មេដឹកនាំកំពូលៗប្រទេសអារ៉ាប៊ីសាអូឌីត បានប្ដេជ្ញាថាពួកគេនឹងស្វែងរកការពិតនៃការសម្លាប់អ្នកសារព័ត៌មានម្នាក់ក្នុងស្ថានកុងស៊ុលរបស់ខ្លួនប្រចាំទីក្រុងអ៊ីស្តង់ប៊ុល ប្រទេសតួកគី ឲ្យខានតែបាន។
ការប្ដេជ្ញារបស់មេដឹកនាំអារ៉ាប៊ីសាអូឌីតបែបនេះ បានធ្វើឡើងក្នុងជំនួបជាមួយរដ្ឋមន្រ្តីក្រសួងការបរទេសអាមេរិកកាលពីម្សិលមិញ។ សេចក្តីសង្ខេបព័ត៌មានស្តីពីដំណើរទស្សកិច្ចរបស់លោក ម៉ៃ ប៉ុមពីអូ ទៅកាន់ប្រទេសអារ៉ាប៊ីសាអូឌីត ដែលចុះផ្សាយលើគេហទំព័រក្រសួងការបរទេសអាមេរិកកាលពីម្សិលមិញ ឲ្យដឹងថារដ្ឋមន្រ្តីក្រសួងការបរទេសរូបនេះបានជួបជាមួយនឹងព្រះមហាក្សត្របច្ចុប្បន្ន ព្រះចៅ សាលម៉ាន រាជទាយាទ មហាម៉េដ សាលម៉ាន និងរដ្ឋមន្រ្តីក្រសួងការបរទេសប្រទេសនេះ។
ប្រភពដដែល បានឲ្យដឹងថាលោក ម៉ៃ ប៉ុមពីអូ បាននិយាយដោយត្រង់ជាមួយមេដឹកនាំអារ៉ាប៊ីសាអូឌីតទាំងនេះពីការសម្លាប់អ្នកសារព័ត៌មានម្នាក់ឈ្មោះ ជឺម៉ាល់ ខាហ្ស័កហ្គី នៅស្ថានកុងស៊ុលរបស់អារ៉ាប៊ីសាអូឌីតប្រចាំទីក្រុងអ៊ីស្តង់ប៊ុល ប្រទេសតួកគី។ មេដឹកនាំអារ៉ាប៊ីសាអូឌីត បានសន្យានឹងលោក ម៉ៃ ប៉ុមពីអូ ថា នឹងស៊ើបអង្កេតលើករណីនេះដោយយកចិត្តទុកដាក់ ប្រកបដោយតម្លាភាព និងឲ្យបានលឿនបំផុត។
ក្នុងជំនួបនោះ មេដឹកនាំកំពូលអារ៉ាប់អារ៉ាប៊ីសាអូឌីត ក៏បានប្រកែកដាច់អហង្ការថា ខ្លួនមិនបានជាប់ពាក់នឹងការសម្លាប់លោក ជឺម៉ាល់ ខាហ្ស័កហ្គី នោះឡើយ។
ការធ្វើដំណើររបស់រដ្ឋមន្រ្តីការទេសអាមេរិក លោក ម៉ៃ ប៉ុមពីអូ ទៅកាន់ប្រទេសអារ៉ាប់អារ៉ាប៊ីសាអូឌីត បានធ្វើឡើងដោយមានការបញ្ជាផ្ទាល់ពីលោក ដូណាល់ ត្រាំ។ លោក ដូណាល់ ត្រាំ ត្រូវបានគេរិះគន់ដោយសារតែលោកមិនមានជំហរពិតប្រាកដពីវិធានការដែលខ្លួននឹងធ្វើចំពោះអារ៉ាប៊ីសាអូឌីត ករណីការសម្លាប់លោក ជឺម៉ាល់ ខាហ្ស័កហ្គី។
មិនត្រឹមតែប៉ុណ្ណោះទេ ក្នុងបទសម្ភាសន៍មួយជាមួយទីភ្នាក់ងារសារព័ត៌មាន AP កាលពីថ្ងៃអង្គារ លោក ដូណាល់ ត្រាំ បាននិយាយការពារអារ៉ាប៊ីសាអ៊ូឌីត ដោយថាការចោទប្រកាន់មេដឹកនាំកំពូលៗអារ៉ាប៊ីសាអ៊ូឌីត ថានៅពីក្រោយការស្លាប់របស់លោក ជឺម៉ាល់ ខាហ្ស័កហ្គី ជាការចោទប្រកាន់ដ៏ក្មេងខ្ចី។ លោក បានប្រៀបធៀបការចោទប្រកាន់ទៅលើមេដឹកនាំអារ៉ាប៊ីសាអ៊ូឌីត ថាដូចទៅនឹងការចោទប្រកាន់ពីរឿងអាស្រូវផ្លូវភេទទៅលើលោក ប្រេត កាវ៉ាន់ណ ប្រធានតុលាការកំពូលអាមេរិកដែលទើបតែត្រូវបានតែងតាំងយ៉ាងដូច្នេះដែរ។
តាមការចុះផ្សាយរបស់សារព័ត៌មាន CNN របស់អាមេរិក រាជទាយាទ មហាម៉េដ សាលម៉ាន និងមន្រ្តីជាន់ខ្ពស់មួយចំនួនទៀតត្រូវបានគេសង្ស័យថាជាអ្នកពីក្រោយនៃស្លាប់របស់លោក ជឺម៉ាល់ ខាហ្ស័កហ្គី ក្នុងស្ថានកុងស៊ុលអារ៉ាប៊ីសាអ៊ូឌីតប្រចាំទីក្រុងអីុស្ថានប៊ុល។
លោក ជឺម៉ាល់ ខាហ្ស័កហ្គី បានទៅកាន់ប្រទេសតួកគីដើម្បីរៀបការជាមួយគូដណ្ដឹងរបស់លោកឈ្មោះ ហាទីស សិនហ្គីស។ យោងតាមការចុះផ្សាយរបស់សារព័ត៌មាន C NN លោក ជឺម៉ាល់ ខាហ្ស័កហ្គី បានចូលស្ថានកុងស៊ុលអារ៉ាប៊ីសាអ៊ូឌីត ប្រចាំទីក្រុងអ៊ីស្តង់ប៊ុល ដើម្បីទៅយកឯកសារមួយចំនួនដើម្បីអាចរៀបជាមួយគូដណ្ដឹងលោក។
សារព័ត៌មាន BBC បានផ្សាយឲ្យដឹងថា គូដណ្ដឹងរបស់លោក ជឺម៉ាល់ ខាហ្ស័កហ្គី បានរង់ចាំគាត់អស់រយៈពេលជាង១០ម៉ោង នៅតែមិនឃើញលោកចេញមកពីស្ថានកុងស៊ុលនោះ ទើបសម្រេចចិត្តប្តឹងទៅអាជ្ញាធរតួកគី។ តាមការចុះផ្សាយរបស់សារព័ត៌មាន CNN សាកសពរបស់លោក ជឺម៉ាល់ ខាហ្ស័កហ្គី ត្រូវបានអាជ្ញាធរតួកគីរកឃើញកាត់ជាកំណាត់ៗនៅក្នុងស្ថានកុងស៊ុលអារ៉ាប៊ីសាអ៊ូឌីត ប្រចាំទីក្រុងអ៊ីស្តង់ប៊ុល។
លោក ជឺម៉ាល់ ខាហ្ស័កហ្គី ជាអ្នកសារព័ត៌មានជនជាតិអារ៉ាប៊ីសាអ៊ូឌីត ប៉ុន្តែលោកបានភៀសខ្លួនទៅរស់នៅសហរដ្ឋអាមេរិកនៅឆ្នាំ២០១៧ ដោយសារតែលោកបារម្ភពីការចាប់ខ្លួនរូបពីសំណាក់អាជ្ញាធរអារ៉ាប៊ីសាអ៊ូឌីត ព្រោះតែលោកបានរិះគន់ពីការធ្វើ ធ្វើកំណែទម្រង់វិស័យសេដ្ឋកិច្ចនិងសង្គមដែលដឹកនាំដោយរាជទាយាទ មហាម៉េដ សាលម៉ាន។ ក្រោយពីពេលទៅដល់ សហរដ្ឋអាមេរិក លោកក៏បានចាប់ផ្ដើមសរសេរអត្ថបទវិចារណកថាឲ្យសារព័ត៌មាន Washington Post។ តាមសារព័ត៌មានអង់គ្លេស BBC ក្នុងវិចារកថារបស់លោក លោកបានរិះគន់ធ្ងន់ៗទៅលើអារ៉ាប៊ីសាអ៊ូឌីតផងដែរ ថាជាអ្នកនៅពីក្រោយជម្លោះដែលកំពុងកើតនៅប្រទេសយេមែន៕