សមាគមវៀតណាមមួយប្រចាំខេត្តកំពង់ឆ្នាំង អះអាងថា ខ្លួនបានសហការជាមួយក្រុមហ៊ុនឯកជនមួយ ដើម្បីផ្ដល់ដីដល់ប្រជាពលរដ្ឋខ្មែរវៀតណាមប្រមាណជាង៨០០រយគ្រួសារ បន្ទាប់ពីពួកគេត្រូវបានអាជ្ញាធរកម្ពុជាតម្រូវឲ្យផ្លាស់ទីតាំងពីការរស់នៅលើផ្ទៃទឹក មកស្នាក់បណ្ដោះអាសន្ននៅលើគោកវិញ។
ប្រធានសមាគមសមាគមវៀតណាមប្រចាំខេត្តកំពង់ឆ្នាំង លោក ប៊ួច វ៉ឹងប៊ែល ប្រាប់វីអូឌីនៅថ្ងៃនេះថា សមាគមនេះ មិនមានលទ្ធភាពជួលដីឲ្យប្រជាពលរដ្ឋវៀតណាមរស់នៅនោះទេ ប៉ុន្តែលោកថា មានប្រជាពលរដ្ឋខ្មែរបានស្ម័គ្រចិត្តផ្ដល់ដីឲ្យប្រជាពលរដ្ឋខ្លួនរស់នៅបណ្ដោះអាសន្នសិន។
លោកថា៖«អត់មានឯកជនទេ គាត់គ្រាន់តែជាម្ចាស់ដី គេមានដីតែប៉ុណ្ណឹងទេ គាត់ជាប្រជាពលរដ្ឋធម្មតាទេ ហើយគាត់ជាជនជាតិខ្មែរ ហើយបច្ចុប្បន្នគាត់ចូលរួម ចូលធ្វើការជាមួយសមាគមដែរ»។
នៅពេលអ្នកសាព័ត៌មានសួរថា តើប្រជាពលរដ្ឋខ្មែរដែលយល់ព្រមផ្ដល់ដីដល់ពលរដ្ឋវៀតណាមស្នាក់នៅ មានចំនួនប៉ុន្មានហិតកា និងគាត់ឈ្មោះអ្វីដែរនោះ?
លោក ប៊ួច វ៉ឹងប៊ែល អះអាងថា អ្នកដែលសម្រេចផ្ដល់ដីនោះ ជាប្រជាពលរដ្ឋធម្មតាមិនមានតួនាទីអ្វីនោះទេ ប៉ុន្តែលោកបញ្ជាក់ថា នៅថ្ងៃមុខពលរដ្ឋវៀតណាមទាំងនោះមានសិទ្ធិជួលដីដែលប្រជាពលរដ្ឋដល់ឲ្យនៅស្នាក់សិននោះបាន ដោយសមាគមនឹងជួយសម្រួលដល់ពួកគេ។
អភិបាលរងខេត្តកំពង់ឆ្នាំង លោក ស៊ុន សុវណ្ណរិទ្ធិ មានប្រសាសន៍ថា បច្ចុប្បន្នដៃគូឯកជនសហការជាមួយសមាគមវៀតណាមបានសម្រេចផ្ដល់ដីចំនួន ៣៥ ហិកតា សម្រាប់ប្រជាពលរដ្ឋវៀតណាមដែលរស់នៅ លើផ្ទះបណ្ដែតទឹកជាប់ក្រុងកំពង់ឆ្នាំងតែប៉ុណ្ណោះ សម្រាប់ទីតាំងផ្សេងៗទៀតមិនទាន់ដឹងនៅឡើយ ។ លោកបន្តថា ជនជាតិវៀតណាម ដែលត្រូវបានបម្លាស់ទីមកលើគោកទាំងអស់គឺត្រូវស្ថិតក្រោមការគ្រប់គ្រងរបស់អាជ្ញាធរមូលដ្ឋានក្នុងតំបន់នោះ។
លោកថា៖«គ្រប់គ្រងតាមផ្លូវច្បាប់អាហ្នឹង តាមរដ្ឋបាលភូមិឃុំ។ អាហ្នឹងគឺអាជ្ញាធរគ្រប់គ្រង ប៉ុន្តែគ្រាន់តែជាលក្ខណៈដោយឡែក គាត់សហការជាមួយដៃគូឯកជន ហើយគាត់ដោះស្រាយជាមួយប្រជាពលរដ្ឋគាត់ឲ្យជួលឲ្យអី អាហ្នឹងជាផ្ទៃក្នុងរបស់គាត់ទេ។ អាជ្ញាធរសម្របសម្រួលជួយ តទឹក តភ្លើងអី បង្កលក្ខណៈធ្វើម៉េច ឲ្យបងប្អូនប្រជាពលរដ្ឋមានលក្ខណៈងាយស្រួល ប៉ុន្តែសម្រាប់ផ្ទៃក្នុងរបស់គាត់! គាត់ជួលអីជារឿងផ្ទៃរបស់គាត់»។
លោកបន្តថា ការសម្រេចបម្លាស់ទីទីតាំងថ្មីសម្រាប់ជនជាតិវៀតណាម ដែលរស់តាមដងទន្លេទូទាំងខេត្តកំពង់ឆ្នាំង ឲ្យទៅរស់នៅលើគោកវិញគឺធ្វើឡើងដើម្បីលើកកម្ពស់សោភ័ណ្ឌភាព បញ្ជៀសផលប៉ះពាល់សុខភាព ជាពិសេសការប្រើប្រាស់ទឹក ។
បើតាមអភិបាលរងខេត្តរូបនេះ ជនជាតិវៀតណាមដែលត្រូវបានធ្វើការផ្លាស់ប្តូរការរស់នៅលើផ្ទះបណ្ដែតទឹក ឲ្យទៅនៅលើគោកវិញនេះមានចំនួន២,៣៩៧គ្រួសារ ហើយតំបន់ដែលជនជាតិវៀតណាមដែលរស់នៅច្រើនជាងគេ គឺនៅម្តុំផ្សារក្រោម និងនៅតំបន់ឆ្នុកទ្រូ ស្ថិតក្នុង ស្រុកបរិបូរណ៌ និងនៅស្រុកកំពង់ត្រឡាចជាដើម៕
