អ្នករាយការណ៍ពិសេសអង្គការសហប្រជាជាតិទទួលបន្ទុកបញ្ហាសិទ្ធិមនុស្សកម្ពុជា លោកស្រី រ៉ូណា ស្មីត បានដាក់របាយការណ៍បន្ថែមមួយទៀតស្ដីអំពីបញ្ហាសិទ្ធិមនុស្ស និងការបោះឆ្នោតនៅកម្ពុជា ជូនទៅក្រុមប្រឹក្សាសិទ្ធិមនុស្សអង្គការសហប្រជាជាតិ ដែលគ្រោងប្រជុំនៅខែកញ្ញានេះ។
ឯកសារដែលត្រូវបានរក្សាទុកនៅលើប្រព័ន្ធឯកសារផ្លូវការរបស់អង្គការសហប្រជាជាតិ បានឲ្យដឹងថា លោកស្រី រ៉ូណា ស្មីត បានបញ្ជូនរបាយការណ៍បន្ថែមកម្រាស់ ២២ទំព័រ ដែលនិយាយអំពីបញ្ហាសិទ្ធិមនុស្ស និងលទ្ធិប្រជាធិបតេយ្យនៅកម្ពុជា ទៅក្រុមប្រឹក្សាសិទ្ធិមនុស្សអង្គការសហប្រជាជាតិកាលពីថ្ងៃទី៧ ខែកញ្ញានេះ។ របាយការណ៍បន្ថែមនោះ បានផ្ដោតសំខាន់ទៅលើស្ថានភាពនៅមុន អំឡុងពេល និងក្រោយរបោះឆ្នោតនៅកម្ពុជាកាលពីចុងខែកក្កដាកន្លងមក។
របាយការណ៍ជាភាសាអង់គ្លេសនេះ នឹងស្ថិតនៅលើរបៀបវារៈទី១០ នៃកិច្ចប្រជុំក្រុមប្រឹក្សាសិទ្ធិមនុស្សអង្គការសហប្រជាជាតិលើកទី៣៩ ដែលនឹងត្រូវរៀបចំធ្វើឡើងចាប់ពីថ្ងៃទី១០ ដល់ថ្ងៃទី២៨ ខែកញ្ញានេះ។
ក្នុងរបាយការណ៍បន្ថែមនោះ លោកស្រី រ៉ូណា ស្មីត រកឃើញថា ការបោះឆ្នោតជ្រើសតាំងតំណាងរាស្ដ្រនីតិកាលទី៦ កាលពីថ្ងៃទី២៩កក្កដាកន្លងទៅ គឺពោរពេញដោយរឹតត្បិត និងបង្ខិតបង្ខំពលរដ្ឋឲ្យចេញទៅបោះឆ្នោតនៅក្នុងខេត្តមួយចំនួន ការយាយីក្រុមអង្គការសង្គមស៊ីវិល ការគ្រប់គ្រងបណ្ដាញសារព័ត៌មាន និងការរារាំងអតីតគណបក្សប្រឆាំងដ៏ធំមួយមិនឲ្យចូលរួមប្រកួតប្រជែង ដោយថា ការបោះឆ្នោតបែបនេះ គឺគ្មានភាពសេរី ត្រឹមត្រូវ និងយុត្តិធម៌ឡើយ។
ទោះបីជារបាយការណ៍របស់ គ.ជ.ប. បានបង្ហាញថា ពលរដ្ឋប្រមាណ ៨៣ភាគរយបានចេញទៅបោះឆ្នោតក៏ដោយ ប៉ុន្ដែ លោកស្រីអះអាងថា ពលរដ្ឋកម្ពុជាបានទទួលរងការបំភិតបំភ័យ និងបង្ខំឲ្យចេញទៅបោះឆ្នោត ការគំរាមកំហែងពីសំណាក់អាជ្ញាធរ ការទិញសន្លឹកឆ្នោត និងចំណាត់ការផ្លូវច្បាប់ចំពោះអ្នកគាំទ្រ និងអតីតសមាជិកគណបក្សសង្គ្រោះជាតិ ដែលបានបង្ហោះរូបភាព «ម្រាមដៃស្អាត» សម្ដែងការមិនពេញចិត្តចំពោះការបោះឆ្នោតនេះ។
លោកស្រី រ៉ូណា ស្មីត លើកឡើងក្នុងរបាយការណ៍ថា ការអំពាវនាវឲ្យធ្វើពហិការចំពោះការបោះឆ្នោតដែលមិនមែនជាកាតព្វកិច្ចកំណត់ដោយច្បាប់នោះ គឺជាសិទ្ធិបញ្ចេញមតិដែលត្រូវបានធានាដោយច្បាប់សិទ្ធិមនុស្សអន្ដរជាតិ ខណៈអតីតគណបក្សប្រឆាំង ត្រូវបានផាត់ចេញពីការប្រកួតប្រជែងការបោះឆ្នោត។
លោកស្រីបន្ថែមក្នុងរបាយការណ៍ដដែលថា ចក្ខុវិស័យនៃកិច្ចព្រមព្រៀងសន្ដិភាពទីក្រុងប៉ារីស និងរដ្ឋធម្មនុញ្ញ មិនទាន់ត្រូវបានគោរពនោះទេ ដរាបណាសិទ្ធិសេរីភាពក្នុងការបញ្ចេញមតិត្រូវបានហាមឃាត់ គ្មានការបែងចែកអំណាចច្បាស់លាស់ និងគ្មានការផ្លាស់ប្ដូរអំណាចដោយសន្ដិវិធីតាមរយៈការបោះឆ្នោតនោះ។
ក្រោយការបោះឆ្នោតជ្រើសតាំងតំណាងរាស្ដ្រនីតិកាលទី៦ឆ្នាំ២០១៨ គណបក្សកាន់អំណាចរបស់លោកនាយករដ្ឋមន្ដ្រី ហ៊ុន សែន បានគ្រប់គ្រងអាសនៈទាំងអស់ ដែលនាំទៅរកបង្កើតសភាឯកបក្ស។
ប៉ុន្ដែ ក្រុមប្រទេសលោកសេរីមួយចំនួន ដូចជា សហរដ្ឋអាមេរិក សហគមន៍អឺរ៉ុប ចក្រភពអង់គ្លេស អូស្ដ្រាលីជាដើម បានរិះគន់ការបោះឆ្នោតនេះថា មិនអាចទទួលយកបាន ខណៈគ្មានវត្តមានអតីតបក្សប្រឆាំងចូលរួម៕
