លោកនាយករដ្ឋមន្ត្រី ហ៊ុន សែន ព្រមានថាកិច្ចប្រជុំអាស៊ី-អឺរ៉ុប នៅពេលខាងមុខ នឹងបរាជ័យ បើក្នុងកិច្ចប្រជុំនោះ លើកយកបញ្ហាផ្ទៃក្នុងរបស់កម្ពុជាមកជជែក។
ក្នុងទិវាគ្រូបង្រៀនពិភពលោក ដែលធ្វើឡើងក្នុងរាជធានីភ្នំពេញ នៅថ្ងៃនេះ លោកហ៊ុន សែន ឌឺដងមិនបញ្ចេញឈ្មោះ ទំនងជាសំដៅទៅអតីតមេដឹកនាំបក្សប្រឆាំង លោក សម រង្ស៊ី ថា បានបរាជ័យក្នុងការចេញមុខដឹកនាំបាតុកម្មប្រឆាំងរូបនៅមហាសន្និបាទអង្គការសហប្រជាតិ លើទឹកដីអាមេរិក ក្នុងបូរីញូវយ៉ក កាលពីខែមុន ក្នុងការជំរុញឲ្យព្យួរអាសនៈរបស់កម្ពុជា។
លោក ហ៊ុន សែន ថ្លែងទៀតថា ក្រុមនេះមិនបញ្ឈប់សកម្មភាពនេះទេ ដោយមានស្ត្រីខ្លះ បានអះអាងថា កិច្ចប្រជុំអាស៊ីអឺរ៉ុបនឹងនិយាយពីបញ្ហាកម្ពុជា ។
លោកថា៖«មីនាងមួយនោះ។ ខ្ញុំហៅមីនាងអញ្ចឹងចោះ។ វាថាមុខជាមាននិយាយ សុំទោស បើសិនជាហ៊ាននិយាយពីកម្ពុជាក្នុងសេចក្តីថ្លែងការណ៍សេចក្តីថ្លែងការណ៍អាស៊ីអឺរ៉ុបចេញអត់រួច។ ខ្ញុំនិយាយអញ្ចឹងម៉ង។ ព្រោះអានេះធ្វើការតាមកុងសង់ស៊ីស[ឯកភាព]»។
ទោះជា លោក ហ៊ុន សែន ថ្លែងមិនបញ្ចេញឈ្មោះ ប៉ុន្តែគេដឹងថា អតីតមន្ត្រីជាន់ខ្ពស់របស់គណបក្សប្រឆាំង ជាស្ត្រី មានលោក ស្រី មូរ សុខហួរ និងកូនស្រី លោក កឹម សុខា គឺកញ្ញា កឹម មនោវិទ្យា កំពុងតស៊ូមតិផ្នែកការទូត នៅក្រៅប្រទេស ទាមទារឲ្យសហគមន៍អន្តរជាតិជួយស្តាប្រជាធិបតេយ្យនៅកម្ពុជាឡើងវិញ ក្រោយពីគណបក្សប្រឆាំងនេះ ត្រូវបានតុលាការរំលាយ និងឃាត់មន្ត្រី១១៨នាក់ទៀត មិនឲ្យធ្វើនយោបាយរយៈពេល៥ឆ្នាំ។
លោក ស្រី មូរ សុខហួរ បាននិយាយតាមវីដេអូឃ្លីប លើគេហទំព័រហ្វេសប៊ុករបស់លោកស្រីថា ការតស៊ូមតិរបស់គណបក្សប្រឆាំងនេះ កំពុងទាក់ទាញការចាប់អារម្មណ៍ ពីប្រទេសលោកសេរី ពីសេស សភា អឺរ៉ុប ដែលមានសមាជិក២៨ប្រទេស និងសហភាពអន្តរសភា(IPU)ដែលមានសមាជិក១៧៣ប្រទេស នៅតែជំរុញឲ្យរដ្ឋាភិបាលកម្ពុជាស្តាប្រជាធិបតេយ្យឡើងវិញ។
លោកស្រីថា៖«ខ្ញុំឃើញថា ជំហររបស់អន្តរជាតិទាំងសហភាពអឺរ៉ុប ឥឡូវទាំង (IPU)ទៀតនិងគណៈកម្មការសិទ្ធិមនុស្សនៅអង្គការសហប្រជាជាតិជំហរគេនៅដដែល គឺការបោះឆ្នោតក្លែងក្លាយគេមិនអាចទទួលយកបានទេ»។
អ្នកជំនាញផ្នែកគោលនយោបាយ និងកិច្ចការពិភពលោកនៅមហាវិទ្យាល័យ Occidental សហរដ្ឋអាមេរិក លោក អ៊ា សុផល ពន្យល់ថា កម្ពុជាពិតជា អាចធ្វើឲ្យកិច្ចប្រជុំនេះចេញសេចក្តីថ្លែងការណ៍មិនរួច បើកម្ពុជាចង់ធ្វើ។ ប៉ុន្តែអ្នកជំនាញកិច្ចការអន្តរជាតិរូបនេះ ព្រមានថាបើកម្ពុជាហ៊ានធ្វើបែបនេះមែន សហគមន៍អឺរ៉ុបនឹងមានចំណាត់ការចំពោះកម្ពុជាដូចជាព្យួរប្រព័ន្ធអនុគ្រោះពន្ធគ្រប់បែបយ៉ាងលើកលែងតែអាវុធ ហៅកាត់ថាEBA ហើយមិនត្រឹមតែប៉ុណ្ណោះប្រទេសជាសមាជិកអាស៊ាននឹងមានការខឹងសម្បារជាមួយកម្ពុជាហើយនឹងធ្វើឲ្យកម្ពុជាក្លាយជាប្រទេសមួយដែលឯកោក្នុងតំបន់នេះទៀតផង។
កិច្ចប្រជុំកំពូលអាស៊ី-អឺរ៉ុបនឹងធ្វើឡើងនៅទីក្រុងប្រ៊ុចសែល ប្រទេសប៊ែលហ្ស៊ិកក្នុងរយៈពេល២ថ្ងៃគឺថ្ងៃទី១៨និង១៩ខែតុលាឆ្នាំ២០១៨ខាងមុខនេះ៕
