មន្ត្រីជំនាញរបស់រដ្ឋាភិបាល មិនទាន់ប្រាប់ថាក្រុមណាមួយនៅពីក្រោយការជួញដូរអាវុធខុសច្បាប់នៅឡើយទេ បើទោះបីចំណាត់ការឈានទៅចាប់ខ្លួនជនសង្ស័យម្នាក់ទៀតក៏ដោយ។
បុរសម្នាក់ទៀតឈ្មោះ ថង ឌី អាយុ ៤៤ឆ្នាំ ត្រូវបានសមត្ថកិច្ចចាប់ខ្លួន កាលពីម្សិលមិញ នៅខេត្តព្រះវិហារហើយពេលនេះ មន្ត្រីជំនាញរបស់ក្រសួងមហាផ្ទៃ កំពុងសាកសួរ ។
អ្នកនាំពាក្យអគ្គស្នងការនគរបាលជាតិ លោក ឆាយ គឹមឃឿន ឲ្យVODដឹងនៅថ្ងៃពុធនេះថា បុរសម្នាក់នោះ នឹងត្រូវបញ្ចូនទៅតុលាការមិនឲ្យលើសពី៤៨ម៉ោង។ប៉ុន្តែលោកសុំមិនធ្វើអត្ថាធិប្បាយលម្អិតថា តើជនង្ស័យនេះ ជាប់ពាក់ព័ន្ធឬអត់ទេ ទៅនឹងជនសង្ស័យទាំង៨នាក់ទៀតដែលតុលាការបង្គាប់ឲ្យឃុំខ្លួនរួចហើយក្នុងករណីដូចគ្នានេះ ។
អ្នកនាំពាក្យរូបនេះ ក៏សុំមិនទាន់ប្រាប់ថា តើមានគណបក្សណា ឬក្រុមណាមួយ ពិតប្រាកដនៅពីក្រោយការលាក់ទុកអាវុធទុកដោយខុសច្បាប់នេះដែរ ដោយថាទុកឲ្យតុលាការ ដំណើរការនីតិវិធី ។
លោកថា៖«ឆ្លើយអត់បានទេ អាអូន សំនួរហ្នឹង ទុកសិនទៅ»។
កាលពីថ្ងៃទី១តុលា សាលាដំបូងរាជធានីភ្នំពេញ បានបង្គាប់ឲ្យឃុំខ្លួន ជនង្ស័យ៨នាក់ បណ្តោះអាសន្ននៅពន្ធនាគារ ចោទពីបទ«ជួញដូរអាវុធខុសច្បាប់»ក្រោយពីសមត្ថកិច្ចចាប់ខ្លួនពួកគេជាបន្តបន្ទាប់នៅទីតាំង៣កន្លែងផ្សេងគ្នា ដូចជានៅខេត្តកំពត ខេត្តកំពង់ស្ពឺ ពោធិ៍សាត់ និងរាជធានីភ្នំពេញ និងបានអះអាងថារកឃើញវត្ថុតាង អាវុធមួយចំនួន។
រដ្ឋមន្រ្តីក្រសួងមហាផ្ទៃលោក ស ខេង បានសរសេរនៅលើហ្វេសប៊ុករបស់លោក កាលពីម្សិលមិញថា នៅប៉ុន្មានថ្ងៃនេះ កងកម្លាំងនគរបាលជាតិបានស្រាវជ្រាវ និង ធ្វើការចាប់ខ្លួន សកម្មជន និង មេក្លោង ចលនាប្រដាប់អាវុខុសច្បាប់នៅទូទាំងប្រទេស បានចំនួន៩នាក់ ដោយរឹបអូសអាវុធវែង៣០ដើម អាវុធខ្លីមួយដើម និង ឧបករណ៍ សម្ភារផ្សំគ្រឿងផ្ទុះមួយចំនួនទៀត។
អ្នកវិភាគនយោបាយវ័យក្មេង លោក ហង្ស វិទូ សាទរចំពោះវិធានការច្បាប់។ ប៉ុន្តែលោកជំរុញសមត្ថកិច្ច ធ្វើការស៊ើបអង្កេតករណីនេះ ឲ្យមានតម្លាភាព ។
លោកថា៖«អ្វីដែលយើងចង់ឃើញគឺចង់ឃើញឲ្យមានភស្តុតាងពិតប្រាកដ ហើយភស្តុតាងហ្នឹងជាភស្តុតាងដែលអាចជឿជាក់បាន ដើម្បីឲ្យពលរដ្ឋបានដឹងហេតុការណ៍ពិតប្រាកដ»។
ទោះជាយ៉ាងណា រដ្ឋមន្ត្រីក្រសួងមហាផ្ទៃ លោក ស ខេង បានចាត់ទុកជនសង្ស័យដែលបានចាប់ខ្លួនទាំងនោះថា ជាក្រុមប្រដាប់អាវុធអាណាធិបតេយ្យ និងបានប្រកាសផ្តល់រង្វាន់លើកទឹកចិត្តដល់កងម្លាំងដែលបានចុះបង្ក្រាបករណីនេះចំនួន៥ម៉ឺនដុល្លារ។