លោកនាយករដ្ឋមន្ត្រី ហ៊ុន សែន បានក្រើនរំឭកដល់ពលរដ្ឋខ្មែរថាគួរពិចារណារប្រកបដោយវិចារណញាណដោយចែកឲ្យដាច់ពីការមិនពេញចិត្តរូបលោក និងផលប្រយោជន៍ជាតិទាំងមូល ស្របពេលដែលពលរដ្ឋខ្មែរនៅអាមេរិកថានឹងធ្វើបាតុប្រឆាំងវត្តមានរបស់លោក។
លោក ហ៊ុន សែន បានសរសេរលើហ្វេសប៊ុក នៅថ្ងៃនេះថា ការចេញទៅក្រៅប្រទេសលើកនេះ ជាការតស៊ូនយោបាយការទូតលើឆាកអន្តរជាតិ និងចូលរួមផងដែរនូវការងារជាកិច្ចការតំបន់និងអន្តរជាតិ ដែលលោកថាកំពុងវិវត្តន៍យ៉ាងតានតឹង និងស្មុគស្មាញ។
មេដឹកនាំរូបនេះ ឲ្យដឹងទៀតថា៖«ចំពោះជនរួមជាតិនៅក្រៅប្រទេស ដែលមិនចូលចិត្តខ្ញុំ ក៏សូមចែកឱ្យដាច់នូវអ្វីជាផលប្រយោជន៍ មុខមាត់ ហ៊ុន សែន និងផលប្រយោជន៍ជាតិខ្មែរទាំងមូល ដោយសម្បជញ្ញៈ វិចារណញាណ »។
មន្ត្រីជាន់ខ្ពស់អតីតបក្សប្រឆាំង លោក ហ៊ីង សុខសាន ដែលកំពុងនៅក្រៅប្រទេស និយាយថា សារនេះជាចិត្តសាស្ត្រនយោបាយដើម្បីបង្វែងដានឲ្យអ្នកនៅឯនាយសមុទ្ររារែកធ្វើបាតុកម្ម ដោយធ្វើឲ្យយល់ច្រឡំថា ការធ្វើឲ្យបាក់មុខមេដឹកនាំ ស្មើនឹងបាត់បង់ប្រយោជន៍ជាតិ។ ប៉ុន្តែលោកថាសារនេះមិនអាចបោកខ្មែរនៅឯនាយសមុទ្របានទេ។
លោកថា៖«ប្រជាពលរដ្ឋនៅឯនាយសមុទ្រនេះយល់ច្បាស់ ត្រង់ថា ការបាត់មុខមាត់ សម្រាប់ជាតិខ្មែរទាំងមូលវាបានបាត់ទៅហើយ ហើយអ្នកដែលធ្វើឲ្យបាត់នឹងគឺលោកនាយករដ្ឋមន្ត្រី និងគណបក្សកាន់អំណាចទៅវិញទេ សម្រាប់ខ្លួនឯងនិងជាតិ។ យើងដឹងហើយថា ការបោះឆ្នោតក្លែងក្លាយ និងការឈ្នះឆ្នោតដោយឥតថ្លៃថ្នូរ»។
អ្នកវិភាគនយោបាយ លោក បណ្ឌិត មាស នី បង្ហាញការព្រួយបារម្ភថា បើអ្នកនយោបាយខ្មែរមិនអាចស្វែងរកដំណោះស្រាយនយោបាយ ឈានទៅពង្រឹងដំណើរការប្រជាធិបតេយ្យឡើងវិញទេ កម្ពុជាអាចនឹងប្រឈមនឹងវិបត្តិសេដ្ឋកិច្ច និងវិបត្តសង្គមធ្ងន់ធ្ងរ ពីវិធានការរបស់សហគមន៍អន្តរជាតិ។
សហរដ្ឋអាមេរិក បានចាត់វិធានការរួចហើយដោយបានស្នើច្បាប់មួយដើម្បីឈានទៅបង្កកទ្រព្យសម្បត្តិ មន្ត្រីទាំងឡាយណាដែលបានបំផ្លាញប្រជាធិបតេយ្យនៅកម្ពុជា ។
ចំណែកសហភាពអឺរ៉ុបឯនោះវិញបានគំរាមផ្តាច់ប្រព័ន្ធអនុគ្រោះពន្ធពីកម្ពុជាវិញបើមិនស្តារប្រជាធិបតេយ្យ និងបើកឱកាសឲ្យអតីតបក្សប្រឆាំងបានចូលប្រឡូកក្នុងឆាកនយោបាយដោយគ្មានការគំរាមកំហែងឡើងវិញនោះទេ។
ពីថ្ងៃទី២៧ដល់ថ្ងៃទី៣០កញ្ញា នាយករដ្ឋមន្ត្រីកម្ពុជាលោកហ៊ុន សែន នឹងចូលរួមកិច្ចប្រជុំនានា រួមទាំងចូលរួមមហាសន្និបាទអង្គការសហប្រជាតិនៅទីក្រុងញ៉ូវយក សហរដ្ឋអាមេរិក ដែលកិច្ចប្រជុំនោះមានរដ្ឋជាសមាជិក១៩៣ចូលរួម៕