មេដឹកនាំបក្សប្រឆាំង ត្រូវបានតុលាការកំហិតឲ្យនៅក្នុងគេហដ្ឋានរបស់ខ្លួន និងមិនអនុញ្ញាតឲ្យមានទំនាក់ទំនងជាមួយបុគ្គលខាងក្រៅនោះឡើយ បន្ទាប់ពីលោកត្រូវបានដោះលែងឲ្យនៅក្រៅឃុំបណ្ដោះអាសន្ន។
ក្នុងដីកាសម្រេចកាលពីថ្ងៃម្សិលមិញនេះ ប្រធានគណបក្សសង្គ្រោះជាតិ លោក កឹម សុខា ត្រូវបានតុលាការរាជធានីភ្នំពេញ សម្រេចដោះលែងឲ្យនៅក្រៅឃុំនៅម៉ោង ៣ទាបភ្លឺព្រឹកថ្ងៃទី១០កញ្ញានេះ ប៉ុន្តែ ត្រូវស្ថិតក្រោមវិធានការត្រួតពិនិត្យតាមផ្លូវតុលាការ។
ដីកាសម្រេចនោះ បានហាមឃាត់លោក កឹម សុខា មិនឲ្យចាកចេញពីលំនៅឋានដោយគ្មានការអនុញ្ញាតពីតុលាការ ត្រូវឆ្លើយតបចំពោះការកោះហៅពីគ្រប់បុគ្គលដែលចាត់តាំងដោយចៅក្រមស៊ើបសួរ មិនអាចទាក់ទងជាមួយថ្នាក់ដឹកនាំអតីតបក្សប្រឆាំង ជនបរទេស ឬបុគ្គលដែលពាក់ព័ន្ធនឹងសំណុំរឿង និងមិនអាចជួបជុំគ្នាក្នុងគោលដៅធ្វើសកម្មភាពនយោបាយណាមួយនោះឡើយ។
សាលាដំបូងរាជធានីភ្នំពេញ បានអះអាងក្នុងសេចក្ដីប្រកាសព័ត៌មាននៅថ្ងៃនេះថា ការដោះលែងមេដឹកនាំបក្សប្រឆាំងរូបនេះ ត្រូវបានធ្វើឡើងក្រោមហេតុផលសុខភាពជនជាប់ចោទ។
លោក កឹម សុខា អាយុ ៦៥ឆ្នាំ ត្រូវបានសមត្ថកិច្ចចាប់ដាក់ឃុំអស់រយៈពេលជាង ១ឆ្នាំមកហើយ ក្រោមការចោទប្រកាន់ពីរដ្ឋាភិបាលថា «ក្បត់ជាតិ» ដែលការចោទប្រកាន់នេះរងការថ្កោលទោសពីសហគមន៍អន្តរជាតិ៕
