តារាសម្តែងល្បីឈ្មោះម្នាក់របស់ចិននាង ហ្វាន់ ពីងពីង យល់ព្រមបង់ពន្ធដែលនៅសេសសល់ និងបង់ប្រាក់ផាកពិន័យជិត១៣០លានដុល្លារ ក្រោយពេលដែលអាជ្ញាធរចិនរកឃើញថានាងប្រើប្រាស់កិច្ចសន្យាការងារមួួយដែលធ្វើឡើងដើម្បីបំភាន់ភ្នែកក្រុមមន្រ្តីពន្ធដា។
តាមលិខិតសុំទោសដែលតារាសម្ដែងរូបនេះ បានបង្ហោះក្នុងបណ្ដាញសង្គមវ៉េបួរ បស់ខ្លួនកាលពីម្សិលមិញ ហើយត្រូវបានបកប្រែជាភាសាអង់គ្លេសដោយសារព័ត៌មានSouth China Morning Post របស់ហុងកុង នាង ហ្វាន់ ពីងពីង ថាខ្លួនទទួលយកទាំងស្រុងនូវការសម្រេចរបស់អាជ្ញាធរពន្ធដារចិនដែលដាក់ពិន័យមកលើនាង ព្រោះថាវាធ្វើឡើងស្របតាមច្បាប់ដែលមានជាធរមាន។ នាង ហ្វាន់ ពីងពីង ក៏បានសម្តែងនូវការសោកស្ដាយផងដែរចំពោះទង្វើរបស់នាងដែលរយៈកន្លងមកនាងមិនគោរពផលប្រយោជន៍របស់រដ្ឋ និងសង្គម ហើយបានប្រើប្រាស់កិច្ចសន្យាបែបបន្លំដើម្បីគេចវេសការបង់ពន្ធ ជាពិសេសនៅពេលដែលនាងចូលរួមសម្ដែងក្នុងខ្សែភាពយន្ត Air Strike និងភាពយន្តមួយចំនួនទៀត។
អាជ្ញាធរទទួលបន្ទុកពន្ធដាចិន ចាប់ផ្តើមស៊ើបអង្កេតលើករណីនាង ហ្វាន់ ពីងពីង ក្រោយពេលដែលពិធីករម្នាក់របស់ទូរទស្សន៍រដ្ឋចិនCCTV បានបង្ហោះក្នុងបណ្ដាញសង្គមនូវកិច្ចសន្យាការងារចំនួន២ដែលតារាសម្តែងរូបនេះបានចុះជាមួយក្រុមហ៊ុនមួួយនៅពេលចូលរួមសម្តែងក្នុងខ្សែភាពយន្តមួយ។ កិច្ចសន្យាការងារទី១បង្ហាញថា នាងហ្វាន់ ពីងពីង ទទួលបានកម្រៃតែជាង១លានដុល្លារប៉ុណ្ណោះ តែកិច្ចសន្យាការងារមួួយទៀតក៏បង្ហាញថានាងទទួលបានរហូតដល់ជាង៧លានដុល្លារបន្ថែមទៀតឯណោះ។ តាមការចុះផ្សាយរបស់សារព័ត៌មាន South China Morning Post នៅពេលដែលនាងយកឯកសារទៅបង្ហាញដើម្បីបង់ពន្ធ នាងបានប្រើកិច្ចសន្យាការងារទី១ ដែលវាបានធ្វើឲ្យចំនួនប្រាក់ដែលនាងត្រូវបង់ពន្ធមានចំនួនតិចតួចប៉ុណ្ណោះ។ វិធីសាស្រ្តដែលតារាសម្ដែងរូបនេះប្រើមិនមែនជារឿងថ្មីនោះទេដែលតារាភាពយន្តចិនល្បីៗភាគច្រើបានប្រើដើម្បីបន្លំភ្នែកដល់មន្រ្តីពន្ធដាចិន។ វិធីសាស្រ្តនេះត្រូវបានគេឲ្យឈ្មោះថាកិច្ចសន្យា«យិន និង យ៉ាង» ។
ចាប់តាំងពីខែមិថុនាឆ្នាំ២០១៨មក នាង ហ្វាន់ ពីងពីង ត្រូវបានអាជ្ញាធរទទួលពន្ធដាចិនដាក់ឲ្យស្ថិតក្រោមការតាមដាននិងស៊ើបអង្កេតនៅកន្លែងមួយដែលមិនត្រូវបានបង្ហាញឲ្យដឹងជាសាធារណៈនោះទេ។ ករណីនេះជាទម្រង់នៃការឃុំខ្លួនបែបសំងាត់មួយដែលអាជ្ញាធរចិនតែងតែធ្វើចំពោះមន្រ្តីពុករលួយ សកម្មជនសិទ្ធិមនុស្ស និងមេធាវីការពារសិទ្ធិមនុស្សជាដើម។ នាង ហ្វាន់ ពីងពីង ត្រួវបានអាជ្ញាធរចិនដោះលែងឲ្យរួចផុតពីការឃ្លាំមើលកាលពីពីរសប្តាហ៍មុន។
តាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួរ នាងហ្វាន់ ពីងពីង នឹងគ្មានទោសឧក្រិដ្ឋណាមួយឡើយ ប្រសិនបើនាងយល់ព្រមបង់ពន្ធដែលនៅសេសសល់និងបង់ប្រាក់ពិន័យដែលកំណត់ដោយអាជ្ញាធរពន្ធដាចិន ប៉ុន្តែពេលវេលាកំណត់នៃការបង់ប្រាក់ទាំងនោះពុំត្រូវបានបង្ហាញជាសាធារណៈនោះទេ។
ការស៊ើបអង្កេតទៅលើតារាសម្តែងវ័យ៣៧ឆ្នាំរូបនេះ ក៏ត្រួវបានធ្វើឡើងស្របពេលដែលតម្លៃខ្លួនរបស់តារាសម្តែងចិនមានការកើនឡើង។ តម្លៃខ្លួនក្នុងការសម្តែងភាពយន្តមានការកើនឡើងក៏ពិតមែន ប៉ុន្តែតារាសម្ដែងភាគច្រើនតែងតែប្រើវិធីសាស្រ្តស្រដៀងគ្នានឹងនាងនាងហ្វាន់ ពីងពីង ដើម្បីចំណាយតិចក្នុងការបង់ពន្ធ៕