អ្នកទោសឥណ្ឌូនេស៊ីជាង១ពាន់នាក់ បានរត់គេចចេញពីពន្ធនាគារក្នុងតំបន់ដែលរងការវាយប្រហារខ្លាំងដោយគ្រោះរញ្ជួយដីនិងរលកស៊ូណាមី។
តាមការចុះផ្សាយរបស់សារព័ត៌មានChannel News Asia អ្នកទោសឥណ្ឌូនេស៊ី១២០០នាក់បានគេចខ្លួនចេញពីមន្ទីរឃុំឃាំងចំនួន៣នៅក្នុងតំបន់ស៊ូឡាវេស៊ីបន្ទាប់ពីគ្រោះរញ្ជួយដីនិងរលកស៊ូណាមីបានវាយប្រហារតំបន់នោះកាលពីថ្ងៃ២៨ខែកញ្ញា ឆ្នាំ២០១៨។ តាមប្រភពដដែល ក្រុមអ្នកទោសទាំងនោះ បានរត់គេចចេញពីមន្ទីរឃុំឃាំងចំនួនពីរនៅទីក្រុងប៉ាលូនិងមួួយទៀតនៅទីក្រុងដុងហ្កាឡា។
រដ្ឋមន្រ្តីក្រសួងយុត្តិធម៌ម៉ាឡេស៊ី លោកស្រី Sri Puguh Utami មានប្រសាសន៍ប្រាប់សារព័ត៌មានខាងលើថាក្រុមអ្នកទោសទាំងនោះគេចខ្លួនដោយសារតែពួកគេបារម្ភខ្លាចបាត់បង់ជីវិត។ ប្រភពខាងលើឲ្យដឹងទៀតថា អ្នកទោសក្នុងពន្ធនាគារមួយនៅទីក្រុងប៉ាលូបានដើរគេចចេញដោយដើរឆ្លងកាត់ពីមុខឆ្មាំយាមពន្ធនាគារតែម្ដង ហើយចំណែកអ្នកទោសនៅពន្ធនាគារមួយទៀតបានរំលាយច្រកទ្វាធំចេញមកតែម្ដង។ ដោយឡែកអ្នកទោសនៅពន្ធនាគារមួយនៅទីក្រុងដុងហ្កាឡាវិញ បាននាំគ្នាដុតភ្លើងក្នុងមន្ទីរឃុំឃាំងតែម្ដងដើម្បីឲ្យឆ្មាំពន្ធនាគារលែងពួកគេចេញ។
តាមសេចក្តីរាយការណ៍របស់សារព័ត៌មានBBC គ្រោះរញ្ជួយដីនិងរលកស៊ូណាមីដែលវាយប្រហារតំបន់តំបន់ស៊ូឡាវេស៊ីរបស់ឥណ្ឌូនេស៊ីកាលពីថ្ងៃសុក្រសប្ដាហ៍មុន បានបណ្ដាលឲ្យមនុស្ស៨៤៤ បាត់បង់ជីវិត ហើយមនុស្សជាច្រើននាក់ទៀតនៅតែបន្តបាត់ខ្លួននៅឡើយ៕
