ប្រមុខរដ្ឋាភិបាលកម្ពុជា លោកនាយករដ្ឋមន្ដ្រី ហ៊ុន សែន គ្រោងទៅថ្លែងសុន្ទរកថានៅឯអង្គការសហប្រជាជាតិនាសប្ដាហ៍ក្រោយនេះ ខណៈដែលអតីតមេដឹកនាំបក្សប្រឆាំង លោក សម រង្ស៊ី ប្រកាសត្រៀមធ្វើបាតុកម្មប្រឆាំងវត្តមានរូបលោកនៅទីនោះផងដែរ។
លោកនាយករដ្ឋមន្ដ្រី ហ៊ុន សែន បានសរសេរលើទំព័រហ្វេសប៊ុករបស់លោកកាលពីម្សិលមិញថា លោកនឹងទៅចូលរួមក្នុងមហាសន្និបាតអង្គការសហប្រជាជាតិ ដែលស្ថិតលើទឹកដីសហរដ្ឋអាមេរិកនាសប្តាហ៍ក្រោយនេះ។ លោកក៏សង្ឃឹមថា នឹងបានជួបជាមួយពលរដ្ឋខ្មែររស់នៅសហរដ្ឋអាមេរិកផងដែរ។
លោក ហ៊ុន សែន សរសេរថា៖
លោកនាយករដ្ឋមន្ដ្រី ហ៊ុន សែន
ខណៈដែលមេដឹកនាំបក្សកាន់អំណាចគ្រោងនឹងធ្វើដំណើរទៅប្រជុំអង្គការសហប្រជាជាតិនោះ សេចក្ដីប្រកាសព័ត៌មានឲ្យដឹងថា អតីតប្រធានគណបក្សសង្គ្រោះជាតិ លោក សម រង្ស៊ី នឹងដឹកនាំក្រុមអ្នកគាំទ្រនៅក្រៅប្រទេស ទៅធ្វើបាតុកម្មប្រឆាំងវត្តមានលោក ហ៊ុន សែន នៅទីនោះ នាថ្ងៃទី២៨ ខែកញ្ញា និងទាមទារទៅអង្គការសហប្រជាជាតិ កុំឲ្យទទួលស្គាល់រដ្ឋាភិបាលថ្មី ដែលដឹកនាំដោយគណបក្សប្រជាជនកម្ពុជា។
អតីតគណបក្សសង្គ្រោះជាតិអះអាងថា ពួកគេនឹងចោទសួរអង្គការសហប្រជាជាតិអំពីភាពស្របច្បាប់នៃតំណាងកម្ពុជា ដែលគ្រោងទៅថ្លែងនៅអង្គការសហប្រជាជាតិនាចុងខែនេះ។
ប៉ុន្ដែ ក្នុងពិធីជួបជាមួយក្រុមកម្មកររោងចក្រ នៅខេត្តកំពង់ស្ពឺ កាលពីថ្ងៃទី១៩កញ្ញាកន្លងមកនេះ លោក ហ៊ុន សែន បានបញ្ចេញប្រតិកម្មខ្លាំងៗ តបទៅនឹងការលើកឡើងពីអាសនៈរបស់កម្ពុជានៅអង្គការសហប្រជាជាតិ ដោយលោកថា គ្មានអ្នកណាថ្លើមធំហ៊ានដកអាសនៈកម្ពុជានោះទេ៕
