មន្ត្រីជាន់ខ្ពស់នៃនគរបាលជាតិ ឲ្យដឹងថាសមត្ថកិច្ចបានកំណត់មុខសញ្ញាក្រុមចោរប្លន់ធនាគារ អ អេច ប៊ី ឥណ្ដូឆៃណា សាខាម៉ៅសេទុង កាលពីថ្ងៃទី២៣ ខែសីហា ទាំងកណ្តាលថ្ងៃនោះបានខ្លះៗហើយ។
អ្នកនាំពាក្យអគ្គស្នងការនគរបាលជាតិលោក ឆាយ គឹមខឿន ប្រាប់វីអូឌីនៅថ្ងៃនេះថា សមត្ថកិច្ចបានកំណត់មុខសញ្ញាក្រុមចោរប្លន់ធនាគារមួយចំនួនហើយ ប៉ុន្តែមិនទាន់ចាត់វិធានការ ដោយថាសមត្ថកិច្ចកំពុងប្រមូលភស្តុតាងបន្ថែមទៀត។ យ៉ាងណាក៏ដោយ លោកសុំមិនផ្ដល់ព័ត៌មានលម្អិតចំពោះរឿងនេះ ដោយថាវាប៉ះពាល់លទ្ធផលស៊ើបអង្កេត។
លោកថា៖«សុំទោសខ្ញុំមិនអាចប្រាប់បានទេជាអ្នកណាៗ ព្រោះមុខសញ្ញាដែលយើងកំណត់គ្រាន់តែជាការសង្ស័យទេ អត់ប្រាប់អ្នកណាអ្នកនោះបានទេ»។
បើតាមរបាយការណ៍របស់សមត្ថកិច្ចឲ្យដឹងថា ក្រុមចោរដែលចូលប្លន់ធនាគារ អ អេច ប៊ី ឥណ្ដូឆៃណា នៅម្ដុំសាលាវ៉ាន់ដា តាមបណ្ដោយផ្លូវម៉ៅសេទុង សង្កាត់ទំនប់ទឹក ខណ្ឌចំការមន រាជធានីភ្នំពេញ កាលពីថ្ងៃទី២៣ ខែសីហា ឆ្នាំ២០១៨ កន្លងទៅ មានគ្នាចំនួន ៥ នាក់ ដោយយកលុយបានជាង១សែនដុល្លារ។ ក្រោយពីមានហេតុការណ៍នេះ នៅថ្ងៃទី២៤ ខែសីហា គ្រឹះស្ថានមីក្រូហិរញ្ញវត្ថុមួយចំនួន អំពាវនាវទៅអាជ្ញាធរពាក់ព័ន្ធជួយផ្សព្វផ្សាយពីវិធានការណ៍ការពារនានាឲ្យបានទូលំទូលាយ ក៏ដូចជាជួយការពារសុវត្ថិភាពគ្រឹះស្ថានរបស់ខ្លួនផងដែរ៕
