អតីតមន្ដ្រីជាន់ខ្ពស់គណបក្សសង្គ្រោះជាតិ លោក មាជ សុវណ្ណារ៉ា ដែលទើបតែត្រូវបានដោះលែងឲ្យមានសេរីភាព និងចាកចេញទៅក្រៅប្រទេសនោះ បានអះអាងថា លោកនឹងថ្លែងប្រាប់អង្គការសហប្រជាជាតិអំពីបញ្ហារំលោភសិទ្ធិមនុស្សនៅកម្ពុជា រួមទាំងការចាប់ខ្លួនលោកដាក់ពន្ធនាគារទាំងអយុត្តិធម៌ផងដែរ។
លោក មាជ សុវណ្ណារ៉ា បានប្រាប់វីអូឌីតាមបណ្ដាញសង្គមនៅថ្ងៃនេះថា លោកត្រូវបានអង្គការសិទ្ធិមនុស្សអន្ដរជាតិ អញ្ជើញទៅថ្លែងសុន្ទរកថានៅឯអង្គការសហប្រជាជាតិនាថ្ងៃទី២៤ ខែកញ្ញាខាងមុខនេះ។ លោកថា ការអញ្ជើញនេះ គឺព្រោះលោកជាអ្នកទោសនយោបាយ ដែលទើបចេញពីពន្ធនាគារ។
លោក មាជ សុវណ្ណារ៉ា ឲ្យ VOD ដឹងបន្ថែមថា លោកនឹងនិយាយពីបញ្ហារំលោភសិទ្ធិមនុស្ស ការចាប់លោកដាក់ពន្ធនាគារដោយបំពានច្បាប់ ដោយគ្រាន់តែលោកអនុវត្តសិទ្ធិក្នុងការបញ្ចេញមតិ ការបំបិទសិទ្ធិមន្ដ្រីអតីតបក្សប្រឆាំង១១៨រូប មិនឲ្យធ្វើនយោបាយ ៥ឆ្នាំ ការយាយីក្រុមអង្គការសង្គមស៊ិវិល និងសារព័ត៌មានជាដើម។
អតីតមន្ដ្រីជាន់ខ្ពស់គណបក្សសង្គ្រោះជាតិ លោក មាជ សុវណ្ណារ៉ា
លោក មាជ សុវណ្ណារ៉ា អះអាងថា លោកមិនមានការព្រួយបារម្ភចំពោះវិធានការរបស់រដ្ឋាភិបាលមកលើរូបលោកនោះទេ ក្រោយពេលលោកឡើងថ្លែងរិះគន់បញ្ហាសិទ្ធិមនុស្សនៅកម្ពុជាដូច្នេះនោះ។
កាលពីថ្ងៃទី២០ ខែកក្កដា ឆ្នាំ២០១៥ សាលាដំបូងរាជធានីភ្នំពេញបានកាត់ទោស លោក មាជ សុវណ្ណារ៉ា ដាក់ពន្ធនាគាររយៈពេល២០ឆ្នាំ ក្រោមការចោទប្រកាន់ពីបទដឹកនាំ និងចូលរួមចលនាបាតុកម្មហិង្សា បន្ទាប់ពីការតវ៉ាឲ្យបើកទីលានប្រជាធិបតេយ្យចាស់ កាលពីថ្ងៃទី១៥ កក្កដា ឆ្នាំ២០១៤។
ប៉ុន្ដែ លោក មាជ សុវណ្ណារ៉ា និងអតីតសកម្មជន ១២នាក់ទៀតរបស់គណបក្សសង្គ្រោះជាតិ ដែលជាប់ឃុំ ត្រូវតុលាការដោះលែងឲ្យមានសេរីភាព កាលពីចុងខែសីហាកន្លងទៅនេះ ក្រោយលោកនាយករដ្ឋមន្ត្រី ហ៊ុន សែន ស្នើសុំព្រះមហាក្សត្រលើកលែងទោស៕