អតីតប្រធានគណបក្សសង្គ្រោះជាតិ លោក សម រង្ស៊ី ដែលកំពុងរស់នៅនិរទេសខ្លួននៅក្រៅប្រទេស បានថ្លែងថា ការដោះលែងលោក កឹម សុខា ឲ្យនៅក្រៅឃុំនេះ គឺមិនទាន់គ្រប់គ្រាន់នៅឡើយទេ ក្នុងការស្រោចស្រង់លទ្ធិប្រជាធិបតេយ្យនៅកម្ពុជាឲ្យរស់ឡើងវិញ។
ក្នុងកិច្ចប្រជុំមួយនៅប្រទេសកាណាដានៅថ្ងៃនេះ លោក សម រង្ស៊ី ថ្លែងថា ទោះបីជាមានការដោះលែងអ្នកទោសជាបន្ដបន្ទាប់ក៏ដោយ ប៉ុន្ដែ លោកថា វាមិនទាន់អាចស្រោចស្រង់លទ្ធិប្រជាធិបតេយ្យនៅកម្ពុជាឲ្យរស់ឡើងវិញនោះទេ។
លោក សម រង្ស៊ី លើកឡើងថា ជំហានបន្ទាប់នោះ គឺរដ្ឋាភិបាលរបស់លោកនាយករដ្ឋមន្ដ្រី ហ៊ុន សែន ត្រូវអនុញ្ញាតឲ្យអតីតគណបក្សសង្គ្រោះជាតិ ដំណើរការជាប្រក្រតីឡើងវិញ អនុញ្ញាតឲ្យមន្ដ្រីអតីតបក្សប្រឆាំង ១១៨រូប មានសិទ្ធិធ្វើនយោបាយ និងទាមទារឲ្យមានការបោះឆ្នោតឡើងវិញ ដោយមានការចូលរួមពីអតីតបក្សប្រឆាំង និងការចូលរួមពីសហគមន៍អន្ដរជាតិ។
ក្នុងកិច្ចប្រជុំនោះ លោក សម រង្ស៊ី ថ្លែងថា៖
អតីតប្រធានគណបក្សសង្គ្រោះជាតិ លោក សម រង្ស៊ី
មេដឹកនាំអតីតគណបក្សសង្គ្រោះជាតិ លោក កឹម សុខា ត្រូវបានសាលាដំបូងរាជធានីភ្នំពេញសម្រេចដោះលែងឲ្យនៅក្រៅឃុំនៅវេលាម៉ោង ៣ទៀបភ្លឺថ្ងៃទី១០ ខែកញ្ញានេះ បន្ទាប់ពីលោកត្រូវបានឃុំខ្លួននៅពន្ធនាគារត្រពាំងផ្លុង ខេត្តត្បូងឃ្មុំ អស់រយៈជាង១ឆ្នាំ គិតចាប់ពីថ្ងៃចាប់ខ្លួនលោកកាលពីថ្ងៃទី៣ ខែកញ្ញាឆ្នាំមុន។
ការរំលាយគណបក្សសង្គ្រោះជាតិ និងការបន្ដឃុំខ្លួនលោក កឹម សុខា បានជំរុញឲ្យមានប្រតិកម្មរិះគន់ និងថ្កោលទោសជាបន្ដបន្ទាប់មកលើរដ្ឋាភិបាលរបស់លោក ហ៊ុន សែន ដូចជា ការរិះគន់ចំពោះបញ្ហាសិទ្ធិមនុស្ស ការធ្លាក់ចុះនៃលទ្ធិប្រជាធិបតេយ្យ និងនីតិរដ្ឋ ការគំរាមដាក់ទណ្ឌកម្មសេដ្ឋកិច្ច និងការព្រមានមិនទទួលស្គាល់រដ្ឋាភិបាលថ្មីកើតក្រោយការបោះឆ្នោត ដែលគ្មានវត្តមានអតីតគណបក្សសង្គ្រោះជាតិចូលរួម៕
