មេធាវីការពារក្តីឲ្យអតីតប្រធានគណបក្សប្រឆាំងលោក កឹម សុខា ឲ្យដឹងថា ស្ថានភាពជំងឺរបស់កូនក្ដីលោកមិនទាន់ធូរស្បើយនៅឡើយ ដោយសារតែជំងឺទឹកនោមផ្អែម និងជំងឺឆ្អឹងគាបសរសៃនៅតែធ្វើទុក្ខដដែល។
មេធាវីការពារក្ដីឲ្យលោក កឹម សុខា គឺលោក ផាន់ ច័ន្ទសាក់ ប្រាប់វីអូឌីនៅថ្ងៃនេះថា កូនក្តីរបស់លោកមិនទាន់ទទួលបានការព្យាបាលពីពេទ្យជំនាញទេ ព្រោះលោកថា តុលាការមិនឲ្យកូនក្តីលោកជួបអ្នកណាផ្សេងទេ។
សាលាដំបូងរាជធានីភ្នំពេញសម្រេចកាលពីថ្ងៃទី១០ ខែកញ្ញា ដោយអនុញ្ញាតឲ្យលោកកឹម សុខា ចេញពីពន្ធនាគារ មកស្នាក់នៅក្នុងផ្ទះវិញដោយសំអាងលើហេតុផលសុខភាព។ តុលាការបានកំណត់ឲ្យលោក កឹម សុខា អាចធ្វើដំណើរតែតំបន់ក្បែរៗផ្ទះរបស់លោកតែប៉ុណ្ណោះ ទោះយ៉ាងណា មេធាវី បញ្ជាក់ថា ចាប់ពីកូនក្តីលោកចេញពីពន្ធនាគារមកគឺលោកនៅក្នុងផ្ទះរហូតមិនបានចេញទៅណាទេ។