អតីតគណបក្សប្រឆាំង អះអាងថា ខ្លួននឹងដឹកនាំបាតុកម្មនៅមុខអង្គការសហប្រជាជាតិនាចុងខែនេះ ដើម្បីចោទសួរពីភាពស្របច្បាប់របស់តំណាងកម្ពុជា ចំពេលដែលលោក ហ៊ុន សែន គ្រោងទៅថ្លែងនៅក្នុងកិច្ចប្រជុំនៅទីនោះ។
នៅក្នុងកិច្ចសម្ភាសមួយជាមួយវិទ្យុអាស៊ីសេរីនៅក្រោយកិច្ចប្រជុំមួយនៅទីក្រុងញូវយ៉ក សហរដ្ឋអាមេរិក នៅថ្ងៃនេះ អនុប្រធានអតីតគណបក្សសង្គ្រោះជាតិ លោកស្រី មួរ សុខហួរ អះអាងថា ក្រុមអ្នកគាំទ្រអតីតបក្សប្រឆាំងមួយនេះ គ្រោងរៀបចំបាតុកម្មនៅទីស្នាក់ការកណ្ដាលអង្គការសហប្រជាជាតិនៅថ្ងៃទី២៨ ខែកញ្ញាខាងមុខនេះ។
លោកស្រីឲ្យដឹងបន្ថែមថា អតីតបក្សប្រឆាំងមួយនេះ គ្រោងចោទសួរទៅអង្គការសហប្រជាជាតិអំពីភាពស្របច្បាប់នៃតំណាងកម្ពុជានៅឯស្ថាប័នកំពូលមួយនេះ។
អនុប្រធានអតីតគណបក្សសង្គ្រោះជាតិ លោកស្រី មួរ សុខហួរ
គម្រោងធ្វើបាតុកម្មរបស់អតីតគណបក្សសង្គ្រោះជាតិនេះ គឺគ្រោងធ្វើឡើងមួយថ្ងៃ នៅមុនពេលដែលប្រមុខរដ្ឋាភិបាលកម្ពុជា លោកនាយករដ្ឋមន្ដ្រី ហ៊ុន សែន គ្រោងទៅថ្លែងសន្ទរកថានៅក្នុងកិច្ចប្រជុំមួយនៅអង្គការសហប្រជាជាតិនាថ្ងៃទី២៩ខែកញ្ញា។
អ្នកនាំពាក្យគណបក្សកាន់អំណាច លោក សុខ ឥសាន ច្រានចោលការលើកឡើងរបស់អនុប្រធានគណបក្សសង្គ្រោះជាតិរូបនេះ ដោយថា រដ្ឋាភិបាលថ្មីនៅអាណត្តិទី៦នេះ កើតចេញពីការបោះឆ្នោតដែលមានភាពសេរី ត្រឹមត្រូវ និងយុត្តិធម៌។
លោកថា បាតុកម្មនៅមុខអង្គការសហប្រជាជាតិ នឹងមិនមានឥទ្ធិពលមកលើរដ្ឋាភិបាលថ្មី ឬជំរុញឲ្យអង្គការសហប្រជាជាតិចោទសួរពីបញ្ហានេះនោះទេ។
អ្នកនាំពាក្យគណបក្សកាន់អំណាច លោក សុខ ឥសាន
ប្រធានក្រុមអ្នកវិភាគនយោបាយវ័យក្មេង កញ្ញា លី ស្រីស្រស់ វិភាគថា ការចោទសួរពីភាពស្របច្បាប់របស់តំណាងកម្ពុជាដែលឈានទៅរកវិធានការព្យួរអាសនៈ ទំនងជាពិបាកក្នុងការអនុវត្ត ពីព្រោះ វាចាំបាច់មានការបោះឆ្នោតសម្រេចដោយក្រុមប្រឹក្សាសន្ដិសុខអង្គការសហប្រជាតិ និងប្រទេសមហាអំណាចធំៗ ដែលពួកគេអាចប្រើប្រាស់សិទ្ធិវេតូ។
កញ្ញាថា៖ «យើងត្រូវតែមានការបោះឆ្នោតពីក្រុមប្រឹក្សាសន្ដិសុខអង្គការសហប្រជាជាតិ ក្នុងនីតិវិធីហ្នឹងដែរ វាមានផលលំបាកការប្រើប្រាស់សិទ្ធិវេតូរបស់មហាអំណាចប្រាំទៀត។ ក្រោយពីមហាអំណាចប្រាំហ្នឹងយល់ព្រម ទម្រង់នៃការស្នើសុំព្យួរអាសនៈ ត្រូវបញ្ជូនទៅក្រុមប្រឹក្សាសន្ដិសុខអង្គការសហប្រជាជាតិ។ អញ្ចឹងគោលបំណងនៃការធ្វើបាតុកម្មដើម្បីអាចស្នើឲ្យមានការព្យួរអាសនៈរបស់កម្ពុជាណាមួយ វាអាចមានការពិបាក»។
យ៉ាងណាក៏ដោយ ក្នុងសម័យប្រជុំលើកទី៣៩ នៅទីក្រុង Strasbourg ប្រទេសបារាំង កាលពីថ្ងៃទី១៣កញ្ញាកន្លងទៅនេះ សភាអឺរ៉ុប បានបង្ហាញក្ដីកង្វល់យ៉ាងធ្ងន់ធ្ងរជុំវិញការបោះឆ្នោត និងលទ្ធផលនៃការបោះឆ្នោតកាលពីចុងខែកក្កដាកន្លងមក ដោយថា ការបោះឆ្នោតនោះមិនមានភាពសេរី និងយុត្តិធម៌នោះឡើយ។
ក្នុងកិច្ចប្រជុំនេះផងដែរ តំណាងជាន់ខ្ពស់សហភាពអឺរ៉ុបទទួលបន្ទុកកិច្ចការបរទេស និងគោលនយោបាយសន្តិសុខ លោកស្រី Federica Mogherini ក៏បានទុកពេលឲ្យរដ្ឋាភិបាលថ្មីរបស់កម្ពុជា ស្ដារលទ្ធិប្រជាធិបតេយ្យឡើងវិញ បើពុំនោះទេ សហភាពអឺរ៉ុបនឹងផ្ដាច់ជំនួយទាំងអស់ពីកម្ពុជា ដោយរួមទាំងការព្យួរប្រព័ន្ធអនុគ្រោះពន្ធ ទណ្ឌកម្មទិដ្ឋាការ ឬវិធានការចាំបាច់ផ្សេងទៀត៕