នាយករដ្ឋមន្រ្តីជប៉ុន បានរំឭកកម្ពុជាជាថ្មីម្ដងទៀតឲ្យដើរលើគន្លងប្រជាធិបតេយ្យដោយជប៉ុនក៏នឹងអញ្ជើញអ្នកនយោបាយវ័យក្មេងកម្ពុជា មន្ត្រី គ.ជ.ប និងមន្ត្រីនៅក្រសួងយុត្តិធម៌ជាដើមឲ្យទៅមើលពីដំណើរការប្រជាធិបតេយ្យនៅប្រទេសនេះទៀតផង ។
នាយករដ្ឋមន្រ្តីជប៉ុន បានថ្លែងបែបនេះក្នុងសន្និសីទសារព័ត៌មានមួយនៅទីក្រុងតូក្យូកាលពីសប្តាហ៍មុន។ នាយករដ្ឋមន្ត្រីជប៉ុន លោក ស៊ីនហ្សូ អាបេ (Shinzo Abe) ប្រាប់នាយករដ្ឋមន្ត្រីកម្ពុជាតាមរយៈអ្នកបកប្រែថា២៥ឆ្នាំកន្លងមកនេះ ជប៉ុនបានអមដំណើរជាមួយកម្ពុជាក្នុងវិថីមួយដែលជំរុញកម្ពុជាឲ្យមានការអភិវឌ្ឍតាមបែបប្រជាធិបតេយ្យ។
លោកថា៖«ប្រទេសជប៉ុន រំពឹងទុកថាប្រទេសកម្ពុជានឹងមានការអភិវឌ្ឍយ៉ាងរឹងមាំបន្ថែមទៀត តាមរយៈការរួបរួមគ្នារបស់ប្រជាជនកម្ពុជាទាំងអស់ហើយបន្តលើកកម្ពស់ដំណើរការប្រជាធិបតេយ្យ។ជប៉ុនមានការតាំងចិត្តយ៉ាងមុតមាំ ក្នុងការជួយដល់ការខិតខំប្រឹងប្រែងរបស់សម្តេច សម្រាប់គោលដៅនេះ»។
នាយករដ្ឋមន្ត្រីកម្ពុជា លោក ហ៊ុន សែន បានស្វាគមន៍ទៅនឹងការលើកឡើងរបស់នាយករដ្ឋមន្ត្រីជប៉ុន។ ប៉ុន្តែលោកថាកម្ពុជា កំពុងជំរុញ ដំណើរការប្រជាធិបតេយ្យ តាមរយៈការរៀបចំឲ្យមានការបោះឆ្នោតរៀងរាល់អាណត្តិ។
លោកថា៖«ដូចជាពេលបច្ចុប្បន្ននេះ យើងកំពុងស្ថិតក្នុងដំណាក់កាលចុះឈ្មោះបោះឆ្នោតប្រចាំឆ្នាំដែលក្នុងមួយឆ្នាំត្រូវធ្វើមួយដង។ ហើយនោះហើយដែលជាលទ្ធផលឈានទៅរកដំណើរការប្រជាធិបតេយ្យបន្តទៀត របស់យើង»។
អ្នកវិភាគនយោបាយ លោក ឯម សុវណ្ណារ៉ា លើកឡើងថាជប៉ុនបានដើរតួជាអ្នកសម្របសម្រួលទុកពេលឲ្យកម្ពុជា ពិចារណាពីជម្រើសដើម្បីគេចពីទណ្ឌកម្មសេដ្ឋកិច្ចពីក្រុមប្រទេសលោកសេរី។ ប៉ុន្តែអ្នកវិភាគរូបនេះថា ជប៉ុននឹងបត់តាមអាមេរិក និងសហភាពអឺរ៉ុប បើកម្ពុជាព្យាយាមអោបចិនតែមួយ ទោះពេលនេះជប៉ុនមានប្រយោជន៍ខ្លះពីកម្ពុជាក៏ដោយ។
លោកថា៖«ក្រុមហ៊ុនជប៉ុនជាង២០០០នៅកម្ពុជា។ អញ្ចឹងជប៉ុនក៏បារម្ភដែរ បើបរិយាកាសនយោបាយនៅកម្ពុជារងឥទ្ធិពលសេដ្ឋកិច្ចណាមួយក្រុមហ៊ុនជប៉ុនរកស៊ីនៅកម្ពុជាក៏ប៉ះពាល់ដែរ។ ទី២ ជប៉ុនភ័យពីកម្ពុជា ស្ថិតនៅក្នុងភាពងប់ពីឥទ្ធិពលចិនខ្លាំង អញ្ចឹងជប៉ុនចង់ទប់កុំឲ្យកម្ពុជាមានទំនោរទៅចិនខ្លាំងពេកដែរ»។
ជប៉ុនមិនបានបញ្ជូនអ្នកសង្កេតការណ៍ មកឃ្លាំមើលការបោះឆ្នោតជាតិនៅកម្ពុជាកាលពីថ្ងៃទី២៩ខែកក្កដាឆ្នាំ២០១៨កន្លងមកទេ បើទោះបីជាជប៉ុនជាម្ចាស់ជំនួយដ៏ធំដែលជួួយកម្ពុជាក្នុងដំណើរការបោះឆ្នោត និងជាប្រទេសមួយដែលតែងតែបញ្ជូនអ្នកសង្កេតការណ៍មកកម្ពុជារៀងរាល់ការបោះឆ្នោតយ៉ាងណាក្តី៕