ប្រមុខរដ្ឋាភិបាលកម្ពុជា លោក ហ៊ុន សែន អះអាងថា លោកចាត់ទុកជប៉ុនជាប្រទេសដែលកម្ពុជាគួរយកជាគំរូតាមទាំងផ្នែកប្រជាធិបតេយ្យ និងការអភិវឌ្ឍជាតិ។ នេះបើតាមការចុះផ្សាយរបស់សារព័ត៌មានជប៉ុន។
សារព័ត៌មានជប៉ុន Japan Times ចុះផ្សាយថា លោកនាយករដ្ឋមន្ត្រី ហ៊ុន សែន បានផ្ដល់កិច្ចសម្ភាសផ្ដាច់មុខដល់ទីភ្នាក់ងារព័ត៌មានជប៉ុន Kyodo កាលពីថ្ងៃម្សិលមិញនេះ អំឡុងពេលមេដឹកនាំកម្ពុជារូបនេះ ចាប់ផ្ដើមដំណើរបំពេញទស្សនកិច្ចនៅប្រទេសមហាអំណាចសេដ្ឋកិច្ចពិភពលោកលំដាប់ទី៣មួយនេះ។
លោក ហ៊ុន សែន ត្រូវបានទីភ្នាក់ងារព័ត៌មាន Kyodo ចោទសួរថា តើរដ្ឋាភិបាលរបស់លោកនឹងធ្វើបែបណាទៀតដើម្បីឆ្ពោះទៅរកគន្លងប្រជាធិបតេយ្យ ក្រោយពីគណបក្សប្រជាជនកម្ពុជារបស់ ឈ្នះឆ្នោតដែលគ្មានវត្តមានអតីតបក្សប្រឆាំងចូលរួម និងគ្រប់គ្រងអាសនៈទាំងអស់ក្នុងរដ្ឋសភានោះ។
លោក ហ៊ុន សែន បានឆ្លើយតបថា៖ «ខ្ញុំតែងតែមើលប្រទេសអភិវឌ្ឍជាច្រើនក្នុងតំបន់ និងជុំវិញពិភពលោក។ ដូច្នេះ ខ្ញុំអាចរៀនសូត្រពីពួកគេទាំងទិដ្ឋភាពសេដ្ឋកិច្ច និងនយោបាយ ជាពិសេសគឺប្រទេសជប៉ុន ដែលមានស្ថិរភាពនយោបាយ និងសេដ្ឋកិច្ចរឹងមាំ និងជាគំរូលទ្ធិប្រជាធិបតេយ្យពិតប្រាកដ»។
លោក ហ៊ុន សែន កំពុងដឹកនាំគណៈប្រតិភូជាន់ខ្ពស់កម្ពុជាទៅចូលរួមកិច្ចប្រជុំកំពូលមេគង្គ-ជប៉ុនលើកទី១០ ដែលធ្វើឡើងចាប់ពីថ្ងៃទី៦ ដល់ ១០ ខែតុលា ឆ្នាំ២០១៨។
បើតាមសេចក្ដីប្រកាសព័ត៌មាន ក្រៅពីកិច្ចប្រជុំនេះ លោក ហ៊ុន សែន ក៏គ្រោងជួបជាមួយនាយករដ្ឋមន្ដ្រីជប៉ុន លោក ស៊ីនហ្សូ អាបេ ដើម្បីពិភាក្សាអំពីបញ្ហាផ្សេងៗ ទាក់ទងនឹងកិច្ចសហប្រតិបត្ដិការប្រទេសទាំងពីរ បញ្ហាតំបន់ និងអន្ដរជាតិ។
លោកក៏គ្រោងជួបជាមួយឥស្សរជន និងប្រធានអង្គការមួយចំនួន រួមទាំងពិធីជួបសំណេះសំណាលជាមួយសហគមន៍ និងនិសិត្សខ្មែរកំពុងរស់នៅ និងសិក្សានៅទីនោះផងដែរ។
ការបោះឆ្នោតជ្រើសតាំងតំណាងរាស្ដ្រនីតិកាលទី៦នៅកម្ពុជាកាលពីថ្ងៃទី២៩កក្កដា ត្រូវបានក្រុមប្រទេសលោកសេរីមួយចំនួនវាយតម្លៃថា គ្មានភាពត្រឹមត្រូវ សេរី និងយុត្តិធម៌នោះទេ ខណៈគ្មានវត្តមានអតីតគណបក្សប្រឆាំងដ៏ធំ ហើយរដ្ឋាភិបាលកម្ពុជាក៏រងចោទថា បានប្រព្រឹត្តអំពើរំលោភសិទ្ធិមនុស្សធ្ងន់ធ្ងរផងដែរ៕