សាលាដំបូងរាជធានីភ្នំពេញ អះអាងថា ការដោះលែងលោក កឹម សុខា ឲ្យនៅក្រៅឃុំ គឺដោយសារបញ្ហាសុខភាពរបស់លោក ប៉ុន្ដែ ការដោះលែងនេះ គឺធ្វើឡើងតែ ៣ថ្ងៃប៉ុណ្ណោះ មុនសហភាអឺរ៉ុបគ្រោងបើកកិច្ចប្រជុំបន្ទាន់មួយនៅសប្ដាហ៍នេះ។
ក្នុងសេចក្ដីប្រកាសព័ត៌មាននៅថ្ងៃនេះ អ្នកនាំពាក្យសាលាដំបូងរាជធានីភ្នំពេញគូសបញ្ជាក់ថា មូលហេតុដែលតុលាការដោះលែងលោក កឹម សុខា ឲ្យនៅក្រៅឃុំនេះ គឺដោយសារបញ្ហាសុខភាពរបស់លោក និងមានការធានាថា លោក កឹម សុខា មិនអាចរត់គេចពីនីតិវិធីរបស់តុលាការឡើយ។
បើតាមសេចក្ដីប្រកាសព័ត៌មាន សាលាដំបូងរាជធានីភ្នំពេញ អះអាងទៀតថា ខ្លួននៅតែបន្ដនីតិវិធីស៊ើបសួរក្នុងសំណុំរឿង«ក្បត់ជាតិ» បើទោះបីជាលោក កឹម សុខា ត្រូវបានដោះលែងឲ្យនៅក្រៅឃុំក៏ដោយ។
បន្ថែមលើសពីនេះ តុលាការថា លោក កឹម សុខា នឹងដាក់ឲ្យស្ថិតក្រោមវិធានការត្រួតពិនិត្យតាមច្បាប់ និងភ្ជាប់កាតព្វកិច្ចមួយចំនួន ក្រោយការដោះលែង។
យ៉ាងណាក៏ដោយ ការដោះលែងមេដឹកនាំអតីតបក្សប្រឆាំងកំពុងជាប់ឃុំនេះ ត្រូវបានគេមើលឃើញថា ធ្វើឡើងនៅមុនកិច្ចប្រជុំមួយនៅសភាសហភាពអឺរ៉ុប ដែលគ្រោងប្រជុំសម្រេចពីបញ្ហាសិទ្ធិមនុស្ស និងការបន្ដឃុំខ្លួនលើលោក កឹម សុខា នាថ្ងៃទី១៣កញ្ញាខាងមុខនេះ។
ចំណែក អ្នករាយការណ៍ពិសេសអង្គការសហប្រជាជាតិទទួលបន្ទុកកិច្ចការសិទ្ធិមនុស្សប្រចាំកម្ពុជា លោកស្រី រ៉ូណា ស្មីត ក៏បានដាក់របាយការណ៍បន្ថែមមួយទៀត ដែលនិយាយពីការបោះឆ្នោត បញ្ហាសិទ្ធិមនុស្ស និងលទ្ធិប្រជាធិបតេយ្យ ដើម្បីដាក់ជូនទៅក្រុមប្រឹក្សាសិទ្ធិមនុស្សអង្គការសហប្រជាជាតិ កាលពីថ្ងៃទី៧ ខែកញ្ញានេះ។
របាយការណ៍របស់លោកស្រី រ៉ូណា ស្មីត នឹងស្ថិតនៅលើរបៀបវារៈទី១០ នៃកិច្ចប្រជុំក្រុមប្រឹក្សាសិទ្ធិមនុស្សអង្គការសហប្រជាជាតិលើកទី៣៩ ដែលនឹងធ្វើឡើងចាប់ពីថ្ងៃទី១០ ដល់ថ្ងៃទី២៨ ខែកញ្ញា។
ប្រធានអតីតគណបក្សសង្គ្រោះជាតិ លោក កឹម សុខា ត្រូវបានចាប់ដាក់ឃុំក្នុងពន្ធនាគារអស់រយៈជាង ១ឆ្នាំ ក្រោមការចោទប្រកាន់ពីសំណាក់រដ្ឋាភិបាលថា «ក្បត់ជាតិ» ពាក់ព័ន្ធនឹងការថ្លែងសារនយោបាយរបស់លោកនៅប្រទេសអូស្ដ្រាលី កាលពីឆ្នាំ២០១៣៕
