ស្ថានទូតកម្ពុជាប្រចាំនៅសាធារណៈរដ្ឋឥណ្ឌូនេស៊ីបានជូនដំណឹងដល់ប្រជាពលរដ្ឋខ្មែរ កុំឲ្យធ្វើដំណើរទៅកាន់តំបន់មួយចំនួននៅក្នុងប្រទេសនេះ បន្ទាប់ពីត្រូវបានវាយប្រហារដោយរញ្ជួយដី និងរលកយក្សស៊ូណាមិ។
ក្នុងសេចក្ដីជូនដំណឹងកាលពីម្សិលមិញ ស្ថានទូតកម្ពុជាប្រចាំនៅប្រទេសឥណ្ឌូនេស៊ីបានស្នើដល់ប្រជាពលរដ្ឋខ្មែរ ឲ្យផ្អាកធ្វើដំណើរទៅកាន់ទីក្រុងប៉ាលូ និងទីក្រុងដូងខាឡា ភាគកណ្ដាលនៃខេត្តស៊ូឡាវ៉េស៊ី បន្ទាប់ពីតំបន់ទាំងនេះ ត្រូវបានគ្រោះរញ្ជួយដី និងរលកស៊ូណាមិញវាយប្រហារកាលពីថ្ងៃសុក្រចុងសប្ដាហ៍មុន។
យ៉ាងណាក៏ដោយ មន្ដ្រីស្ថានទូតកម្ពុជាប្រចាំនៅឥណ្ឌូនេស៊ី ប្រាប់ VOD ថា ស្ថានទូតមិនទាន់ទទួលបានដំណឹងណាមួយពាក់ព័ន្ធនឹងការប៉ះពាល់ប្រជាពលរដ្ឋខ្មែរដែលរស់នៅក្បែរតំបន់ដែលវាយទទួលរងការប្រហារដោយការរញ្ជួយដីនិងស៊ូណាមិនៅឡើយទេ។
បន្ថែមលើសពីនេះ បើតាមសេចក្ដីប្រកាសព័ត៌មានកាលពីម្សិលមិញ ក្រសួងការបរទេសកម្ពុជាក៏បានប្រកាសផ្ដល់ជំនួយមនុស្សធម៌ជាទឹកប្រាក់ចំនួន ២០ម៉ឺនដុល្លារអាមេរិក ក្នុងគោលបំណងជួយដល់ជនរងគ្រោះ ដោយសារមហន្ដរាយនៃគ្រោះធម្មជាតិនេះ។
បើតាមសារព័ត៌មាន Jakarta Post របស់ឥណ្ឌូណេស៊ី ឲ្យដឹងថា តួលេខអ្នកស្លាប់ដោយសាររញ្ជួយដីកម្លាំង ៧.៤រ៉ិចទ័រ និងរលកស៊ូណាមិនៅក្នុងប្រទេសនេះ កាលពីថ្ងៃសុក្រកន្លងមក បានបណ្ដាលមនុស្សចំនួន ៨៤៤នាក់ស្លាប់ និងព្យាករថា ចំនួននេះអាចនឹងកើនឡើងថែមទៀត ខណៈដែលក្រុមអ្នកជួយសង្គ្រោះកំពុងតែស្វែងរកអ្នកនៅរស់រានមានជីវិត៕