ក្រុមការងារមួយដែលមានសមាជិកចម្រុះ ២២រូប ត្រូវបានបង្កើតឡើងសម្រាប់ទទួលពាក្យបណ្តឹងតវ៉ាផ្សេងៗនៅមុខភូមិគ្រឹះរបស់លោកនាយករដ្ឋមន្ត្រី ហ៊ុន សែន ទាំងពីរកន្លែង ដោយថា ដើម្បីទប់ស្កាត់ការញុះញង់ពីក្រុមឆ្លៀតឱកាសកេងចំណេញមកពីលើក្រុមអ្នកតវ៉ាទាំងនោះ។
ក្នុងសេចក្ដីសម្រេចកាលពីថ្ងៃទី១៦ ខែតុលានេះ លោក ហ៊ុន សែន បានសម្រេចបង្កើតក្រុមការងារចម្រុះទទួល និងដោះស្រាយបណ្តឹងតវ៉ាផ្សេងៗនៅមុខភូមិគ្រឹះរបស់លោកស្ថិតនៅជិតវិមានឯករាជ្យ រាធានីភ្នំពេញ និងមួយកន្លែងទៀត នៅក្រុងតាខ្មៅ ខេត្តកណ្តាល ដោយថា ដើម្បីទប់ស្កាត់ទប់ស្កាត់ការញុះញង់ពីក្រុមឆ្លៀតឱកាសកេងចំណេញមកពីលើក្រុមអ្នកតវ៉ា។
លិខិតដដែលជំរុញទៅអាជ្ញាធរ និងស្ថាប័នពាក់ព័ន្ធទាំងអស់ត្រូវសហការគ្នាទប់ស្កាត់ក្រុមអ្នកតវ៉ា មានបាតុករច្រើននាក់ ដែលមានបំណងដាក់ពាក្យបណ្តឹងតវ៉ាផ្សេងៗ ហើយព្យាយាមពន្យល់ពីនីតិវិធីរបស់ក្រុមការងារចម្រុះ និងច្បាប់ជាដើម។
បើតាមលិខិតដដែលនោះ ក្រុមការងារចម្រុះទាំងនោះ មានសមាជិកសរុប២២រូប ដែលស្ថិតក្រោមការដឹកនាំរបស់មេបញ្ជាការអង្គរក្សលោក ហ៊ុន សែន គឺលោក ហ៊ីង ប៊ុនហៀង ដែលជាអគ្គមេបញ្ជាការរងកងទ័ពផងដែរ និងអមទៅដោយអនុប្រធាន ២រូប មានអភិបាលរាជធានីភ្នំពេញលោក ឃួង ស្រេង និងអភិបាលខេត្តកណ្តាល លោក ម៉ៅ ភិរុណ។
ចំណែកឯមេបញ្ជាការរងកងរាជអាវុធហត្ថលើផ្ទៃប្រទេស លោក រ័ត្ន ស៊្រាង ស្នងការនគរបាលរាជធានីភ្នំពេញ លោក ស ថេត ស្នងការនគរបាលខេត្តកណ្ដាល លោក អ៊ាវ ចំរើន និងមន្ត្រីតំណាងក្រសួងដែនដី ក្រសួងការងារ តំណាងរដ្ឋសភា ព្រឹទ្ធសភា ក្រសួងយុត្តិធម៌ និងក្រសួងព័ត៌មាន ក៏ត្រូវបានចាត់តាំងជាសមាជិកនៅក្នុងក្រុមការងារនេះផងដែរ។
ស្នងការនគរបាលរាជធានីភ្នំពេញ លោក ស ថេត ដែលជាសមាជិកក្នុងក្រុមការងារទទួលពាក្យបណ្តឹងតវ៉ានោះ មានប្រសាសន៍បន្ថែមថា ក្រុមការងារចម្រុះនេះនឹងជួយដល់ប្រជាពលរដ្ឋដែលរងភាពអយុត្តិធម៌ និងទប់ស្កាត់កុំឲ្យប៉ះពាល់សណ្តាប់ធ្នាប់សាធារណៈ ពេលក្រុមបាតុករឡើងមកតវ៉ានៅរាជធានីភ្នំពេញជាដើម។
លោកមានប្រសាសន៍ថា៖ «ខ្ញុំគិតថា ការបង្កើតនេះ ដើម្បីជួយដោះស្រាយបញ្ហាលំបាកជូនប្រជាពលរដ្ឋទេ កុំឲ្យគាត់មក…បាត់សណ្តាប់ធ្នាប់សង្គម។ បង្កើតក្រុមការងារនេះ ដើម្បីជួយសម្រួលដោះស្រាយបញ្ហាជូនពួកគាត់ទេ»។
ប្រធានគ្រប់គ្រងផ្នែកអង្កេតនៃអង្គការការពារសិទ្ធិមនុស្សលីកាដូ លោក អំ សំអាត យល់ថា ក្រុមការងារនេះ ជាសារមួយបង្ហាញទៅមន្ត្រីពាក់ព័ន្ធទាំងអស់ ឲ្យយកចិត្តទុកដាក់ជូួយប្រជាពលរដ្ឋដែលជួបរឿងអយុត្តិធម៌នានា ដើម្បីកុំឲ្យនាំទុក្ខដល់រដ្ឋាភិបាល។
លោកយល់ថា៖ «ការបង្កើតគណៈកម្មការនេះ ជាដំបងមួយសំពងទៅលើអាជ្ញាធរថ្នាក់ក្រោម ត្រូវខិតខំដោះស្រាយបញ្ហាជូនប្រជាពលរដ្ឋ ដើម្បីកុំឲ្យប្រជាពលរដ្ឋឡើងមកទីក្រុងភ្នំពេញ មកតវ៉ាដើម្បីសុំកិច្ចអន្តរាគមន៍ពីសម្តេចនាយករដ្ឋមន្ត្រី។ ការងារលោកច្រើនណាស់ក្នុងការដោះស្រាយជូនប្រជាពលរដ្ឋ»។
កាលពីអាណត្តិមុន រដ្ឋាភិបាលក៏បានបង្កើតគណៈកម្មការចម្រុះអន្តរក្រសួងរួចមកហើយ ដើម្បីធ្វើការដោះស្រាយបញ្ហាជម្លោះដីធ្លីនេះជាបន្តបន្ទាប់ រហូតដល់បង្កើតក្រុមនិស្សិតចុះវាស់វែងដីធ្លីចែកជូនប្រជាពលរដ្ឋ បង្កើតក្រុមការងារទទួលជួបសម្របសម្រួល និងដោះស្រាយជាមួយក្រុមអ្នកតវ៉ា ឬក្រុមបាតុករពាក់ព័ន្ធនឹងបញ្ហាដីធ្លីនៅក្រក្រសួងដែនដី រួមទាំងបង្កើតគណៈកម្មការជាតិបង្ក្រាប និងទប់ស្កាត់បទល្មើសព្រៃឈើដឹកនាំដោយលោក សៅ សុខា អគ្គមេបញ្ជាការកងរាជអាវុធហត្ថលើផ្ទៃប្រទេស៕