អាមេរិក នៅតែប្រកាន់ជំហរថាទណ្ឌកម្មប្រឆាំងនឹងកូរ៉េខាងជើងនឹងនៅតែមានដរាបណាកូរ៉េខាងជើងមិនបោះបង់ចោលកម្មវិធីអាវុធនុយក្លេអ៊ែទាំងស្រុងនោះ។
ក្នុងបទសម្ភាសន៍ជាមួយទូរទស្សន៍ Fox News របស់អាមេរិកកាលពីថ្ងៃអាទិត្យម្សិលមិញ រដ្ឋមន្រ្តីក្រសួងការបរទេសអាមេរិក លោក ម៉ៃ ប៉ុមភីអូ បានថ្លែងការដាក់ទណ្ឌកម្មសេដ្ឋកិច្ចនិងការដាក់សម្ពាធនានាទៅលើកូរ៉េខាងជើងនឹងនៅតែមានប្រសិទ្ធភាព។ លោកបន្ថែមថាក្រុមប្រឹក្សាសន្តិសុខអង្គការសហប្រជាជាតិនឹងមិនបន្ធូរបន្ថយទណ្ឌកម្មណាមួយដល់កូរ៉េខាងជើងឡើយ រហូតទាល់តែប្រទេសនេះគ្មានអាវុធនុយក្លេអ៊ែ។
រដ្ឋមន្រ្តីក្រសួងការបរទេសអាមេរិករូបនេះ បានបញ្ជាក់បន្ថែមថាទណ្ឌកម្មដែលបានដាក់ទៅលើកូរ៉េខាងជើងកន្លងមកជាកម្លាំងចលករមួយដែលធ្វើឲ្យមេដឹកនាំកូរ៉េខាងជើងងាកមកចរចាររហូតដល់មានលទ្ធផលជាវិជ្ជមានមួយចំនួន។
ការលើកឡើងរបស់រដ្ឋមន្រ្តីក្រសួងការបរទេសអាមេរិករូបនេះ ធ្វើឡើងស្របពេលដែលមេដឹកនាំកូរ៉េខាងជើងបានបង្ហាញពីការប្តេជ្ញាចិត្តរបស់ក្នុងការលុបបំបាត់កម្មវិធីអាវុធនុយក្លេអ៊ែក្នុងរយៈពេលចុងក្រោយនេះ។
កាលពីខែធ្នូឆ្នាំមុន ក្រុមប្រឹក្សាសន្តិសុខអង្គការសហប្រជាជាតិបានចេញសេចក្តីសម្រេចដោយបន្ថែមនូវទណ្ឌកម្មនានាប្រឆាំងនឹងកូរ៉េខាងជើងបន្ទាប់ពីកូរ៉េខាងជើងបានបាញ់សាកល្បងមីស៊ីលចំងាយឆ្ងាយរបស់ខ្លួន។ ទណ្ឌកម្មទាំងនោះរួមមានការហាមប្រាមប្រទេសផ្សេងៗមិនឲ្យធ្វើពាណិជ្ជកម្មជាមួយកូរ៉េខាងជើង និង ទណ្ឌកម្មផ្នែកថាមពលជាដើម។ សម្ភារនិងឧបករណ៍ឧស្សាហកម្ម គ្រឿងម៉ាស៊ីន មធ្យោបាយដឹកជញ្ជួន និងលោហធាតុនានា ត្រូវបានក្រុមប្រឹក្សាសន្តិសុខអង្គការសហប្រជាជាតិសម្រេចមិនឲ្យនាំចូលទៅកូរ៉េខាងជើងនោះទេ។
ការផ្គត់ផ្គង់ប្រេងសាំង ម៉ាស៊ូត និងឥន្ធនៈនានាដទៃទៀតឲ្យកូរ៉េខាងជើង ត្រូវកាត់បន្ថយរហូតដល់៨៩ភាគរយ។ សេចក្តីសម្រេចដដែលក៏តម្រូវឱ្យបណ្តាប្រទេសនានាបញ្ឈប់នាវារបស់ខ្លួនក្នុងការដឹកប្រេងដោយខុសច្បាប់ទៅឲ្យកូរ៉េខាងជើង ហើយហាមឃាត់ការរត់ពន្ធធ្យូងថ្មរបស់កូរ៉េខាងជើងនិងទំនិញហាមឃាត់ដទៃទៀត។ ទណ្ឌកម្មនេះ ក៏តម្រូវឲ្យប្រទេសទាំងអស់ដែលមានពលករកូរ៉េខាងជើងកំពុងបំពេញការងារ ឲ្យបញ្ជូនពូួកគេទាំងនោះត្រលប់ទៅកូរ៉េខាងជើងវិញក្នុងរយៈពេល ២៤ ខែ ហើយពលរដ្ឋកូរ៉េខាងជើងត្រូវហាមឃាត់មិនឲ្យចេញទៅធ្វើការនៅប្រទេសផ្សេងទៀតបានទេ។ ជនជាតិកូរ៉េខាងជើងជិត១០ម៉ឺននាក់ដែលធ្វើការនៅក្រៅប្រទេស បានផ្ញើប្រាក់ប្រហែលជា៥រយលានដុល្លារក្នុងមូយឆ្នាំឲ្យគ្រួសាររបស់ខ្លួននៅក្នុងប្រទេស។ នេះបើតាមការបញ្ជាក់របស់ឯកអគ្គរដ្ឋទូតសហរដ្ឋអាមេរិកប្រចាំអង្គការសហប្រជាជាតិអ្នកស្រីនិកគី ហាឡី ។
គួរបញ្ជាក់ថាលោក ម៉ៃ ប៉ុមភីអូ នឹងធ្វើជាប្រធានកិច្ចប្រជុំថ្នាក់រដ្ឋមន្រ្តីនៅក្រុមប្រឹក្សាសន្តិសុខអង្គការសហប្រជាជាតិនៅថ្ងៃព្រហស្បតិ៍ ដែលលោកនឹងយកឱកាសនោះដើម្បីបញ្ជាក់ប្រាប់ពិភពលោកថាទណ្ឌកម្មប្រឆាំងកូរ៉េខាងជើងនៅតែមានដដែល៕
