នាយករដ្ឋមន្រ្តីម៉ាឡេស៊ី លោក មហាធៀ មហាម៉េដ បានលើកឡើងថាក្រុមប្រឹក្សាសន្តិសុខអង្គការសហប្រជាជាតិចាំបាច់ត្រូវតែធ្វើកំណែទម្រង់។
លោក មហាធៀ បានស្នើបែបនេះក្នុងពេលដែលលោកថ្លែងសុន្ទរកថាក្នុងមហាសន្និបាតលើកលើកទី៧៣របស់អង្គការសហប្រជាជាតិនាទីក្រុងញូវយ៉កសហរដ្ឋអាមេរិកកាលពីថ្ងៃទី២៧ ខែកញ្ញា ឆ្នាំ២០១៨។
ក្នុងមហាសន្និបាតនោះ នាយករដ្ឋមន្រ្តីវ័យ៩៣ឆ្នាំរូបនេះ បានលើកសរសើរពីកិច្ចខិតខំប្រឹងប្រែងកន្លងមករបស់អង្គការសហប្រជាជាតិដើម្បីលុបបំបាត់ភាពក្រីក្រ ការពារបរិស្ថាន ក៏ដូចជារក្សាការពារសន្តិសុខនិងសន្តិភាពពិភពលោក ប៉ុន្តែលោកក៏បានស្នើដោយត្រង់ៗថាអង្គការសហប្រជាជាតិត្រូវតែធ្វើកំណែទម្រង់ជាពិសេសគឺក្រុមប្រឹក្សាសន្តិសុខរបស់ស្ថាប័ននេះតែម្តង។
លោកលើកឡើងថា ប្រទេស៥ដែលឈ្នះសង្រ្គាម(សង្រ្គាមលោកលើកទី២) តាំងពី៧០ឆ្នាំមុន មិនអាចមានសិទ្ធិបង្ខំឲ្យប្រទេសណាមួយធ្វើអ្វីតាមតែចិត្តខ្លួនចង់បានជារៀងរហូតនោះទេ។ លោកបន្តថាប្រទេសទាំងនោះ ក៏មិនអាចអះអាងផ្ដាច់មុខថាខ្លួនជាប្រទេសដែលមានលក្ខណៈសម្បត្តិល្អជាងប្រទេសដទៃក្នុងការផ្សព្វផ្សាយលទ្ធិប្រជាធិបតេយ្យ និងការផ្លាស់ប្តូររបបក្នុងប្រទេសផ្សងៗលើពិភពលោកបានទេ ប្រសិនណាបើពួកគេមិនធ្វើឲ្យមានលទ្ធិប្រជាធិបតេយ្យនៅក្នុងស្ថាប័ននេះជាមុននោះទេ។
ក្នុងមហាសន្និបាតនោះ លោក មហាធៀ ក៏បានស្នើជាយន្តការមួយចំនួនក្នុងការធ្វើកំណែទម្រង់ក្រុមប្រឹក្សានេះផងដែរ។ លោកផ្ដល់ជាយោបល់ ថាសមាជិកអចិន្រៃ្តយ៍នៃក្រុមប្រឹក្សាសន្តិសុខអង្គការសហប្រជាជាតិតែមួយប្រទេសមិនអាចមានសិទ្ធិវេតូ(សិទ្ធិបដិសេធ) លើសេចក្តីណាមួយរបស់ក្រុមប្រឹក្សានេះបានទេ ប៉ុន្តែការបដិសេធធ្វើឡើងទៅបានលុះត្រាណាតែមានការយល់ស្របគ្នារវាងសមាជិកអចិន្រៃ្តយ៍យ៉ាងហោចចាប់ពីពីរឡើងទៅ និងសមាជិកមិនអចិន្រៃ្តយ៍ចំនួនបីគាំទ្រ ហើយត្រូវមានការព្រមព្រៀងពីសមាជិកភាគច្រើននៃមហាសន្និបាតអង្គការសហប្រជាជាតិផងដែរ។
សមាជិកអចិន្រៃ្តយ៍របស់ក្រុមប្រឹក្សាសន្តិសុខអង្គការសហប្រជាជាតិ មាន៥ប្រទេសគឺអាមេរិក អង់គ្លេស បារាំង រុស្ស៊ី និងចិន និងសមាជិកមិនអចិន្រៃ្តយ៍ចំនួន១០ប្រទេសដែលត្រូវបានបោះឆ្នោតរាល់ ២ឆ្នាំម្តង។ តាមគោលការណ៍បច្ចុប្បន្នរបស់ក្រុមប្រឹក្សាសន្តិសុខអង្គការសហប្រជាជាតិ សេចក្តីសម្រេចណាមួយនឹងមិនអាចកើតមាននោះទេប្រសិន បើសមាជិកអចិន្រៃ្តយ៍ណាមួយបដិសេធ។
ទោះយ៉ាងណាលោកមហាធៀ ក៏ទទួលស្គាល់ថាពិភពលោកបើគ្មានអង្គការសហប្រជាជាតិទេនឹងជួបគ្រោះមហន្តរាយ តែដើម្បីធានាពីនិរន្តរភាព អង្គការនេះត្រូវការថវិកាទ្រទ្រង់ឲ្យបានគ្រប់គ្រាន់។ លោកក៏បានបន្ថែមដែរថាមិនគួរមានប្រទេសណាមួយគំរាមកំហែងនិរន្តន៍ភាពរបស់អង្គការនេះដោយយកលេសហិរញ្ញវត្ថុមកប្រើនោះទេ។ ការថ្លែងរបស់លោក មហាធៀបែបនេះ ហាក់ធ្វើឡើងជាការឌឺដងដល់សហរដ្ឋអាមេរិកដែលកាលពីចុងឆ្នាំ២០១៧កន្លងទៅ បានកាត់បន្ថយជំនួយដល់អង្គការសហប្រជាជាតិ បន្ទាប់ពីប្រទេសជាសមាជិកចំនួន១២០របស់អង្គការអន្តរជាតិដ៏ធំជាងគេមួយនេះ បានរិះគន់និងមិនយល់ស្របជាមួយអាមេរិកដែលទទួលស្គាល់ទីក្រុងយេរូសាឡឹមជារដ្ឋធានីរបស់ប្រទេសអុីស្រាអែល។
ក្រៅការស្នើឲ្យមានការធ្វើកំណែទម្រង់ក្រុមប្រឹក្សាសន្តិសុខអង្គការសហប្រជាជាតិ លោកមហាធៀ ក៏បានរិះគន់ផងដែរពីភាពព្រងើយកន្តើយរបស់ពិភពលោកចំពោះបញ្ហាជនជាតិប៉ាលេស្ទីនដែលត្រូវទទូលរងការធ្វើទុកបុកម្នេញពីសំណាក់រដ្ឋាភិបាលអីុស្រាអែល។ លោកថាពិភពលោកមិនបានចាត់វិធានការអ្វីចំពោះអីុស្រាអែលសោះ តែបែរជាផ្ដល់ជាអំណោយមួយដ៏ពិសេសដល់អីុស្រាអែលទៅវិញពោលគឺការទទួលស្គាល់ទីក្រុងយេរូសាឡឹមជារដ្ឋធានីរបស់ប្រទេសនេះ។
លោក មហាធៀ ក៏បានរំលឹកផងដែរថាបញ្ហាភេរវកម្មនឹងនៅតែមានបើពិភពលោកមិនស្វែងរកមួលហេតុដែលជាឬសគល់នៃបញ្ហានេះទេ។ ចំពោះ លោក មហាធៀ ដើមចមដែលបង្កើតឲ្យមានក្រុមភេវរករគឺកើតចេញពីការរឹបអូសយកដីពីជនជាតិប៉ាឡេស្ទីននៅឆ្នាំ១៩៤៨ដើម្បីបង្កើតជាប្រទេសអីុស្រាអែល។ លោកបន្តថា ដើម្បីដោះស្រាយបញ្ហាភេរវកម្ម ពិភពលោកត្រូវអនុញ្ញាតឲ្យជនជាតិប៉ាឡេស្ទីនទៅរស់នៅលើទឹកដីខ្លួនវិញ ហើយអនុញ្ញាតឲ្យពួកគេបង្កើតជារដ្ឋមួយផងដែរ៕
