អាជ្ញាធរសង្កាត់ចាក់អង្រែលើរារាំងមិនឲ្យសហគមន៍ក្រីក្រមួយ ធ្វើពិធីសូត្រមន្តតាមបែបសាសនា ដើម្បីគោរពទិវាសិទ្ធិលំនៅឋានពិភពលោក ក្រោមហេតុផលថា ពលរដ្ឋទាំងនោះមិនបានជូនដំណឹងជាមុន។
ពលរដ្ឋសហគមន៍ព្រែកតាគង់ផ្លូវ៦០ម៉ែត្រក្នុងសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ នៅថ្ងៃនេះបាននាំគ្នាប្រារពទិវាសិទ្ធលំនៅឋានពិភពលោកដោយមានអ្នកចូលរួមមានគ្នាប្រហែលជាង៣០នាក់។ ពួកគេបាននិមន្តព្រះសង្ឃដើម្បីធ្វើពិធីសូត្រមន្តតាមបែបសាសនា ប៉ុន្តែពេលកំពុងជួបជុំគ្នាត្រូវបានអាជ្ញាធរសង្កាត់ចាក់អង្រែលើហាមឃាត់ និងហៅតំណាងពលរដ្ឋទៅធ្វើកិច្ចសន្យាថែមទៀត។
ពលរដ្ឋម្នាក់លោក ខាយ ចាន់ណារិទ្ធ និយាយថា គម្រោងធ្វើពិធីគោរពទិវាសិទ្ធិលំនៅឋាននេះ គឺប្រជាពលរដ្ឋបាននិមន្តព្រះសង្ឃ២អង្គ និងមនុស្សចាស់ជរា រួមទាំងក្មេងៗក្នុងសហគមន៍ធ្វើពិធីសូត្រមន្ត បង្សុកូល ហើយក្រោយចប់កម្មវិធីនោះនឹងនាំគ្នាសម្អាត់បរិស្ថានក្នុងសហគមន៍ ប៉ុន្តែកម្មវិធីត្រូវបានលុបចោលវិញដោយសារចៅសង្កាត់ចាក់អង្រែលើមិនអនុញ្ញាត។
លោកបន្ថែមថា«យើងសុំច្បាប់គេហើយ ប៉ុន្តែគេថាយើងមិនទាន់បានសុំ។ ឥលូវអ្នកសុំច្បាប់គេទៅសង្កាត់មិនទាន់មកវិញទេ។ ហើយពួកខ្ញុំនៅក្នុងសហគមន៍នេះមិនដឹងថា គេឃាត់យើងមិននេះដោយសារមូលហេតុអ្វីទេ? ហើយយើងប្រារពពិធីនេះដើម្បី បរិស្ថានស្អាត និងសុំសេចក្តីសុខសប្បាយក្នុងភូមិ ឥលូវដល់ពេលគេឃាត់អញ្ចឹងអត់មានព្រះសង្ឃអីសូត្រមន្តទេ អាចារ្យក៏អត់ ?រត់ចែកជើងគ្នាអស់ហើយ»។
ពលរដ្ឋមកពីសហគមន៍ផ្សេងដែលចូលរួមកម្មវិធីនេះអ្នកស្រី ស សន និយាយថា នេះមិនមែនជាលើកទីមួយទេដែលអាជ្ញាធររារាំងពលរដ្ឋមិនឲ្យធ្វើពិធីផ្សេងៗក្រោមហេតុផលថា មិនបានជូនដំណឹងជាមុននោះ។
សកម្មជនដីធ្លីរូបនេះបន្តថា ពួកគាត់ជាអ្នកងាយរងគ្រោះដីធ្លី ឬ អ្នកបានបាត់បង់ដីធ្លីត្រូវតែប្រារព្ធទិវាសិទ្ធិលំនៅឋាននេះដើម្បីបង្ហាញសារដល់រដ្ឋាភិបាលឲ្យដឹងអំពីផលលំបាករបស់ពលរដ្ឋបាតបង់ដីធ្លី និងលំនៅឋាន។
អ្នកស្រីបន្ថែមថា«ខ្ញុំចង់ពួកគាត់ដឹងថា សិទ្ធិលំនៅឋាននេះមិនមែនតែនៅប្រទេសខ្មែរទេ គឺសិទ្ធិលំនៅឋានពិភពលោក។ អញ្ចឹងគ្រប់ប្រទេសនៅលើពិភពលោកគេធ្វើ អញ្ចឹងពួកខ្ញុំក៏អាចធ្វើបានដែរ ដើម្បីរំឮកទៅរដ្ឋាភិបាលថា ប្រជាពលរដ្ឋត្រូវការសិទ្ធិលំនៅឋាន សម្រប់រស់រានមានជីវិត សិទ្ធិទទួលលំនៅឋានសមរម្យ សិទ្ធិអភិវឌ្ឍន៍នៅហ្នឹងកន្លែង»។
វិអូឌីមិនអាចសុំការឆ្លើយតបពីចៅសង្កាត់ចាក់អង្រែក្រោម លោក កែវ សាវឿន បានទេជុំវិញហាមឃាត់មិនឲ្យពលរដ្ឋធ្វើពិធិសូត្រមន្តនេះ ប៉ុន្តែមេប៉ុសិ៍្តសង្កាត់ចាក់អង្រែលើលោក អ៊ុំ រតនា ដែលចុះហាមឃាត់នោះប្រាប់វីអូឌីយ៉ាងខ្លីថា អាជ្ញាធររារាំង ដោយសារពលរដ្ឋទាំងនោះមិនជូនដំណឹងទៅអាជ្ញាធរមុន។
លោកថា«ដោយសារពួកគាត់អត់ជូនដំណឹងទៅអាជ្ញាធរ»។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា មានប្រសាសន៍ថា តាមច្បាប់បាតុកម្ម បើពលរដ្ឋ ជួបជុំគ្នាដោយមានព្រះសង្ឃធ្វើពិធីសូត្រមន្ត បង្សុកូលផ្សេងៗ មិនចាំបាច់ជូនដំណឹងទេ។
លោកបន្តថា ករណីអាជ្ញាធរសង្កាត់ចាក់អង្រែលើហាមឃាត់ពលរដ្ឋសហគមន៍ព្រែតាគង់ផ្លូវ៦០ម៉ែត្រមិនឲ្យប្រារព្ធទិវាទសិទ្ធិលំនៅឋាននោះគឺជាការរំលោភសិទ្ធិពលរដ្ឋ។
លោកបន្ថែមថា«ពាក់ព័ន្ធហ្នឹងរឿងនេះយើងឃើញថា មួយរយៈការចុងក្រោយនេះ ប្រទេសកម្ពុជាយើងហ្នឹងមានលក្ខណៈរិតត្បិត ទៅលើសិទ្ធិសេរីភាពមូលដ្ឋាន សេរីភាពមូលដ្ឋានហ្នឹង រួមទាំងសេរីភាពក្នុងការជួបជុំ ដើម្បីទាមទារតវ៉ាអីទាំងអស់ហ្នឹងហើយ។ អញ្ចឹងទៅយើងមើលឃើញថា សេរីភាពមានការរឹតត្បិតយ៉ាងធ្ងន់ធ្ងរក្នុងប្រទេសកម្ពុជា។ ហើយកាលណាមានការរឹតត្បិតបែបនេះវានឹងធ្វើឲ្យប៉ះពាល់ដល់ប្រជាសហគមន៍ដែលគាត់កំពុងតែរៀបចំនោះហើយ»។
កាលពីថ្ងៃទី២១ ខែមិថុនាកន្លងទៅ រដ្ឋមន្ត្រីក្រសួងមហាផ្ទៃ លោក ស ខេង បញ្ជាក់ថា សមាគមនៅថ្នាក់មូលដ្ឋានអាចធ្វើសកម្មភាពបានដោយមិនតម្រូវឲ្យពួកគេមកចុះបញ្ជីនៅក្រសួងមហាផ្ទៃទេ ហើយថារាល់ការធ្វើសកម្មភាពរបស់សមាគម ឬអង្គការក៏មិនតម្រូវឲ្យសុំច្បាប់ដែរ ដោយថាគ្រាន់តែជូនដំណឹង៣ថ្ងៃមុនប៉ុណ្ណោះ៕
