មន្ដ្រីជាន់ខ្ពស់រដ្ឋាភិបាលអះអាងថា ការធ្វើជំរឿននៅឆ្នាំក្រោយនេះប្រព្រឹត្តទៅតាមការគ្រោងទុក ប៉ុន្ដែ រដ្ឋាភិបាលថា ត្រូវចំណាយថវិកាដោយខ្លួនឯង ព្រោះមិនមានដៃគូជួយនោះទេ។
ក្នុងពិធីប្រកាសគណៈកម្មាធិការជំរឿនទូទៅប្រជាជន និងពិធីទទួលសម្ភារៈជំរឿនពីសាធារណរដ្ឋប្រជាមានិតចិននៅរាជធានីភ្នំពេញ នៅថ្ងៃនេះ រដ្ឋមន្ត្រីក្រសួងផែនការ និងជាអនុប្រធានគណៈកម្មាការជាតិជំរឿនទូទៅប្រជាជន លោក ឆាយ ថន មានប្រសាសន៍ថា ការធ្វើជំរឿននៅឆ្នាំ២០១៩ខាងមុខនេះ មានសារៈសំខាន់ខ្លាំងណាស់ ដើម្បីឲ្យរដ្ឋាភិបាលអាចតាក់តែងគោលនយោបាយ និងស្របតាមគោលដៅរបស់រដ្ឋាភិបាលដែលចង់ប្រែក្លាយកម្ពុជាឲ្យទៅជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០។លោកថ្លែងបន្តថា នេះជាការធ្វើជំរឿនលើកដំបូងហើយ ដែលរដ្ឋាភិបាលសម្រេចចំណាយថវិកាដោយខ្លួនឯង ដោយសារមិនមានដៃគូជួយ។
រដ្ឋមន្ត្រីក្រសួងផែនការ និងជាអនុប្រធានគណៈកម្មាការជាតិជំរឿនទូទៅប្រជាជន លោក ឆាយ ថន
យ៉ាងណាក៏ដោយ នៅក្នុងពិធីនេះដែរ មន្ដ្រីជាន់ខ្ពស់រដ្ឋាភិបាលរូបនេះបានថ្លែងអរគុណដល់រដ្ឋាភិបាលចិន ដែលបានជួយជាមធ្យោបាយធ្វើដំណើរដល់មន្ដ្រីដែលមានភារៈកិច្ចបំពេញការងារចុះស្រង់ទិន្នន័យ ស្ដិតិ និងការធ្វើជំរឿននេះ។
បើតាមរបាយការណ៍ រដ្ឋាភិបាលចិនបានផ្ដល់ជំនួយដល់កម្ពុជា ដូចជា ម៉ូតូ៣០០គ្រឿង និងរថយន្ដ៥២គ្រឿង កុំព្យូទ័រ ម៉ាស៊ីនបោះពុម្ពឯកសារ ម៉ាស៊ីនថតចម្លង និងម៉ាស៊ីន Server ជាដើម ដែលគិតជាទឹកប្រាក់សរុបមានចំនួន ២,៥លានដុល្លារអាមេរិក។
សូមជំរាបថា រដ្ឋាភិបាលនឹងចាប់ផ្ដើមធ្វើជំរឿនប្រជាជនជាលើកទី៣ ដែលការងារនេះមានរយៈពេល១០ថ្ងៃចាប់ផ្ដើមពីថ្ងៃទី៣ រហូតដល់ថ្ងៃទី១៣ខែមីនាឆ្នាំ២០១៩ខាងមុខ ខណៈរដ្ឋាភិបាលប៉ាន់ប្រមាណថា ពលរដ្ឋខ្មែរនឹងកើនដល់ ១៦លាននាក់នៅឆ្នាំក្រោយនេះ៕
