តុលាការខេត្តព្រះសីហនុនៅថ្ងៃនេះ បានសម្រេចផ្តន្ទាទោសតំណាងប្រជាសហគមន៍មានជម្លោះដីធ្លីចំនួន៤នាក់ឲ្យជាប់ពន្ធនាគារម្នាក់ៗចំនួន១ឆ្នាំ តាមបណ្តឹងរបស់ឧកញ៉ាពីររូបមានឈ្មោះតាន់ តាប់ និងលោក ឡុញ វណ្ណ:។
តំណាងសហគមន៍ចំនួន៤នាក់នោះមានលោកស្រី ឡុច ទូច លោក ញ៉ាញ់ ជាតិ លោក មែន ខេន និងលោក កៅ ហេង ត្រូវបានតុលាការខេត្តព្រះសីហនុ ឃុំខ្លួនជាង៤ខែហើយជុំវិញមានវិវាទដីធ្លី។
បន្ទាប់ពីសវនាការពេញមួយព្រឹកហើយបន្តដល់រសៀលថ្ងៃពុធនេះ ចៅក្រមនៃអង្គជំនុំជម្រះបានសម្រេចឲ្យតំណាងប្រជាសហគមន៍ជាប់ទោសជាប់ទោសម្នាក់ៗ១ឆ្នាំ ក្រោមបទចោទប្រើប្រាស់ហិង្សារលើអ្នកកាន់កាប់អចលនៈវត្ថុដោយសុចរិត [ចូលទៅកាន់កាប់លើដីឯកជនមានប័ណ្ណកម្មសិទ្ធ] ស្ថិតក្នុងឃុំអូរត្រេះ ស្រុកស្ទឹងហាវ។
ក្រោយការសម្រេចរបស់ចៅក្រមភ្លាមៗនោះ ប្រជាសហគមន៍រាប់រយនាក់ដែលប្រមូលផ្តុំនៅមុខតុលាការគាំទ្រតំណាងរបស់ពួកគេនាំគ្នាទ្រហោយំ ខ្លះផ្តួលខ្លួនទៅនឹងដី ខ្លះយំរហូតដល់គាំង។ ពួកគេចាត់ទុកការសម្រេចនេះថា ជារឿងអយុត្តិធម៌ហើយអំពាវនាវឲ្យលោក ហ៊ុន សែនជួយរកយុត្តិធម៌។ នេះបើតាមវីឌីឡាយតាមហ្វេសប៊ុកពីកន្លែងប្រមូលផ្តុំ។
អនុប្រធានគណៈកម្មការគ្រប់គ្រងសហគន៍មានជម្លោះដីធ្លីខេត្តព្រះសីហនុ លោក យូរវាសនា ដែលចូលស្តាប់ សវនាការនោះឲ្យដឹងថា តុលាការសម្រេចកាត់ទោសតំណាងពលរដ្ឋទាំង៤នោះឲ្យជាប់ពន្ធនាគារ១ឆ្នាំ ដោយអនុវត្តទោស៧ខែ និងផាកពិន័យជា២០លានរៀល។
លោកបន្ថែមថា«សម្រាប់ខ្ញុំជាប្រជាពលរដ្ឋ និងប្រជាសហគមន៍ទាំង១៣នេះមានការខកចិត្តជាខ្លាំងចំពោះតុលា ការដែលធ្វើការចោទប្រកាន់ពួកគាត់បែបនេះ ពីព្រោះយើងមើលឃើញថា នៅក្នុងសវនាការគឺមេធាវីការពារក្តីឲ្យ តំណាងពលរដ្ឋអ្នកស្រីឡុចទូច និងពលរដ្ឋ៣នាក់ទៀត គឺគាត់មានសំណួរដេញដោលធ្វើឲ្យខាងតុលាការក៏ដូចមេធាវីដើមបណ្តឹងហ្នឹងគាំងម៉ាស៊ីនហ្មងគ្មានអ្វីតបតនោះទេ»។
មេធាវីការពារក្តីឲ្យតំណាងពលរដ្ឋទាំង៤នាក់គឺលោក ស៊ុយ ឈុនហាក់ មានប្រសាសន៍ថា បើពិនិត្យលើផ្លូវច្បាប់គឺកូនក្តីរបស់លោកត្រូវបានដោះលែង ដោយលោកថា ដីដែលកំពុងមានជម្លោះនោះជាតំបន់គម្រប់ព្រៃឈើរបស់រដ្ឋ ដែលតាមផ្លូវច្បាប់ គឺដើមបណ្តឹងមិនមានគុណសម្បត្តិគ្រប់គ្រាន់ក្នុងការប្តឹងពលរដ្ឋទាំង៤នាក់នោះឡើយ។
លោកបន្ថែមថា« តាមផ្លូវច្បាប់គេនិរាសករដីនោះអស់ហើយ អញ្ចឹងកន្លែងនោះជាដីរបស់រដ្ឋ ដល់អញ្ចឹងមានតែរដ្ឋទេមានសិទ្ធមកប្តឹងកូនក្តីខ្ញុំនេះ មិនមែនបុគ្គលមកប្តឹងទេ អញ្ចឹងពាក់ព័ន្ធបុគ្គលនិងបុគ្គលវាអត់ត្រូវ ហើយខាងមន្ត្រីសុរិយោដីគាត់អត់ទាន់បានឆ្លើយតបថា ដីហ្នឹងជាដីរបស់អ្នកណា នៅចំណុចណា អត់មាននិយាមការអ័ក្ស ស៊ីស អរដោនេនៅកន្លែងណាទេ»។
តំណាងពលរដ្ឋឲ្យដឹងថា ខណៈតុលាការបើកសវនាការសុំណុំរឿងតំណាងពលរដ្ឋទាំង៤នាក់នោះ នៅថ្ងៃនេះ ប្រជាសហគមន៍ចំនួន១៣ដែលមនុស្ស៣៥០នាក់បានប្រមូលផ្តុំគ្នាមុខតុលាការដើម្បីគាំទ្រ និងទាមទារទៅដោះលែងតំណាងពលរដ្ឋ៤នាក់នោះឲ្យមានសេរីភាពវិញ៕