ប្រធានាធិបតីសហរដ្ឋអាមេរិក បានបញ្ជាក់ថាជំនួបរវាងលោកនិងប្រធានាធិបតីអុីរ៉ងនឹងមិនមាននោះទេ បើទោះបីជាទំនាក់ទំនងប្រទេសទាំងពីរក្នុងពេលនេះកំពុងឡើងកម្ដៅខ្លាំងយ៉ាងណាក្តី។
លោកដូណាល់ត្រាំ ប្រធានាធិបតីសហរដ្ឋអាមេរិក បានសរសេរនៅលើបណ្ដាញTwitter របស់លោកកាលពីម្សិលមិញថា ទោះបីជាមានការស្នើសុំជួបគ្នាក៏ដោយ ក៏លោកមិនមានគម្រោងណាមួយដើម្បីជួបជជែកជាមួយប្រធានាធិបតីអុីរ៉ង់លោក ហាសសាន់ រ៉ូហានី ឡើយ។ លោកត្រាំបានបន្តថាជំនួបអាចនឹងមានក្នុងពេលណាមួយ ហើយលោកជឿជាក់ថាលោករ៉ូហានីជាបុរសម្នាក់ដែលគួរឲ្យស្រលាញ់។
ប៉ុន្តែក្នុងសុន្ទរកថាបើកមហាសន្និបាតអង្គការសហប្រជាជាតិលើកទី៧៣ ក្នុងទីក្រុងញូយ៉ក សហរដ្ឋអាមេរិកកាលពីម្សិលមិញ លោក ដូណាល់ ត្រាំក៏បានរិះគន់មេដឹកនាំអីុរ៉ងធ្ងន់ៗថាមានមហិច្ឆិតាទុកអាវុធនុយក្លេអ៊ែ។ លោកត្រាំ ក៏បានចោទអីុរ៉ង់ផងដែរថាជាអ្នកបង្កបញ្ហានៅក្នុងតំបន់មជ្ឈឹមបូពា៌ តាមរយៈការផ្ដល់ការគាំទ្រដល់ក្រុមយោធានៅក្នុងប្រទេសស៊ីរី លេបាណន់ និង យេមែន។
មិនត្រឹមតែប៉ុណ្ណោះលោក ដូណាល់ ត្រាំ ថែមទាំងបានលើកសរសើរមេដឹកនាំកំពូលកូរ៉េខាងជើងលោក គីម ជុងអ៊ុន ផងដែរថាមានភាពក្លាហានក្នុងការដោះស្រាយបញ្ហាវិបត្តិនុយក្លេអ៊ែរនៅឧបទ្វីបកូរ៉េ។ លោកត្រាំ ក៏បានជំរុញឲ្យប្រទេសដទៃទៀតចូលរួមជាមួយខ្លួនក្នុងការដាក់ទណ្ឌប្រឆាំងអុីរ៉ង់ផងដែរ ដោយសារតែពេលថ្មីៗអីុរ៉ង់បានចោទប្រកាន់អាមេរិកថាចង់ផ្ដួលរំលំរដ្ឋាភិបាលអុីរ៉ង់សព្វថ្ងៃ។
ទណ្ឌកម្មសេដ្ឋកិច្ចរបស់អាមេរិកប្រឆាំងនឹងប្រទេសអុីរ៉ង់ នឹងចាប់ផ្ដើមនៅខែវិច្ឆិកាឆ្នាំ២០១៨ខាងមុខនេះ។
ជាការឆ្លើយតប ក្នុងមហាសន្និបាតនោះដែរ ប្រធានាធិបតីអុីរ៉ង់ លោក ហាសសាន់ រ៉ូហានី ថាលោកក៏គ្មានបំណងនឹងថតរូបជាមួយលោកដូណាល់ត្រាំដែរ។ ចំពោះបញ្ហាអាវុធនុយក្លេអ៊ែ លោក ហាសសាន់ រ៉ូហានី បានលើកឡើងថាអាមេរិកទេជាអ្នកខុសព្រោះថាអាមេរិកជាអ្នកដើរចេញពីកិច្ចព្រមព្រៀងអន្តរជាតិឆ្នាំ២០១៥ស្តីនុយក្លេអ៊ែរ។
ប្រធានាធិបតីអុីរ៉ង់ លោក ហាសសាន់ រ៉ូហានី ក៏បានលើកឡើងថាទណ្ឌកម្មរបស់អាមេរិកដែលដាក់មកលើអុីរ៉ង់ជាភេរវកម្មផ្នែកសេដ្ឋកិច្ចដែលប្រឆាំងខ្លួន។ លោក ហាសសាន់ រ៉ូហានី ក៏បាននិយាយឌឺដងទៅសហរដ្ឋអាមេរិកផងដែរថាសន្តិសុខពិភពលោកកំពុងតែទទួលរងការគំរាមកំហែងដោយសារតែការប្រព្រឹត្តរបស់ប្រទេសមួយចំនួនដែលមិនបានគោរពនូវច្បាប់និងស្ថាប័នអន្តរជាតិ។
សហរដ្ឋអាមេរិក និងអីុរ៉ង់កាន់តែមើលមុខគ្នាលែងត្រង់ថែមទៀតបន្ទាប់ពីមានការវាយប្រហារទៅលើក្បួនព្យុះយាត្រារបស់កងទ័ពអីុរ៉ង់កាលពីថ្ងៃទី២២ខែកញ្ញាឆ្នាំ២០១៨ដែលបណ្ដាលឲ្យទាហានអីុរ៉ង់២៥នាក់បាត់បង់ជីវិតនិងជាង៧០នាក់ទៀតរងរបួស។
ទោះបីជាមានក្រុមភេរវករមួួយក្រុម ចេញមុខមកទទួលខុសត្រូវក៏ដោយ ក៏អីុរ៉ង់នៅតែចោទថាអាមេរិក អារ៉ាប់ប៊ីសាអ៊ូឌីត រាជាណាចក្រអារ៉ាប់រួម និងអីុស្រាអែលជាអ្នកនៅពីក្រោយទៅវិញ។
ជាកាឆ្លើយតបអាមេរិក បានបដិសេធការចោទប្រកាន់នេះ ហើយបានប្រាប់ទៅអុីរ៉ង់ថាគួរឆ្លុះកញ្ចក់មើលខ្លួនឯងទៅផង សន្តិសុខប្រទេសខ្លួនឯងសោះហេតុអ្វីបែរជាបន្ទោសប្រទេសដទៃទៅវិញ៕
