អាជ្ញាធរជាតិអប្សរាព្រមានចាត់វិធានការផ្លូវច្បាប់ ចំពោះបុគ្គលណាដែលនៅតែបន្តផ្សព្វផ្សាយលក់ដីនៅក្នុងតំបន់រមណីយដ្ឋានអង្គរ។
ការព្រមាននេះ ធ្វើឡើងបន្ទាប់ពីមានការផ្សព្វផ្សាយលើបណ្ដាញសង្គមទាក់ទងនឹងការប្រកាសលក់ដីធ្លីក្នុងតំបន់រមណីយដ្ឋានអង្គរនៅតំបន់១ និងតំបន់២។
ក្នុងសេចក្ដីជូនដំណឹងចុះថ្ងៃទី៣ ខែតុលា ឆ្នាំ២០១៨នេះ អាជ្ញាធរអប្សរា ឲ្យដឹងថា អាជ្ញាធរនឹងចាត់វិធានការផ្លូវច្បាប់ ចំពោះបុគ្គលណាដែលនៅតែបន្តផ្សព្វផ្សាយភូតកុហកសាធារណជនក្នុងគោលបំណងកេងចំណេញដីធ្លីតំបន់រមណីដ្ឋានអង្គរ ព្រោះថាដីក្នុងតំបន់១និងតំបន់២ ជាប្រភេទដីសាធារណៈរបស់រដ្ឋ ហើយគ្មានការអនុញ្ញាតឲ្យមានការទិញលក់ដីធ្លីនៅក្នុងតំបន់នោះទេ។
អ្នកនាំពាក្យអាជ្ញាធអាជាតិអប្សរាលោក ឡុង កុសល ប្រាប់វីអូឌីបន្ថែមថា អ្នកយកដីតំបន់រមណីដ្ឋានអង្គរពុះជាឡូតិ៍លក់ គឺជាក្រុមហ៊ុនឯកជនតូចៗ ប៉ុន្តែលោកមិនទាន់ដឹងនៅឡើយថា ដីដែលត្រូវបានក្រុមហ៊ុនពុះជាឡូតិ៍លក់នោះអស់ចំនួនប៉ុន្មាននោះទេ។ លោកបន្តថា អាជ្ញាធរមិនទទួលខុសត្រូវនោះទេ ចំពោះប្រជាពលរដ្ឋណាដែលបានទិញដីនោះរួចហើយ។
លោកថា៖ «ខ្ញុំមិនទាន់ប្រាកដ។ បើតាមតែទទួលព័ត៌មានមក លឺថាប្រហែលជាមានអ្នកទិញរួចហើយ! អញ្ចឹងហើយជៀសវាងកុំឲ្យមានការខូចខាតទៅដល់ទិញដូរហ្នឹង អាដីដែលប្រភេទជាដីសាធារណៈរបស់រដ្ឋអញ្ចឹង វានាំឲ្យមានការខូចខាតព្រោះយើងមិនអនុញ្ញាតឲ្យមានការសាងសងសំណង់ណាមួយដោយគ្មានការអនុញ្ញាតពីអាជ្ញាធរអប្សរាទេ»។
បើតាមលោក ឡុង កុសល ដីតំបន់រមណីដ្ឋានអង្គរមានទំហំ៤០១គីឡូម៉ែត្រក្រឡា៕