តុលាការបានសាកសួរសកម្មជនដីធ្លីនៅសហគមន៍បុរីកីឡាម្នាក់ពាក់ព័ន្ធនឹងការធ្វើយុទ្ធនាការថ្ងៃចន្ទពណ៌ខ្មៅ ដោយថា ការធ្វើយុទ្ធនាការអាវខ្មៅរបស់ពួកគេកន្លងមក គឺគណបក្សសង្គ្រោះជាតិជាអ្នកបំផុសឲ្យពួកគេធ្វើ។
សកម្មជនដីធ្លីសហគមន៍បុរីកីឡាអ្នកស្រី ស ស៊ន ប្រាប់វីអូឌីបន្ទាប់ពីចូលបំភ្លឺនៅតុលាការថា ចៅក្រមបានសួរអ្នកស្រីច្រើនពាក់ព័ន្ធនឹងការធ្វើយុទ្ធនាការថ្ងៃចន្ទពណ៌ខ្មៅ ដោយតុលាការថា គណបក្សសង្គ្រោះជាតិជាអ្នកនៅពីក្រោយនៃការធ្វើយុទ្ធនាការនេះ។ អ្នកស្រីបន្តថា ពួកគាត់ធ្វើយុទ្ធនាការទាមទារឲ្យដោះលែងមន្ត្រីការពារសិទ្ធិកន្លងមក មិនបានជាប់ពាក់ព័ន្ធជាមួយគណបក្សសង្គ្រោះជាតិនោះទេ ហើយក៏គ្មានអង្គការសង្គមស៊ីវិលដូចការចោទប្រកាន់របស់តុលាការនោះទេ ។
សកម្មជនដីធ្លីសហគមន៍បុរីកីឡាអ្នកស្រី ស ស៊ន
អ្នកនាំពាក្យសមាគមអាដហុក លោក ស៊ឹង សែនករុណា មានប្រសាសន៍ថា ប្រជាពលរដ្ឋទាមទារឲ្យដោះលែងមន្ត្រីសិទ្ធិមនុស្សកន្លងមក ដោយសារពួកគេយល់ឃើញថាការចាប់ខ្លួនអ្នកទាំងអស់នោះធ្វើឡើងដោយអយុត្តិធម៌ ។
អ្នកនាំពាក្យសមាគមអាដហុក លោក ស៊ឹង សែនករុណា
អ្នកស្រីស ស៊ន នៅព្រឹកនេះ បានចូលបំភ្លឺក្នុងសាលាដំបូងរាជធានីភ្នំពេញ ក្នុងនាមជាសាក្សីលើសំណុំរឿងដែលរដ្ឋាភិបាលចោទអតីតមេដឹកនាំគណបក្សសង្គ្រោះជាតិថា «ក្បត់ជាតិ»។ កាលពីម្សិលមិញ ប្រធានសមាគមសេដ្ឋកិច្ចក្រៅប្រព័ន្ធ លោកវន់ ពៅ ក៏បានចូលបំភ្លឺក្នុងនាមជាសាក្សីពាក់ព័ន្ធនឹងសំណុំរឿង លោកកឹម សុខា ដូចគ្នានេះដែរ៕
