អង្គការសហប្រជាជាតិ និងក្រុមអង្គការសិទ្ធិមនុស្សបានជំរុញទៅអាជ្ញាធរកម្ពុជាឲ្យទម្លាក់បទចោទទាំងអស់លើមេដឹកនាំអតីតបក្សប្រឆាំង លោក កឹម សុខា ដែលទើបចេញពីពន្ធនាគារ ប៉ុន្ដែត្រូវបានដាក់ឲ្យស្ថិតក្រោមវិធានការត្រួតពិនិត្យដោយហាមមិនឲ្យចេញពីផ្ទះ។
ក្នុងសុន្ទរកថាបើកសម័យប្រជុំលើកទី៣៩ នៅទីក្រុងហ្សុឺណែវ ប្រទេសស្វីស កាលពីថ្ងៃម្សិលមិញ ឧត្តមស្នងការអង្គការសហប្រជាជាតិទទួលបន្ទុកកិច្ចការសិទ្ធិមនុស្ស លោកស្រី Michelle Bachelet មានប្រសាសន៍ថា ការធ្លាក់ចុះនៃការគោរពសិទ្ធិពលរដ្ឋ និងសិទ្ធិនយោបាយ គឺជាការគំរាមកំហែងមួយដល់ការរីកចម្រើនផ្នែកសេដ្ឋកិច្ច និងសង្គមនៅក្នុងប្រទេសកម្ពុជា។
លោកស្រីក៏ស្វាគមន៍ចំពោះការដោះលែងអ្នកទោសនយោបាយមួយចំនួន និងការដោះលែងលោក កឹម សុខា ឲ្យនៅក្រៅឃុំកាលពីពេលថ្មីៗនេះ ប៉ុន្ដែ លោកស្រីក៏ស្នើឲ្យរដ្ឋាភិបាលទម្លាក់ការចោទប្រកាន់ទាំងស្រុងចំពោះរូបលោកផងដែរ។
ឧត្តមស្នងការអង្គការសហប្រជាជាតិទទួលបន្ទុកកិច្ចការសិទ្ធិមនុស្ស លោកស្រី Michelle Bachelet
នាយកជាន់ខ្ពស់អង្គការលើកលែងទោសអន្ដរជាតិទទួលបន្ទុកប្រតិបត្តិការសកល លោក Minar Pimple មានប្រសាសន៍ក្នុងសេចក្ដីថ្លែងការណ៍មួយកាលពីម្សិលមិញថា ករណីលោក កឹម សុខា នេះ គឺមានហេតុផលនយោបាយ បន្ទាប់ពីលោកត្រូវបានចាប់ឃុំក្នុងពន្ធនាគារអស់រយៈពេលជាង ១ឆ្នាំ ដោយគ្មានហេតុផលច្បាស់លាស់។
លោកថា អាជ្ញាធរកម្ពុជាត្រូវដោះលែងលោក កឹម សុខា ដោយគ្មានលក្ខខណ្ឌអ្វីទាំងអស់ ហើយរដ្ឋាភិបាលត្រូវធានាថា លោកទទួលបានការមើលថែសុខភាពឲ្យបានដិតដល់ក្រោយចេញពីពន្ធនាគារ។
នាយកជាន់ខ្ពស់អង្គការលើកលែងទោសអន្ដរជាតិទទួលបន្ទុកប្រតិបត្តិការសកល លោក Minar Pimple
អ្នកនាំពាក្យគណបក្សប្រជាជនកម្ពុជាលោក សុខ ឥសាន ច្រានចោលការលើកឡើងរបស់ក្រុមអង្គការអន្ដរជាតិទាំងនេះ ដោយថា ចំណាត់ការច្បាប់ប្រឆាំងមេដឹកនាំអតីតបក្សប្រឆាំង គឺជាការអនុវត្តទៅតាមច្បាប់របស់កម្ពុជា ដើម្បីពង្រឹងនីតិរដ្ឋ និងលទ្ធិប្រជាធិបតេយ្យ។
អ្នកនាំពាក្យគណបក្សប្រជាជនកម្ពុជាលោក សុខ ឥសាន
កាលពីវេលាម៉ោង៣ទៀបភ្លឺម្សិលមិញនេះ សាលាដំបូងរាជធានីភ្នំពេញបានសម្រេចដោះលែង លោក កឹម សុខា ឲ្យនៅក្រៅឃុំជាបណ្ណោះអាសន្ន ដោយសំអាងទៅលើហេតុផលសុខភាពរបស់លោក និងថា លោកមិនអាចគេចពីនីតិវិធីរបស់តុលាការឡើយ។ បន្ថែមលើនេះ សាលាដំបូងរាជធានីភ្នំពេញក៏បានដាក់ចេញនូវវិធានការត្រួតពិនិត្យ និងកាតព្វកិច្ចមួយចំនួនចំពោះលោក កឹម សុខា ផងដែរ ដូចជា ប្ដូរពីការឃុំខ្លួននៅក្នុងពន្ធនាគារ ត្រពាំងផ្លុង មកជាប់ឃុំនៅក្នុងផ្ទះ។ លោកត្រូវឆ្លើយតបនូវរាល់ការកោះហៅពីចៅក្រមស៊ើបសួរ ហាមមិនឲ្យទាក់ទងជាមួយថ្នាក់ដឹកនាំអតីតគណបក្សសង្គ្រោះជាតិ ជនបរទេស ឬភាគីដែលពាក់ព័ន្ធនៅក្នុងសំណុំរឿង៕
