រដ្ឋាភិបាលកម្ពុជាអះអាងថា បញ្ហាផ្ទៃក្នុងរបស់កម្ពុជា នឹងមិនក្លាយជាប្រធានបទដាក់សម្ពាធក្នុងកិច្ចប្រជុំកំពូលអាស៊ី-អឺរ៉ុប (ASEM) ដូចមជ្ឈដ្ឋានប្រឆាំង លើកឡើងនោះឡើយ ដោយថាកិច្ចប្រជុំនេះ មានបំណងផ្តោតសំខាន់ពង្រឹងកិច្ចសន្ទនានិងកិច្ចសហប្រតិបត្តិការរវាងតំបន់អាស៊ីនិងអឺរ៉ុប។
សេចក្តីប្រកាសព័ត៌មានចុះថ្ងៃទី១៦ ខែតុលា បានលើកឡើងពីររបៀបរវារៈនៃកិច្ចប្រជុំ និងកម្មវិធីផ្ទាល់ខ្លួនរបស់លោកនាយករដ្ឋមន្ត្រី ហ៊ុន សែន ហើយថា មិនមានការប្រជុំណាមួយនិយាយពីបញ្ហាផ្ទៃក្នុងឬដាក់សម្ពាធលើកម្ពុជានោះទេ។
សេចក្តីប្រកាសព័ត៌មាន៖«របៀបវារៈនេះជាសត្យានុម័ត ឆ្លើយតបទៅនឹងការធ្វើវិទ្ធង្សនាអកុសល របស់ក្រុមក្រៅច្បាប់ដែលធ្វើយុទ្ធនាការប្រឌិត និងបំភ្លៃការពិតដែលលើកឡើងថា វត្តមាននាយករដ្ឋមន្ត្រីកម្ពុជានៅក្នុងកិច្ចប្រជុំនោះនឹងទទួលសម្ពាធពីសហគមន៍អឺរ៉ុប»។
សេចក្តីប្រកាសព័ត៌មានដដែល ធ្វើឡើងចំថ្ងៃដែលនាយករដ្ឋមន្ត្រីកម្ពុជា លោក ហ៊ុន សែន ចេញដំណើរទៅប្រជុំកំពូលអាស៊ី-អឺរ៉ុប លើកទី១២ នៅទីក្រុងប្រ៊ុចសែល អះអាងថា៖
«បេសកកម្មផ្លូវការនេះ តំណាងប្រយោជន៍ខ្មែរ និងអាស៊ាន ដើម្បីចូលរួមផ្តល់មតិ និងអនុម័តនៅក្នុងចក្ខុវិស័យឯកភាពជាដៃគូឈរលើមូលដ្ឋាន ឯកច្ឆ័ន និងអធិបតេយ្យ ( បើមានភាគីណាមួយជំទាស់លើសេចក្តីសម្រេចជាយថាហេតុណាមួយនោះ សេចក្តីសម្រេចរួមនោះនឹងមិនអាចប្រកាសជាផ្លូវការបានឡើយ)»។
អតីតមន្ត្រីជាន់ខ្ពស់គណបក្សប្រឆាំងមួយចំនួន បានធ្វើយុទ្ធនាការការទូតនៅក្រៅប្រទេស ជំរុញសហគមន៍អន្តរជាតិឲ្យដាក់សម្ពាធរដ្ឋាភិបាលកម្ពុជាដែលដឹកនាំដោយលោក ហ៊ុន សែន ឲ្យស្តាប្រជាធិបតេយ្យឡើងវិញ ក្រោយពីគណបក្សប្រឆាំងនេះ ត្រូវបានរំលាយកាលពីចុងឆ្នាំ២០១៧ ពោលគឺ មុនការបោះឆ្នោតជាតិមកដល់។
កាលពីថ្ងៃទី៥ ខែតុលា លោក ហ៊ុន សែន បានចោទថា មានអតីតមន្ត្រីជាន់ខ្ពស់គណបក្សសង្គ្រោះជាតិផ្សព្វផ្សាយព័ត៌មានថា តំណាងរដ្ឋាភិបាលកម្ពុជានឹងរងការដាក់សម្ពាធនៅក្នុងកិច្ចប្រជុំអាស៊ី-អឺរ៉ុប ប៉ុន្តែលោក ហ៊ុន សែន ហៅអ្នកផ្សព្វផ្សាយថា មិនយល់ពីនយោបាយអន្តរជាតិ។
កិច្ចប្រជុំកំពូលអាស៊ី អឺរ៉ុបនេះ នឹងប្រព្រឹត្តទៅថ្ងៃទី១៨-១៩ ខែតុលា ឆ្នាំ២០១៨ នៅទីក្រុងប្រ៊ុចសែល។ តំណាងអ្នកគាំទ្រគណបក្សប្រឆាំង អះអាងថា ពួកគេនឹងប្រមូលផ្តុំគ្នាមុខបរិវេណនៃកិច្ចប្រជុំ ប្រឆាំងនឹងវត្តមានលោក ហ៊ុន សែន។