តុលាការកំពូល នៅថ្ងៃនេះ បានសម្រេចឲ្យសាលាឧទ្ធរណ៍វិនិច្ឆ័យឡើងវិញនូវសំណុំរឿងអតីតមន្ត្រីសមាគមការពារសិទ្ធិមនុស្សអាដហុក ដែលត្រូវបានមន្ត្រីតុលាការខេត្តសៀមរាបពីររូប ប្តឹងពីបទបរិហារកេរ្តិ៍។
អតីតមន្ត្រីអាដហុក លោក នី ចរិយា ដែលបច្ចុប្បន្នជាអគ្គលេខាធិការរង គ.ជ.ប. ត្រូវបានសាលាឧទ្ធរណ៍សម្រេចដូចទៅនឹងសាលក្រមសាលាដំបូងរាជធានីភ្នំពេញផងដែរ ដែលបានកាត់ទោសដាក់ពន្ធនាគារ ៦ខែ និងពិន័យប្រាក់ ៦លានរៀល នៅក្នុងបណ្ដឹងបរិហារកេរ្តិ៍ដែលប្ដឹងដោយមន្ត្រីតុលាការខេត្តសៀមរាប។
មេធាវីការពារក្ដីឲ្យលោក នី ចរិយា គឺលោក សំ សុគង់ បានប្រាប់វីអូឌីនៅថ្ងៃនេះថា ចៅក្រមជំនុំជម្រះតុលាការកំពូល បានសម្រេចបញ្ជូនសំណុំរឿងនេះកូនក្ដីរបស់លោក ទៅឲ្យសាលាឧទ្ធរណ៍បើកសវនាការឡើងវិញ ដោយតុលាការសំអាងថា ការសម្រេចសេចក្ដីរបស់តុលាការថ្នាក់ក្រោមកន្លងមក ធ្វើឡើងមិនទាន់ត្រឹមត្រូវតាមអង្គច្បាប់ ខណៈភស្តុតាងមួយចំនួនដែលដើមបណ្ដឹងបានដាក់ទៅតុលាការទាំងអស់ គឺរកមិនឃើញថា លោកកូនក្ដីលោកបានប្រព្រឹត្តបទល្មើសនោះទេ។
លោកថា៖ «អត់មានភស្តុតាងគ្រប់គ្រាន់ ចំណុចទី២ ឲ្យពិនិត្យសិទ្ធិប្រជាពលរដ្ឋក្នុងការធ្វើបណ្ដឹងអន្តរាគមន៍ទៅស្ថាប័នរដ្ឋ ទី៣ ឲ្យមានការផ្ទៀងផ្ទាត់អូរីយោល នៅពេលដែលមានការថតសំឡេង នៅពេលធ្វើសន្និសទីកាសែត និងអត្ថបទសារព័ត៌មាន ហើយនិងចម្លើយរបស់កូនក្ដីដែលមានលក្ខណៈសង្ស័យ»។
លោក នី ចរិយា ត្រូវបានលោក សុក កែវបណ្ឌិត និងលោក គី ឬទ្ធី ដែលជាអតីតព្រះរាជអាជ្ញារង និងចៅក្រមស៊ើបសួរ ប្រចាំនៅសាលាដំបូងខេត្តសៀមរាប ប្ដឹងកាលពីពាក់កណ្ដាលឆ្នាំ២០១៥កន្លងមក ដោយចោទថា បរិហារកេរ្តិ៍ពួកគេ ក្រោយពីលោកថ្លែងក្នុងសន្និសីទសារព័ត៌មានមួយថា មន្ត្រីតុលាការខេត្តសៀមរាប ចាប់ខ្លួនពលរដ្ឋអ្នកមានទំនាស់ដីធ្លីអយុត្តិធម៌ ពាក់ព័ន្ធនឹងជម្លោះដីធ្លីមួយកន្លែងរវាងប្រជាពលរដ្ឋ និងសហគមន៍តាខ្មៅ ក្នុងខេត្តសៀមរាប។
ក្រៅពីសំណុំរឿងមួយនេះ លោក នី ចរិយា ក៏កំពុងប្រឈមមុខនឹងសំណុំរឿងមួយទៀត ដែលត្រូវបានតុលាការកម្ពុជាចោទថា «សមគំនិតក្នុងអំពើសូកប៉ាន់សាក្សី» ពាក់ព័ន្ធនឹងសំណុំរឿងមេដឹកនាំអតីតគណបក្សសង្គ្រោះជាតិ លោក កឹម សុខា ដែលត្រូវបានគេទម្លាយថា មានទំនាក់ទំនងសេ្នហាដ៏ចម្រូងចម្រាស់ជាមួយអ្នកនាង ខុម ចាន់តារាទី ហៅ ស្រីមុំ៕