លោកនាយករដ្ឋមន្ដ្រី ហ៊ុន សែន បានប្រកាសស្វែងរកអដ្ឋិធាតុទាហានអាមេរិកឡើងវិញ បន្ទាប់ពីទំនាក់ទំនងប្រទេសទាំងពីរមានភាពរង្គោះរង្គើរដែលឈានទៅផ្អាកប្រតិបត្តិការនេះជាផ្អាកបណ្ណោះអាសន្ន។
ក្នុងលិខិតមួយចុះថ្ងៃទី១២ តុលា ដែលផ្ញើឆ្លើយតបទៅនឹងសំណើរបស់សមាជិកព្រឹទ្ឋសភារដ្ឋវ៉ាស៊ីងតោនរបស់អាមេរិក លោក Doug Ericksen ប្រមុខរដ្ឋាភិបាលកម្ពុជា លោក ហ៊ុន សែន បានយល់ព្រមបន្ដរុករកអដ្ឋិធាតុទាហានអាមេរិកឡើងវិញ ខណៈប្រតិបត្តិការនេះបានដំណើរការ៣០ឆ្នាំមកហើយ ប៉ុន្ដែ ត្រូវបានផ្អាកជាបណ្ណោះអាសន្នកាលពីពេលថ្មីៗនេះ។
ក្នុងលិខិតនោះ លោក ហ៊ុន សែន លើកឡើងថា ការសម្រេចបន្ដរុករកអដ្ឋិធាតុទាហានអាមេរិកឡើងវិញនេះ គឺធ្វើឡើងនៅក្រោមហេតុផល «ក្ដីមេត្ដាករុណា» និងដើម្បីចូលរួមរំលែកទុក្ខជាមួយក្រុមគ្រួសាររបស់ពួកគេ។
លោក ហ៊ុន សែន លើកឡើងទៀតថា ការផ្អាកប្រតិបត្តិការនេះ គឺបន្ទាប់ពីកម្ពុជាទទួលរងទណ្ឌកម្មយ៉ាង«អយុត្តិធម៌» នៅពេលដែលកម្ពុជាគ្រាន់តែទាមទារឲ្យសហរដ្ឋអាមេរិកពិចារណាបន្ថែមទៅលើកម្មវិធីមាតុភូមិនិវត្តន៍ ដែលស្ថិតក្រោមហេតុផលមនុស្សធម៌ដូចគ្នានេះ។
កាលពីខែតុលាឆ្នាំ២០១៧ រដ្ឋាភិបាលកម្ពុជាបានផ្អាកកិច្ចសហប្រតិបត្តិការរុករកអដ្ឋិធាតុទាហានអាមេរិកជាបណ្ដោះអាសន្ន ប៉ុន្ដែ អះអាងថា នឹងចាប់ផ្ដើមដំណើរការឡើងវិញ នៅពេលមានការចរចាណាមួយដែលអាចជឿទុកចិត្តបានក្នុងការធានាទៅវិញទៅមកនៃការលើកលែងការផ្អាកកិច្ចសហប្រតិបត្តិការនេះ៕