៗ។
ប៉ុន្តែក្នុងកិច្ចប្រជុំគណៈរដ្ឋមន្ត្រីដំបូង ថ្ងៃទី៧ ខែកញ្ញានេះ លោក ហ៊ុន សែន ថ្លែងថាការធ្វើកំណែទម្រង់មិនចំាបាច់ប្តូរមនុស្សទេឲ្យតែមន្ត្រីចាស់ៗទាំងនោះចេះធ្វើឲ្យការឲ្យមានប្រសិទ្ធិភាពជាងមុន។ លោក ហ៊ុន សែន អះអាងទៀតថា ការធ្វើកំណែទម្រង់ដោយផ្តោតតែលើការដោះដូរមន្ត្រី លោកថាជានយោបាយអត្តឃាត។
លោកនាយករដ្ឋមន្ត្រី ហ៊ុន សែន
មេដឹកនាំរូបនេះ រំឭកទៀតថា ការឈ្នះឆ្នោតកើតចេញពីការខំប្រឹងប្រែងរបស់សមាជិក ហើយថាបើពេលឈ្នះឆ្នោត មេបក្សបែរជាទាត់មន្ត្រី ឬសកម្មជនរបស់ខ្លួនចោល របបដឹកនាំនោះនឹងទទួលបរាជ័យ។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ និយាយថា ប្រសិទ្ធិភាពនៃការធ្វើកំណែទម្រង់សង្គម ត្រូវផ្តោតលើធនធានមនុស្ស ឆន្ទៈនៃការកួតប្រជែងប្រកបដោយមនសិការជាតិ មិនផ្តោតសំខាន់លើអតីភាពនៃការធ្វើនយោបាយទេ។
លោក សន ជ័យ ថា បើមន្ត្រីប្រសូត្រចេញពីក្រុមអ្នកនយោបាយណាមួយ លោកថាមន្ត្រីនោះ នឹងរកផលប្រយោជន៍ឲ្យបក្សនយោបាយវិញ ច្រើនជាងយកចិត្តម្ចាស់ឆ្នោត។ បើតាមមន្ត្រីសង្គមស៊ីវិលរូបនេះ ដើម្បីធានាសេវាការគាំពារសង្គម និងលើកកម្ពស់ជីវភាពពលរដ្ឋ ត្រូវធ្វើកំណែទម្រង់ក្រសួងសុខាភិបាល និងក្រសួងកសិកម្មកម្មមុនគេ។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ
ក្រៅពីរដ្ឋមន្រ្តីនៅតាមក្រសួងនីមួួយៗ រដ្ឋាភិបាលក៏មានរដ្ឋមន្រ្តីប្រតិភូអមនាយករដ្ឋមន្ត្រី ចំនួនសរុប១៩រូបផ្សេងទៀតផងដែរ។ ដោយឡែកប្រធាននិងអនុប្រធានគណបក្សនយោបាយជាង ១០ ដែលបានចូលរួមប្រកួតការបោះឆ្នោត តែមិនឈ្នះឆ្នោត ក៏ត្រូវតែងតាំងជារដ្ឋមន្ត្រី ឬជាទេសរដ្ឋមន្ត្រីផងដែរក្នុងអាណត្តិនេះ៕
