ក្រុមសិទ្ធិមនុស្សអន្តរជាតិមួយ បានរិះគន់ក្រុមប្រឹក្សាសិទ្ធិមនុស្សអង្គការសហប្រជាជាតិថា មានវិធានការទន់ខ្សោយចំពោះបញ្ហារំលោភសិទ្ធិមនុស្សនៅកម្ពុជា។
គណៈកម្មការអ្នកច្បាប់អន្តរជាតិ (International Commission of Jurists) បានលើកឡើងក្នុងសេចក្ដីថ្លែងការណ៍របស់ខ្លួនកាលពីថ្ងៃទី២៨ ខែកញ្ញាថា ក្រុមប្រឹក្សាសិទ្ធិមនុស្សអង្គការសហប្រជាជាតិមានវិធានការទន់ខ្សោយ មិនអាចជំរុញឲ្យរដ្ឋាភិបាលកម្ពុជាងាកទៅគោរពសិទ្ធិមនុស្ស និងនីតិរដ្ឋពិតប្រាកដ។
ការលើកឡើងរបស់គណៈកម្មការអ្នកច្បាប់អន្តរជាតិនេះ ត្រូវបានធ្វើឡើងក្រោយពីអ្នករាយការណ៍ពិសេសអង្គការសហប្រជាជាតិទទួលបន្ទុកសិទ្ធិមនុស្សកម្ពុជា លោកស្រី រ៉ូណា ស្មីត ដែលបានបង្ហាញរបាយការណ៍ស្ដីពីបញ្ហាសិទ្ធិមនុស្ស នីតិរដ្ឋ និងការបោះឆ្នោតនៅកម្ពុជា ក្នុងកិច្ចប្រជុំលើកទី៣៦នៅចំពោះមុខក្រុមប្រឹក្សាសិទ្ធិមនុស្សអង្គការសហប្រជាជាតិ នៅទីក្រុងហ្សឺណែវ ប្រទេសស្វីស កាលពីថ្ងៃទី២៦ ខែកញ្ញា។
ក្នុងកិច្ចប្រជុំនោះ លោកស្រី រ៉ូណា ស្មីត បានចោទសួរពីភាពត្រឹមត្រូវនៃការបោះឆ្នោតកាលពីថ្ងៃទី២៩ ខែកក្កដាកន្លងទៅ ខណៈលោកស្រីរកឃើញថា បោះឆ្នោតនៅកម្ពុជាកន្លងមកនេះ ពោរពេញដោយការរឹតត្បិតសិទ្ធិបញ្ចេញមតិ និងបង្ខិតបង្ខំពលរដ្ឋឲ្យចេញបោះឆ្នោត ការបិទប្រព័ន្ធផ្សព្វផ្សាយ ការយាយីអង្គការសង្គមស៊ីវិល និងការរំលាយគណបក្សប្រឆាំងដ៏ធំមួយមិនឲ្យចូលរួមប្រកួតប្រជែងការបោះឆ្នោត៕
