អ្នកនាំពាក្យក្រសួងការបរទេសចិន បានលើកឡើងថាអាមេរិកគួរតែឆ្លុះមើលពីការរំលោភសិទ្ធិមនុស្សដ៏ធ្ងន់ធ្ងររបស់ខ្លួនជាជាងប្រើបញ្ហានេះដើម្បីជ្រៀតជ្រៀកផ្ទៃក្នុងប្រទេសដទៃ។
លោក លូ ខាង អ្នកពាក្យនាំក្រសួងការបរទេសចិន បានថ្លែងបែបនេះក្នុងសន្និសីទសារព័ត៌មានមួយកាលពីថ្ងៃសុក្រសប្តាហ៍មុន ដើម្បីជាការឆ្លើយតបទៅនឹងការលើកឡើងរបស់អនុប្រធានាធិបតីសហរដ្ឋអាមេរិក លោក ម៉ៃ ផេន ដែលថាសេរីភាពនិងសិទ្ធិមនុស្សរបស់ប្រជាជនចិនកំពុងដើរថយក្រោយ។
អ្នកនាំពាក្យក្រសួងការបរទសចិនរូបនេះ បាននិយាយថាអាមេរិកខ្លួនឯងទេដែលហ៊ុមព័ទ្ធដោយបញ្ហាសិទ្ធិមនុស្សពោលគឺអស់ពីបញ្ហាមួយចូលបញ្ហាមួយ។ លោក បន្តថាអាមេរិកខ្លួនឯងក៏បានដកខ្លួនចេញពីក្រុមប្រឹក្សាសិទ្ធិមនុស្សអង្គការសហប្រជាជាតិ ដូច្នេះអាមេរិកគ្មានសិទ្ធណាមួយដើម្បីចង្អុលប្រាប់ប្រទេសដទៃពីរឿងសិទ្ធិមនុស្សឡើយ។
លោក លូ ខាង បានបន្ថែមយ៉ាងដូច្នេះថា៖«ដំបូន្មានរបស់យើងគឺអាមេិកគួរតែឆ្លុះបញ្ចាំងមើលពីការរំលោភសិទ្ធិមនុស្សដ៏ធ្ងន់ធ្ងររបស់ខ្លួន ជាជាងប្រើបញ្ហាសិទ្ធិមនុស្សហ្នឹងជាឧបករណ៍នយោបាយដើម្បីជ្រៀតជ្រែកកិច្ចការផ្ទៃក្នុងប្រទេសដទៃ»។
ក្រៅពីថ្លែងវាយប្រហារចំៗទៅលើសហរដ្ឋអាមេរិក លោក លូ ខាង ក៏មិនភ្លេចនិយាយការពារប្រទេសខ្លួនដែរ។ អ្នកនាំពាក្យក្រសួងការបរទសរូបនេះ បានលើកឡើងថាចិនចាត់ទុកការលើកកម្ពស់និងការការពារសិទ្ធិមនុស្សជារឿងមួយដ៏ខាន់ ហើយប្រជាជនចិនកំពុងតែប្រើប្រាស់ដោយសប្បាយរីករាយនូវសិទ្ធិនិងសេរីភាពជាច្រើនដែលស្របទៅតាមច្បាប់ដែលមានជាធរមានក្នុងប្រទេសចិន។
លោក លូ ខាង បានបន្តថារយៈពេល៤០ឆ្នាំក្រោយពីការធ្វើកំណែទម្រង់ សិទ្ធិមនុស្សនៅក្នុងប្រទេសចិនមានការរីកចម្រើនជាបន្តបន្ទាប់។ លោកបានបន្ថែមទៀតថាប្រជាជនចិន៨០០លាននាក់បានប្រើប្រាស់សិទ្ធរបស់ពួកគេលើបណ្ដាញអិុនធឺណិតដោយអាចប្រាស្រ័យទាក់ទងជាមួយនឹងអាជ្ញាធររដ្ឋចិនគ្រប់លំដាប់ថ្នាក់។
លោកលូ ខាង ក៏បានបញ្ជាក់ទៀតថាចិនក៏បានផ្ដល់សិទ្ធិគោរពសាសនានានាដោយពេញលេញដល់ពលរដ្ឋរបស់ខ្លួនផងដែរ។ លោកថា នៅប្រទេសចិនពេលនេះមានពលរដ្ឋ២០០លាននាក់កំពុងគោរពប្រតិបត្តិសាសនាផ្សេងៗ បុព្វជិតសាសនាមាន៣៨ម៉ឺននាក់កំពុងធ្វើការងារផ្សព្វផ្សាយសាសនារបស់ខ្លួន ហើយទីសក្ការៈបូជាសម្រាប់ជំនឿនិងសាសនាផ្សេងៗមានរហូតដល់១៤ម៉ឺនកន្លែង។
តាមលោក លូ ខាង កត្តាទាំងនេះបានបញ្ជាក់យ៉ាងច្បាស់ពីការរីកចម្រើននៃស្ថានភាពសិទ្ធិមនុស្សនិងសេរីភាពក្នុងប្រទេសចិន។ ទោះជាយ៉ាងណាក៏ដោយក៏អ្នកនាំពាក្យក្រសួងការបរទេសចិនរូបនេះ ទទួលស្គាល់ដែរថាគ្មានប្រទេសណាមួយមានការគោរពសិទ្ធិមនុស្សល្អបំផុតនោះទេ ដោយសារតែប្រជាជនក្នុងប្រទេសនីមួយៗត្រូវតែគោរពរដ្ឋធម្មនុញ្ញនិងច្បាប់ផ្សេងៗរបស់ប្រទេសខ្លួន។ លោកបន្ថែមថាគ្មានប្រទេសណាមួយអនុញ្ញាត្តិឲ្យពលរដ្ឋខ្លួនប្រព្រឹត្តបទឧក្រិដ្ឋនានាហើយយកបញ្ហាសិទ្ធិសេរីភាពមកជាលេសដើម្បីបិទបាំងនូវអំពើល្មើសច្បាប់របស់ខ្លួននោះឡើយ។
កាលពីថ្ងៃទី១០ខែតុលា ឆ្នាំ២០១៨កន្លងទៅ អនុប្រធានាធិបតីសហរដ្ឋអាមេរិកលោក ម៉ៃ ផេន បានថ្លែងក្នុងសុន្ទរកថាមួយស្តីពីគោលនយោបាយរបស់អាមេរិកចំពោះចិន ថាស្ថានភាពសិទ្ធិមនុស្សក្នុងប្រទេសចិនបានដើរថយក្រោយក្នុងរយៈពេលប៉ុន្មានឆ្នាំចុងក្រោយនេះ។ អនុប្រធានាធិបតីអាមេរិករូបនេះ បានវាយប្រហាររដ្ឋាភិបាលចិនថាបានរឹតបន្តឹងយ៉ាងខ្លាំងនូវលំហូរព័ត៌មានដោយសេរីដល់ប្រជាជនរបស់ខ្លួន ហើយថែមទាំងរឹតត្បិតសិទ្ធិសេរីភាពខាងជំនឿសាសនាយ៉ាងខ្លាំងទៀតផង៕