សាលាដំបូងរាជធានីភ្នំពេញ នៅថ្ងៃពុធនេះ សម្រេចកាត់ទោសមន្ត្រីនិងអតីតមន្រ្តីសមាគមអាដហុកចំនួន៥នាក់ ឲ្យជាប់ពន្ធនាគារម្នាក់ៗ៥ឆ្នាំ តែការអនុវត្តទោសត្រូវព្យួរ។
អតីតមន្ត្រីអាដហុក លោក នី ចរិយា និងមន្ត្រីអាដហុកលោក នី សុខា លោក ណៃ វង់ដា លោក យី សុខសាន្ត និងលោក ស្រី លឹម មុនី ត្រូវអង្គភាពប្រឆាំងអំពើពុករលួយចាប់ខ្លួន ដោយចោទពីបទសូកប៉ាន់សាក្សី ទាក់ទិននឹងសំណុំរឿងដ៏ចម្រូងចម្រាសរបស់អតីតមេដឹកនាំបក្សប្រឆាំង លោក កឹម សុខា។
មន្ត្រីឃ្លាំមើលសិទ្ធិមនុស្សទាំងនោះ ត្រូវបានតុលាការបង្គាប់ឲ្យឃុំខ្លួនបណ្តោះអាសន្ន នៅពន្ធនាគារព្រៃស អស់រយៈជាង១ឆ្នាំ ទើបដោះលែងឲ្យនៅក្រៅឃុំបណ្តោះអាសន្ន កាលពីចុងខែមិថុនា ឆ្នាំ ២០១៧ កន្លងទៅ៕
