តំណាងរដ្ឋសភាកម្ពុជា ប្រាប់សហភាពអន្តរសភា IPU ដែលមានសមាជិក១៧៣ប្រទេសថា កម្ពុជាបានគោរពគោលការណ៍ប្រជាធិបតេយ្យយ៉ាងមុតមាំ ខណៈសហគមន៍អន្តរជាតិ កំពុងដាក់សម្ពាធឲ្យស្តារប្រជាធិបតេយ្យឡើងវិញ ក្រោយពីផាត់បក្សប្រឆាំងចេញពីឆាកនយោបាយ។
IPU កំពុងបើកមហាសន្និបាតលើកទី១៣៩របស់ខ្លួន នៅទីក្រុងហ្សឺណែវ ប្រទេសស្វីស ចាប់ពីថ្ងៃទី១៤ដល់ថ្ងៃទី១៨ខែតុលានេះ កម្ពុជាត្រូវបានអញ្ជើញឲ្យចូលរួមផងដែរ ។ រដ្ឋសភាកម្ពុជាដឹកនាំដោយអនុប្រធានទី២នៃរដ្ឋសភា លោកស្រី ឃួន សុដារី។
គេហទំព័រហ្វេសប៊ុករបស់រដ្ឋសភាកម្ពុជា បានសរសេរនៅថ្ងៃនេះថា លោកស្រី ឃួន សុដារី បានថ្លែងប្រាប់ IPU ថា បន្ទាប់ពីកម្ពុជា បានបញ្ចប់សង្គ្រាមស៊ីវិលជាង៣ទសវត្សរ៍រួចមក សិទ្ធិនយោបាយ សិទ្ធិមនុស្សក្នុងប្រទេសកម្ពុជា ត្រូវបានទទួលស្គាល់ និងការពារយ៉ាងទូលំទូលាយព្រមទាំងជំរុញទៅមុខឥតឈប់ឈរ។
តំណាងរដ្ឋសភារូបនេះ អះអាងទៀតថា កម្ពុជាពេលនេះ គោរពយ៉ាងមុតមាំនូវគោលការណ៍លទ្ធិប្រជាធិបតេយ្យសេរីពហុបក្ស សិទ្ធិមនុស្ស និងសេចក្តីថ្លៃថ្នូររបស់ប្រជាពលរដ្ឋ។
អតីតតំណាងរាស្ត្រគណបក្សប្រឆាំងលោក អ៊ូ ច័ន្ទរ័ត្ន យល់ឃើញផ្ទុយពីនេះ ដោយលោកថា របត់នយោបាយនៅពេលនេះ កំពុងបង្កគ្រោះថ្នាក់ដល់ដំណើរការប្រជាធិបតេយ្យនៅកម្ពុជា។
លោកថា៖«ឥឡូវនេះយើងបានរអិលជើងចេញពីគន្លងប្រជាធិបតេយ្យហើយ ។ហើយបើគ្មានការជួយជ្រោមជ្រែងទេ អាចនឹងរអិលថយក្រោយតែម្តង»។
ជម្លោះនយោបាយនៅកម្ពុជា ដែលផាត់គណបក្សប្រឆាំងចេញពីឆាកនយោបាយនោះ ជំរុញឲ្យសហរដ្ឋអាមេរិក ប្រកាសពីវិធានការពង្រឹក ទណ្ឌកម្មទិដ្ឋាការដល់មន្ត្រីរដ្ឋាភិបាលកម្ពុជា ដែលមហាអំណាចមួយនេះយល់ថា បានបំផ្លាញប្រជាធិបតេយ្យ ។
សហភាពអឺរ៉ុប កាលពីថ្ងៃទី៥ ខែតុលា ក៏បានជូនដំណឹងពីវិធានការកាត់ផ្តាច់ប្រព័ន្ធអនុគ្រោះពន្ធ EBA ពីកម្ពុជាវិញដែរ បើមិនស្តារប្រជាធិបតេយ្យ ដោយទុកពេលឲ្យ៦ខែ។
អ្នកតាមដានសង្គម លោក ឯម សុវណ្ណារ៉ា បង្ហាញការព្រួយបារម្ភថា របត់នយោបាយនៅកម្ពុជាត្រូវរងវិធានការនានា ពីក្រុមប្រទេសលោកសេរី បើមិនត្រឡប់ថយក្រោយ ស្តារស្ថានការណ៍ឡើងវិញនោះ។
លោកថា៖«បើសិនក្នុង៦ខែហ្នឹង យើង [មេដឹកនាំកម្ពុជា] អត់ស្តារស្ថានភាពនយោបាយ សិទ្ធិមនុស្ស ប្រជាធិបតេយ្យនៅកម្ពុជា ឲ្យមានលក្ខណៈសមស្របដែលអាចឲ្យគេទទួលយកបានទេ។ គេអាចព្យួរអាទម្រង់ EBA ហ្នឹង។ ហើយបើ៦ខែទៀត យើងអត់កែប្រែទៀត គេអាចដកយើងទាំងស្រុង»។
ទោះជាយ៉ាងណាតំណាងកម្ពុជាបានអះអាងថាប្រទេសកម្ពុជាមានគ្រឹះប្រជាធិបតេយ្យរឹងមាំជាងប្រទេសជិតខាងដោយអះអាងថា បើគិតត្រឹមខែឧសភា ឆ្នាំ២០១៨ កម្ពុជាមានសមាគមជាតិ អន្តរជាតិ និងអង្គការសង្គមស៊ីវិល ប្រមាណ៦០០០ បានចុះបញ្ជី និងសហជីពចំនួន៤០០០ទៀត និងគណបក្សនយោបាយចំនួន២០កំពុងធ្វើសកម្មភាពស្របតាមរដ្ឋធម្មនុញ្ញ និងអនុលោមតាមគោលការណ៍លទ្ធិប្រជាធិបតេយ្យ សេរីពហុបក្ស និងមានពលរដ្ឋចេញទៅបោះឆ្នោតដល់ទៅជាង៨៣ភាគរយនៅអាណត្តិទី៦នេះ។