អតីតមេដឹកនាំបក្សប្រឆាំងលោក សម រង្ស៊ី អះអាងថានឹងប្រាប់សហភាពអន្តរសភា(IPU) ថាតំណាងរាស្ត្រកម្ពុជារងការរំលោភសិទ្ធិ ហើយពេលនេះតំណាងដោយរដ្ឋសភាក្លែងក្លាយ។
IPU បានបើកមហាសន្និបាទលើកទី១៣៩របស់ខ្លួននៅទីក្រុងហ្សឺណែវប្រទេសស្វីស ចាប់ពីថ្ងៃទី១៤ដល់ថ្ងៃទី១៨ខែតុលា ក្រោមប្រធានបទ «ភាពជាថ្នាក់ដឹកនាំសភាក្នុងការជំរុញសន្តិភាព និងការផ្លាស់ប្តូរតាមបែបបច្ចេកវិទ្យា»។
កិច្ចប្រជុំនេះ មានសមាជិក១៣៥ប្រទេសចូលរួម មានទាំងកម្ពុជា។ កម្ពុជាដឹកនាំដោយអនុប្រធានទី២នៃរដ្ឋសភា គឺលោកស្រី ឃួន សុដារី ។ រីឯលោក សម រង្ស៊ី ត្រូវបានអះអាងមកថា IPU បានអញ្ជើញឲ្យចូលរួមផងដែរ។
លោក សម រង្ស៊ី សរសេរលើហ្វេសប៊ុក របស់លោកថា ពេលនេះលោកកំពុងនៅទីក្រុង ហ្សឺណែវ ដើម្បីតាមដានការងាររបស់ IPU។
លោកថា៖ «លោកជួបមេដឹកនាំ សភា IPU ដើម្បីបង្ហាញប្រាប់គេពីស្ថានការណ៍ប្រទេសកម្ពុជា និងប្រាប់គេពីករណីតំណាងរាស្ត្រកម្ពុជា ដែលសិទ្ធិរបស់ពួកគេ ត្រូវបានរំលោភ ដោយរដ្ឋអំណាចក្រុងភ្នំពេញ ដែលពេលនេះតំណាងដោយរដ្ឋសភាក្លែងក្លាយ និងរដ្ឋាភិបាលមិនស្របច្បាប់»។
អ្នកនាំពាក្យរដ្ឋសភាលោក ឡេង ប៉េងឡុង បានច្រានចោលការលើកឡើងរបស់លោក សម រង្ស៊ី នេះ និងបានអះអាងថា IPUនឹងមិនជឿសម្តី លោក សម រង្ស៊ីទេ។
លោកថា៖«លោក សម រង្ស៊ី ជាខ្មោចនយោបាយ។ ទី២អ្វីដែលគាត់ធ្វើកន្លងមក គាត់ភូតភរ យកជាការមិនបានទេ។ លោកចាំមើលទៅថាតើមាននរណាគេអញ្ចើញលោក សម រង្ស៊ី ទៅនិយាយ»។
អតីតគណបក្សសង្គ្រោះជាតិ ត្រូវតុលាការកំពូល ប្រកាសរំលាយមុនការបោះឆ្នោតជ្រើសតាំងតំណាងរាស្ត្រនីតិកាលទី៦នេះមកដល់ តាមបណ្តឹងរដ្ឋាភិបាល ។ ការរំលាយនេះ បានបើកផ្លូវឲ្យមានការបែងចែងអាសនៈទាំង៥៥ក្នុងសភា និងអាសនៈឃុំ សង្កាត់ ជាង៥ពាន់របស់បក្សអតីតបក្សប្រឆាំងមួយនេះ និងបានហាមឃាត់មន្ត្រីសំខាន់ៗ១១៨រូប មិនឲ្យធ្វើនយោបាយ៥ឆ្នាំទៀតផង។
ប៉ុន្តែលោក ឡេង ប៉េងឡុង អះអាងថា បើ IPU ធ្វើខុសលក្ខខណ្ឌ គណៈប្រតិភូរបស់កម្ពុជា ដែលទៅចូលរួមប្រជុំ នឹងតវ៉ាឲ្យបណ្តេញលោក សម រង្ស៊ី ចេញ។
អ្នកតាមដានបញ្ហាសង្គម លោក ឯម សុវណ្ណារ៉ា ពន្យល់ថា បើ IPU ពិតជាបានអញ្ជើញលោក សម រង្ស៊ី ឲ្យចូលរួមប្រជុំដូចការអះអាងមែន លោកថា ស្ថាប័នអន្តរជាតិមួយនេះ នៅទទួលស្គាល់ភាពស្របច្បាប់របស់តំណាងរាស្ត្របក្សបក្សប្រឆាំងនៅឡើយ។ ប៉ុន្តែអ្នកវិភាគរូបនេះ រំឭកថា បើអ្នកនយោបាយខ្មែរ ឈ្នោះគ្នានៅក្នុងកិច្ចប្រជុំនេះមែន លោកថា ជារឿងគួរឲ្យខ្មាសអៀនមួយទៀតរបស់កម្ពុជាលើឆាកអន្តរជាតិ ។
លោកថា៖«ក្នុងគ្រួសារមួយបើយើងឈ្មោះគ្នានៅមុខគេ វាហាក់ដូចជាហែកខោ អាវ ហែកទ្រូង ឲ្យអ្នកខាងក្រៅគេ ដឹងពីចំនុចខ្សោយ របស់យើង ដល់អញ្ចឹងភាពថ្លៃថ្នូររបស់យើងក៏វាធ្លាក់ចុះតាមហ្នឹងដែរទី១។ ទី២យើងបញ្ចាក់អំពី គេហៅថា ភាពផុយស្រួយនៃឆាកនយោបាយនាពេលបច្ចុប្បន្ននេះ ក៏ដូចទៅថ្ងៃអនាគត វាអាចប្រឈមនឹងបញ្ហាច្រើន វាមិនអាចរកភាពសុខដុមរមនានឹងគ្នាកើត»។
ក្នុងមហាសន្និបាទលើកទី១៣៨ អំឡុងចុងខែមិនា ២០១៨ IPU បានចេញសេចក្តីថ្លែងការណ៍មួយ ចាត់ទុកវិធានការទាំងឡាយទៅលើបក្សប្រឆាំងនៅកម្ពុជាថា ជាការរំលោភសិទ្ធិជាមូលដ្ឋានរបស់សមាជិកសភា។ សេចក្តីថ្លែងការនោះ ជំរុញរដ្ឋអំណាចកម្ពុជា ឲ្យប្រគល់អាសនៈសភាទាំង៥៥ដល់សមាជិកសភា របស់អតីតគណបក្សសង្គ្រោះជាតិ និងត្រូវចាប់ផ្ដើមសន្ទនានយោបាយឡើងវិញ ដើម្បីធានាពីដំណើរការប្រជាធិបតេយ្យ៕
