មន្ត្រីជាន់ខ្ពស់នគរបាលជាតិទទួលបន្ទុកចរាចរណ៍ អំពាវនាវទៅប្រជាពលរដ្ឋចូលរួមគោរពច្បាប់ និងរាយការណ៍ព័ត៌មានទៅថ្នាក់លើបើមន្ត្រីនគរបាលចរាចរណ៍ទារប្រាក់ពីពលរដ្ឋលើសពីច្បាប់កំណត់។
ប្រធាននាយកដ្ឋាននគរបាលចរាចរណ៍និងសណ្តាប់ធ្នាប់សាធារណៈ លោក រុន រ័ត្នវាសនា ជំរុញទៅមន្ត្រីនគរបាលចរាចរណ៍ទាំងអស់ត្រូវគោរពច្បាប់ នឹងអំពាវនាវទៅប្រជាពលរដ្ឋដែលបើកបរល្មើសច្បាប់ ត្រូវបង់ប្រាក់ទៅសមត្ថកិច្ចឲ្យស្របតាមច្បាប់កំណត់ ដើម្បីចូលរួមទប់ស្កាត់កុំឲ្យមានបទល្មើសចរាចរណ៍និងអំពើពុករលួយ។
លោកមានប្រសាសន៍ថា«អ្នកដែលខុស កុំឲ្យគាត់នាំខុសហ្នឹង ទៅជាអំពើសូក[មន្ត្រីនគរបាលចរាចរណ៍] ទៅជាការលើកទឹកចិត្ត អ្នក[ប្រព្រឹត្តល្មើស] គាត់កុំទទួលការបង់ប្រាក់អ្វីដែលខុស ដែលមិនចេញវិក័យបត្របង់ប្រាក់ បានវាត្រឹមត្រូវ»។
តាមលោក រុន រ័ត្នវាសនា បន្តថានគរបាលចរាចរណ៍ដែលទារប្រាក់ពីប្រជាពលរដ្ឋបើកបរល្មើសច្បាប់ ត្រូវចេញវិក័យបត្រ ហើយបើយកប្រាក់លើសដូចករណីខេត្តព្រះសីហនុ នឹងប្រឈមការពិន័យរដ្ឋបាល ឬដកឋានន្តរស័ក្តិ ឬធ្ងន់ធ្ងរឈានដល់បណ្តេញចេញពីការងារជាដើម។ មន្ត្រីជាន់ខ្ពស់រូបនេះបញ្ជាក់ថា បើប្រជាពលរដ្ឋត្រូវមន្ត្រីនគរបាលចរាចរណ៍ទារប្រាក់លើសច្បាប់កំណត់ ពលរដ្ឋអាចទាក់ទងទៅមន្ត្រីថ្នាក់លើ តាមលេខទូរសព្ទ ១១៧ ដើម្បីរាយការណ៍បានគ្រប់ពេល។
អាជីវករម្នាក់ រស់នៅសង្កាត់កាកាប ខណ្ឌពោធិ៍សែនជ័យ រាជធានីភ្នំពេញ លោក សេង រតនា បានអះអាងថា លោកធ្លាប់បាននគរបាលចរាចរណ៍ប្រចាំការនៅផ្លូវ២៧១ ក្បែរស្តុបណូគា ផាកពិន័យ២ម៉ឺនរៀល ដោយមិនបានចេញវិក័យបត្រឲ្យនោះទេ នៅពេលដែលលោកបើកបរមិនពាក់មួកសុវត្ថិភាព ។ លោកថា ចង់ប្រាប់ទៅថ្នាក់លើដែរ ប៉ុន្តែមិនដឹងរាយការណ៍តាមរយៈណា ដោយសារនៅពេលនោះ លោកប្រញាប់ទៅដឹកឥវ៉ាន់យកទៅផ្ទះ។
លោករៀបរាប់ថា៖«នៅពេលដែលខ្ញុំខុស អត់មានមួកសុវត្ថិភាព គាត់ផាក[នគរបាលចរាចរណ៍] ពេលទុកម៉ូតូយូរខ្លាចមានបញ្ហា ចឹងគ្រួសារពិបាកដែរ អត់មានម៉ូតូជិះពីរ បីថ្ងៃ គឺអត់លុយចាយ នៅពេលគាត់ទារពីរម៉ឺនរៀលឲ្យគាត់ពីរម៉ឺនទៅ។»
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ មានប្រសាសន៍ថា មន្ត្រីនរគបាលចរាចរណ៍ដែលទារលុយទារលុយប្រជាពលរដ្ឋមួយចំនួន ដោយសារស្ថាប័នរដ្ឋខ្វះការគ្រប់គ្រងនៃប្រព័ន្ធឆ្លើយតបទៅកាន់ថ្នាក់លើឲ្យទាន់ហេតុការណ៍។
ករណីនេះលោក ជ័យ មានប្រសាសន៍ថា ស្ថាប័នពាក់ព័ន្ធត្រូវពង្រឹងការអនុវត្តច្បាប់ ដើម្បីកុំឲ្យបញ្ហានេះបន្តកើតឡើង ហើយនាំឲ្យមានអំពើពុករលួយកាន់តែធ្ងន់ធ្ងរជាដើម។
លោកមានប្រសាសន៍ថា៖«យើងមានច្បាប់ ប៉ុន្តែខ្វះយន្តការ។ ជាលទ្ធផល គឺមិនអាចកាត់បន្ថយអំពើពុករលួយបាន តាមការចង់បាននោះទេ។ ហើយអ្នកចូលរួមអនុវត្តច្បាប់ខ្លះ ក៏ក្លាយទៅជាជនរងគ្រោះនៃអំពើពុករលួយ ដែលប្រព្រឹត្តដោយក្រុមអ្នកមានឥទ្ធិពល ក្រុមអ្នកមានសមត្ថកិច្ច ឬក្រុមអ្នកដែលមានអំណាចដែរ»។
ស្នងការនគរបាលខេត្តព្រះសីហនុ លោក ជួន ណារិន កាលពីថ្ងៃទី១១ ខែតុលា ម្សិលមិញ បានហៅមន្ត្រីនគរបាលចរាចរណ៍របស់ខ្លួនចំនួន៣នាក់សួរនាំជុំវិញការទារប្រាក់ពីជនជាតិចិនដែលបើកឡានល្មើសច្បាប់ចរាចរណ៍ចំនួន១០០ដុល្លារ ក្រោយមកយក៥០ដុល្លារ ជាថ្នូរនឹងការមិនអនុវត្តច្បាប់ចរាចរណ៍៕