អតីតមេដឹកនាំបក្សប្រឆាំង លោក សម រង្ស៊ី បានប្រកាសលុបចោលគម្រោងចូលរួមធ្វើបាតុកម្ម ប្រឆាំងវត្តមានលោក ហ៊ុន សែននៅសហរដ្ឋអាមេរិក ក្នុងរយៈពេលតែ១ថ្ងៃប៉ុណ្ណោះមុនការចេញដំណើររបស់លោកហ៊ុន សែនទៅប្រទេសនេះ។
លោក សម រង្ស៊ី បានសរសេរនៅលើបណ្ដាញសង្គមធ្វីតធ័រ របស់លោកកាលពីម្សិលមិញថា មូលហេតុដែលលោកលុបចោទគម្រោងនេះ ដោយថាមានភារៈកិច្ចត្រូវបំពេញការងារសំខាន់ នៅកន្លែងផ្សេង ។
សកម្មជនអតីតគណបក្សសង្គ្រោះជាតិប្រចាំនៅសហរដ្ឋអាមេរិក បានអះអាងថាពួកគេនិងបាតុករផ្សេងទៀត រួមទាំងលោក សម រង្ស៊ី ផងនឹងប្រមូលផ្តុំគ្នា មុខបរិវេណនៃកិច្ចប្រជុំរបស់អង្គការសហប្រជាតិ នៅបូរីញូវយ៉ក ដើម្បីជំរុញកុំឲ្យអង្គការសហប្រជាជាតិទទួលស្គាល់រដ្ឋាភិបាលថ្មីរបស់លោក ហ៊ុន សែន ដោយថាការបោះឆ្នោតនៅថ្ងៃទី២៩កក្កដាជាការបោះឆ្នោត មិនឆ្លុះបញ្ចាំងពីឆន្ទះពលរដ្ឋ។
ដោយឡែកលោកនាយករដ្ឋមន្ត្រី ហ៊ុន សែន នៅថ្ងៃនេះ បានចេញដំណើរតាមផ្លូវអាកាសទៅកាន់ទីបូរីញូវយ៉ក ដើម្បីចូលរួមកិច្ចប្រជុំនៅថ្ងៃទី២៩ខែកញ្ញា ដែលកម្ពុជាជាអនុប្រធាននៃកិច្ចប្រជុំ។
មុនចេញដំណើរមេដឹនាំរូបនេះ បានផ្ញើសារនយោបាយថា៖
«ថ្ងៃនេះខ្ញុំសូមលាទៅបម្រើជាតិជាថ្មីម្តងទៀតដោយប្រើនយោបាយការទូតនៅលើឆាកអន្តរជាតិ។ កម្ពុជា មិនអាចឱ្យគេបង្ខូចជាន់ឈ្លីទោះបីក្នុងរូបភាពណាមួយក៏ដោយ »។
មេដឹកនាំកម្ពុជារូបនេះ ក៏រំឭកឲ្យអ្នកដែលមិនចូលចិត្តលោក ត្រូវចែកឱ្យដាច់រវាងបញ្ហាបុគ្គល និងផលប្រយោជន៍ជាតិខ្មែរទាំងមូល ប្រកបដោយសម្បជញ្ញៈ។ លោកហ៊ុន សែននឹងចូលរួមប្រជុំមហាសន្និបាតអង្គការសហប្រជាជាតិលើកទី៧៣ នៅបូរីញូវយ៉ក សហរដ្ឋអាមេរិកចាប់ពីថ្ងៃទី២៧ដល់ថ្ងៃទី៣០ខែកញ្ញាឆ្នាំ២០១៨។