លោកនាយករដ្ឋមន្ដ្រី ហ៊ុន សែន បានព្រមានបញ្ចេញលិខិតទទួលស្គាល់ទោសកំហុសរបស់អតីតមន្ដ្រីជាន់ខ្ពស់គណបក្សប្រឆាំង ២រូប គឺលោក មាជ សុវណ្ណារ៉ា និងលោក អ៊ុំ សំអាន បន្ទាប់ពីពួកគេត្រូវបានលើកលែងទោសមកនោះ។
ថ្លែងប្រាប់ក្រុមអ្នកគាំទ្ររស់នៅសហរដ្ឋអាមេរិកនៅថ្ងៃនេះ លោកនាយករដ្ឋមន្ដ្រី ហ៊ុន សែន បានថ្លែងវាយប្រហារនយោបាយរបស់អតីតបក្សប្រឆាំងនៅក្រៅប្រទេស ហើយលោកថែមទាំងបានគំរាមទម្លាយលិខិតទទួលស្គាល់ទោសកំហុស និងសុំលើកលែងទោសរបស់លោក មាជ សុវណ្ណារ៉ា និងលោក អ៊ុំ សំអាន ជាសាធារណៈទៀតផង។
ថ្លែងក្នុងពិធីនេះ លោក ហ៊ុន សែន ថ្លែងថា៖ «ដូច្នេះករណីលោក អ៊ុំ សំអាន បានទទួលស្គាល់ថា ខ្លួនខុស សូមផ្ដាំទៅលោក អ៊ុំ សំអាន សូមកុំភ្លេចឲ្យសោះ នូវលិខិតដែលលោកបានផ្ញើ ហើយបានចុះហត្ថលេខា។ បើចង់លោកចង់ឃើញ យើងនឹងផ្សាយរហូត។ លោក មាជ សុវណ្ណារ៉ា និងអ្នកដទៃទៀត កុំភ្លេចថា លោកបាននិយាយថា ការធ្វើរបស់លោក គឺជាការខុស ហើយលោកមិនបន្ដទៀតទេ»។
អតីតមន្ដ្រីជាន់ខ្ពស់គណបក្សសង្គ្រោះជាតិ លោក អ៊ុំ សំអាន លោក មាជ សុវណ្ណារ៉ា និងអតីតសកម្មជន ១២នាក់ទៀតរបស់អតីតគណបក្សប្រឆាំង ត្រូវបានតុលាការដោះលែងឲ្យមានសេរីភាព កាលពីចុងខែសីហាកន្លងទៅ បន្ទាប់ពីត្រូវបានព្រះមហាក្សត្រលើកលែងទោសតាមសំណើពីលោកនាយករដ្ឋមន្ត្រី ហ៊ុន សែន៕
